White House: ఎలాన్ మస్క్ DOGE ఉద్యోగి కాదు.. ఎవరినీ తొలగించే అధికారం లేదు: వైట్ హౌస్
ఈ వార్తాకథనం ఏంటి
అమెరికా అధ్యక్షుడిగా రెండోసారి బాధ్యతలు చేపట్టిన డొనాల్డ్ ట్రంప్ (Donald Trump)... వివిధ శాఖల్లో ఉద్యోగాలను తగ్గిస్తున్న విషయం తెలిసిందే.
ఈ చర్యల కోసం తాత్కాలికంగా ఏర్పాటు చేసిన "డిపార్ట్‌మెంట్ ఆఫ్ గవర్నమెంట్ ఎఫీషియెన్సీ (DOGE)"లో ఎలాన్ మస్క్ కీలక పాత్ర పోషిస్తున్నారని వార్తలు వస్తున్నాయి.
అయితే, దీనిపై అమెరికా అధ్యక్ష కార్యాలయం (వైట్ హౌస్) స్పష్టతనిచ్చింది.
ఎలాన్ మస్క్ "డోజ్" ఉద్యోగి కాదని, అధ్యక్షుడికి కేవలం సలహాదారుడిగా మాత్రమే వ్యవహరిస్తున్నారని పేర్కొంది.
అలాగే, అతనికి ఎటువంటి అధికార నిర్ణయాలు తీసుకునే శక్తి లేదని స్పష్టం చేసింది.
వివరాలు
వైట్ హౌస్ వివరణ
"ఎలాన్ మస్క్ అమెరికా డోజ్ సర్వీస్ ఉద్యోగి కాదు. వైట్ హౌస్‌లోని ఇతర సీనియర్ సలహాదారుల మాదిరిగానే అతనికీ స్వతంత్రంగా ప్రభుత్వ నిర్ణయాలు తీసుకునే హక్కు లేదు" అని కోర్టు ఫైలింగ్‌లో వైట్ హౌస్ వ్యవహారాల డైరెక్టర్ జోషువా ఫిషర్ వెల్లడించారు.
న్యూ మెక్సికో రాష్ట్ర ప్రభుత్వం ఎలాన్ మస్క్ నిర్ణయాలను వ్యతిరేకిస్తూ దాఖలు చేసిన ఓ కేసు నేపథ్యంలో వైట్ హౌస్ ఈ వివరణ ఇచ్చింది.
డొనాల్డ్ ట్రంప్ అధ్యక్ష బాధ్యతలు చేపట్టిన తర్వాత, ప్రభుత్వ వ్యయాలను తగ్గించడం,వ్యవస్థను మరింత సమర్థవంతం చేయడమే లక్ష్యంగా DOGEను ఏర్పాటు చేశారు.
ఈ సంస్థకు ఎలాన్ మస్క్‌ను నేతగా నియమించారు. ట్రంప్ ప్రకారం,DOGE ప్రభుత్వ శాఖల్లో వృథా ఖర్చులను తగ్గించేందుకు కృషి చేస్తుంది.
వివరాలు
వివిధ శాఖల్లో వేలాది మంది ఉద్యోగులను తొలగించే చర్యలు
అందులో భాగంగా, వివిధ శాఖల్లో వేలాది మంది ఉద్యోగులను తొలగించే చర్యలు కొనసాగుతున్నాయి.
దీని కారణంగా, ఎలాన్ మస్క్ ట్రంప్ ప్రభుత్వాన్ని పరోక్షంగా నడిపిస్తున్నారని విమర్శలు వస్తున్నాయి.
ఈ నేపథ్యంలో, డోజ్ గురించి అధ్యక్షుడు ట్రంప్ తాజాగా కీలక నిర్ణయం తీసుకున్నారు.
ఇకపై ఫెడరల్ ఏజెన్సీలు DOGEతో సంప్రదింపులు చేసిన తర్వాతే ఉద్యోగుల నియామకాలు, తొలగింపులు చేయాలని నిర్దేశిస్తూ ఉత్తర్వులు జారీ చేశారు.
ప్రతి ఏజెన్సీ ఉద్యోగుల తగ్గింపుకు ప్రణాళికలు రూపొందించాలని, అవసరమైనప్పుడు మాత్రమే నియామకాలు చేపట్టాలని సూచించారు.
DOGE పనితీరును ట్రంప్ ప్రశంసించడంతో పాటు, వ్యతిరేక దావాలను పట్టించుకోకుండా ముందుకు సాగాలని ఎలాన్ మస్క్‌కు సూచించారు.