USA: ఉక్రెయిన్‌కు మిలిటరీ సాయాన్ని నిలిపివేస్తూ అగ్రరాజ్యం అమెరికా కీలక నిర్ణయం
ఈ వార్తాకథనం ఏంటి
అమెరికా అధ్యక్షుడు డొనాల్డ్‌ ట్రంప్ (Donald Trump), ఉక్రెయిన్‌ అధ్యక్షుడు వొలొదిమిర్ జెలెన్‌స్కీ (Volodymyr Zelenskyy) ఇటీవల మీడియా ఎదుట జరిపిన వాగ్వాదం గ్లోబల్ స్థాయిలో చర్చనీయాంశమైంది.
ఈ పరిణామాల నేపథ్యంలో, అగ్రరాజ్యం (అమెరికా) ఒక కీలకమైన నిర్ణయం తీసుకుంది.
రష్యా (Russia)తో జరుగుతున్న యుద్ధం నేపథ్యంలో కీవ్‌ (Ukraine)కు అందించే సైనిక సహాయాన్ని తాత్కాలికంగా నిలిపివేస్తున్నట్లు వైట్‌హౌస్‌ అధికారి వెల్లడించారు.
వివరాలు
మిలిటరీ సాయాన్ని నిలిపివేస్తున్నాం
"అధ్యక్షుడు ట్రంప్ ప్రధానంగా శాంతి స్థాపనపై దృష్టి సారించారు. మా భాగస్వాములు కూడా అదే లక్ష్యాన్ని పాటించాల్సిన అవసరం ఉంది. అందుకే మేము మా మిలిటరీ సాయాన్ని నిలిపివేస్తున్నాం. ఇది ఒక పరిష్కారం కోసం మార్గం చూపే ప్రయత్నమే" అని ఆయన తెలిపారు.
అయితే, ఇది పూర్తిగా సహాయాన్ని నిలిపివేయడం కాదని, శాంతి చర్చలపై ఒత్తిడి పెంచేందుకు మాత్రమే తీసుకున్న తాత్కాలిక నిర్ణయమని విశ్లేషకులు భావిస్తున్నారు.
వివరాలు
ట్రంప్,జె.డి. వాన్స్‌ అసహనం
రష్యా చేస్తున్న యుద్ధాన్ని ముగించేందుకు శాంతి ఒప్పందం కుదుర్చుకోవడం, ఆ ప్రతిఫలంగా ఉక్రెయిన్‌లోని అరుదైన ఖనిజాల తవ్వకానికి అనుమతి ఇవ్వడం అనే అమెరికా ప్రతిపాదనపై చర్చించేందుకు జెలెన్‌స్కీ గత వారం శ్వేతసౌధాన్ని (White House) సందర్శించారు.
భవిష్యత్తులో రష్యా తన దేశంపై దాడికి పాల్పడితే, అమెరికా భద్రత కల్పించాలని ఆయన విజ్ఞప్తి చేశారు.
అయితే, ఉక్రెయిన్‌ వైఖరిని చూసిన ట్రంప్, ఉపాధ్యక్షుడు జె.డి. వాన్స్‌ (J.D. Vance) అసహనం వ్యక్తం చేశారు.
"సాయం అందించిన దేశానికి కృతజ్ఞతలు చెప్పాల్సింది పోయి, అవమానం చేస్తున్నారని" వారు మీడియా ఎదుటే జెలెన్‌స్కీపై ఆగ్రహం వ్యక్తం చేశారు.
చర్చలు రసాభాసగా మారడంతో, ఖనిజాల ఒప్పందంపై సంతకం చేయకుండానే జెలెన్‌స్కీ శ్వేతసౌధాన్ని వీడిపోయారు.
వివరాలు
అమెరికా సహాయాన్ని ఎప్పుడూ మేము కృతజ్ఞతగా గుర్తుంచుకుంటాం
ఆపై, లండన్‌లో జరిగిన యూరోపియన్ దేశాధినేతల సమావేశం అనంతరం జెలెన్‌స్కీ మాట్లాడుతూ, "ఉక్రెయిన్‌ అగ్రరాజ్యంతో ఖనిజాల ఒప్పందానికి సిద్ధంగా ఉంది. అమెరికా సహాయాన్ని ఎప్పుడూ మేము కృతజ్ఞతగా గుర్తుంచుకుంటాం. త్వరలోనే ట్రంప్‌ను మరోసారి కలుస్తాను" అని ప్రకటించారు.
"రష్యాతో యుద్ధానికి ముగింపు ఇంకా దూరమే. అప్పటివరకు అమెరికా సహాయం కొనసాగుతుందని ఆశిస్తున్నాను" అని పేర్కొన్నారు.
ఈ నేపథ్యంలోనే, వాషింగ్టన్‌ ఉక్రెయిన్‌కు అందిస్తున్న మిలిటరీ సాయాన్ని తాత్కాలికంగా నిలిపివేయడం గమనార్హం.