Earthquake: పశ్చిమ జపాన్లో భూకంపం కలకలం.. 6.2 తీవ్రతతో వణికిన పలు నగరాలు
ఈ వార్తాకథనం ఏంటి
వెస్ట్రన్ జపాన్లో మంగళవారం ఉదయం భారీ భూకంపం సంభవించింది. రిక్టర్ స్కేలుపై దీని తీవ్రత 6.2గా నమోదైనట్లు జపాన్ వాతావరణ సంస్థ (JMA) అధికారికంగా వెల్లడించింది. నార్త్ వెస్ట్రన్ జపాన్లోని షిమనే ప్రిఫెక్చర్ కేంద్రంగా ఈ భూప్రకంపనలు చోటుచేసుకున్నట్లు తెలిపింది. అధికారుల వివరాల ప్రకారం, భూకంప కేంద్రం భూమి లోపల సుమారు 10 కిలోమీటర్ల లోతులో ఉన్నట్లు గుర్తించారు. షిమనే ప్రిఫెక్చర్ రాజధాని మాట్సుతో పాటు, పొరుగున ఉన్న టోటోరి ప్రిఫెక్చర్ పరిధిలోని పలు నగరాల్లో భూమి తీవ్రంగా కంపించింది. దీంతో ప్రజలు ఒక్కసారిగా భయాందోళనకు గురయ్యారు. అయితే ఈ భూకంపం కారణంగా సునామీ వచ్చే ప్రమాదం లేదని జపాన్ వాతావరణ సంస్థ స్పష్టం చేసింది.
Details
ప్రాణనష్టం సంభవించలేదు
అలాగే, ఈ భూప్రకంపనల వల్ల ప్రాణనష్టం లేదా ఆస్తి నష్టం సంభవించలేదని సంబంధిత అధికారులు వెల్లడించారు. భూకంపం నేపథ్యంలో షిమనే అణు విద్యుత్ ప్లాంట్తో పాటు పరిసర ప్రాంతాల్లోని ఇతర అణు కేంద్రాలను అణు నియంత్రణ అథారిటీ (NRA) పరిశీలించింది. పరిశీలన అనంతరం ఎక్కడా ఎలాంటి అసాధారణ పరిస్థితులు తలెత్తలేదని అథారిటీ స్పష్టం చేసింది. ప్రపంచంలోనే అత్యధికంగా భూకంపాలు సంభవించే 'పసిఫిక్ రింగ్ ఆఫ్ ఫైర్' ప్రాంతంలో జపాన్ ఉండటంతో, ఇక్కడ తరచుగా ఇలాంటి భూప్రకంపనలు చోటుచేసుకుంటుంటాయని నిపుణులు పేర్కొన్నారు. ప్రస్తుతం పరిస్థితి పూర్తిగా అదుపులోనే ఉందని, అయినప్పటికీ ప్రజలు అప్రమత్తంగా ఉండాలని అధికారులు సూచించారు.