Nikhil Gupta: పన్నూన్ హత్యకు కుట్ర కేసు.. నిఖిల్ గుప్తాకు అమెరికాలో 19 ఏళ్ల 7 నెలల జైలు శిక్ష
ఈ వార్తాకథనం ఏంటి
ఖలిస్థానీ వేర్పాటువాద నేత గురుపత్వంత్ సింగ్ పన్నూన్ హత్యకు కుట్ర పన్నిన కేసులో భారతీయుడు నిఖిల్ గుప్తాకు అమెరికా కోర్టు 19 ఏళ్ల 7 నెలల జైలు శిక్ష విధించింది. 55 ఏళ్ల నిఖిల్ గుప్తా శుక్రవారం ఈ శిక్షను ఎదుర్కొన్నారు. పన్నూన్ను హత్య చేసేందుకు కుట్ర పన్నినట్లు అంగీకరిస్తూ ఆయన నేరాన్ని ఒప్పుకోవడంతో న్యాయస్థానం ఈ తీర్పు వెలువరించింది. పన్నూన్ భారత సంతతికి చెందిన న్యాయవాది. ఆయనకు అమెరికా, కెనడా ద్వంద్వ పౌరసత్వం ఉంది. ఆయనకు చెందిన 'సిక్స్ ఫర్ జస్టిస్' సంస్థను భారత ప్రభుత్వం నిషేధించింది.
వివరాలు
హత్యకు కుట్ర, మనీలాండరింగ్ ఆరోపణలు
పన్నూన్ను న్యూయార్క్ నగరంలో హత్య చేసేందుకు కుట్ర పన్నిన వ్యవహారంలో నిఖిల్ గుప్తాపై హత్యకు సుపారీ ఇవ్వడం, ఆ హత్యకు కుట్ర చేయడం, మనీలాండరింగ్కు కుట్ర పన్నడం వంటి అభియోగాలు నమోదయ్యాయి.
ఈ కేసులో న్యూయార్క్లోని సదరన్ డిస్ట్రిక్ట్ కోర్టు న్యాయమూర్తి విక్టర్ మరెరో శుక్రవారం 80 నిమిషాల పాటు విచారణ జరిపారు. అనంతరం 235 నెలల జైలు శిక్ష విధిస్తూ తీర్పు చెప్పారు.
కోర్టు విచారణ సందర్భంగా పన్నూన్ తన ప్రాణాలకు ముప్పు ఉందన్న కారణంగా 1,200 రోజులకు పైగా న్యాయవాదిగా వృత్తిని కొనసాగించలేకపోయానని తెలిపారు.
మరోవైపు తన హత్యకు కుట్రలో భాగమైనందుకు నిఖిల్ గుప్తా విచారం వ్యక్తం చేశారు.
వివరాలు
తన చర్యలపై విచారం వ్యక్తం చేసిన గుప్తా
అమెరికా ప్రాసిక్యూటర్ల కథనం ప్రకారం.. పన్నూన్ హత్య కోసం హిట్మ్యాన్ను నియమించేందుకు భారత ప్రభుత్వ ఉద్యోగి వికాస్ యాదవ్ నిఖిల్ గుప్తాను సంప్రదించారు.
భారత క్యాబినెట్ సెక్రటేరియట్లో పనిచేసిన వికాస్ యాదవ్.. నేరస్థులతో సంబంధాలున్న వ్యక్తిగా భావించిన ఒకరిని సంప్రదించాలని గుప్తాకు సూచించారు.
అయితే ఆ వ్యక్తి అమెరికా డ్రగ్ ఎన్ఫోర్స్మెంట్ అడ్మినిస్ట్రేషన్ (DEA)తో కలిసి పనిచేస్తున్న రహస్య సమాచార వనరుగా తేలాడు.
ఆ తర్వాత ఆ వ్యక్తి గుప్తాకు ఓ హిట్మ్యాన్ను పరిచయం చేశాడు. అయితే, అతను వాస్తవానికి DEAకు చెందిన అండర్కవర్ అధికారి. అమెరికా అధికారుల అభ్యర్థన మేరకు నిఖిల్ గుప్తాను 2023 జూన్ 30న చెక్ రిపబ్లిక్లోని ప్రాగ్లో అరెస్టు చేశారు.
అనంతరం 2024 జూన్లో అమెరికాకు అప్పగించారు.
వివరాలు
భారత ప్రభుత్వ స్పందన.. విచారణ కమిటీ ఏర్పాటు
ఈ కేసులో ఆరోపణలు ఎదుర్కొంటున్న వికాస్ యాదవ్ మాత్రం ఇంకా అమెరికా కస్టడీలోకి రాలేదు.
ఈ హత్య కుట్రలో భారత ప్రభుత్వ అధికారికి సంబంధం ఉందన్న ఆరోపణలపై భారత విదేశాంగ మంత్రిత్వ శాఖ (MEA) ఆందోళన వ్యక్తం చేసింది.
ఈ ఆరోపణలపై దర్యాప్తు చేసేందుకు విచారణ కమిటీని ఏర్పాటు చేసింది.
2025 జనవరిలో కేంద్ర హోంశాఖ వెల్లడించిన వివరాల ప్రకారం.. నేర సంబంధాలున్న వ్యక్తిపై చట్టపరమైన చర్యలు తీసుకోవాలని ఆ కమిటీ సిఫారసు చేసింది.
అయితే ఆ వ్యక్తి పేరును మంత్రిత్వ శాఖ వెల్లడించలేదు.
వివరాలు
భారత అధికారులపై పన్నూన్ సివిల్ దావా
మరోవైపు, భారత జాతీయ భద్రతా సలహాదారు అజిత్ డోభాల్, మాజీ రీసెర్చ్ అండ్ అనాలిసిస్ వింగ్ (RAW) చీఫ్ సామంత్ గోయెల్ సహా పలువురు భారత అధికారులపై పన్నూన్ సివిల్ దావా కూడా వేశారు.
అయితే ఈ ఆరోపణలను భారత్ నిరాధారమైనవిగా కొట్టిపారేసింది.