పాకిస్థాన్ మాజీ ప్రధాని ఇమ్రాన్ ఖాన్ అరెస్ట్
అవినీతి కేసులో పాకిస్థాన్ మాజీ ప్రధాని, పాకిస్థాన్ తెహ్రీక్-ఏ-ఇన్సాఫ్ (పీటీఐ) చీఫ్ ఇమ్రాన్ ఖాన్‌ను పారామిలటరీ ఫోర్స్ మంగళవారం అరెస్టు చేసింది. అవినీతి కేసులో ఇమ్రాన్‌ఖాన్‌ను ఇస్లామాబాద్‌లోని కోర్టు ప్రాంగణంలో అదుపులోకి తీసుకున్నారు. పాకిస్థాన్‌లోని హైకోర్టు వెలుపల ఇమ్రాన్ ఖాన్‌ను నాటకీయంగా అరెస్టు చేసిన వీడియో సోషల్ మీడియాలో వైరల్ అవుతోంది. ఖాదిర్ ట్రస్ట్ కేసులో ఇమ్రాన్ ఖాన్‌ను అరెస్టు చేశారని ఇస్లామాబాద్ పోలీసు అధికారిక ట్విట్టర్ ఖాతాలో పేర్కొంది. ఇమ్రాన్ ఖాన్ అరెస్టుపై పీటీఐ నాయకులు ఆగ్రహం వ్యక్తం చేస్తున్నారు. అధికారులు ఇమ్రాన్ ఖాన్‌ను హింసిస్తున్నారని ఆరోపించారు. ఇమ్రాన్ ఖాన్‌ను కోర్టు నుంచి బయటకు లాగి పోలీసు వాహనంలోకి ఎక్కించారని కూడా పీటీఐ నేత చెప్పారు.
