Uganda Army Chief: తుర్కియేపై ఉగాండా సేనాధిపతి సంచలన డిమాండ్లు.. ప్రపంచవ్యాప్తంగా చర్చ
ఈ వార్తాకథనం ఏంటి
ఉగాండా రక్షణ దళాల అధిపతి, దేశాధ్యక్షుడు యోవేరి ముసెవెని కుమారుడు ముహూజీ కైనెరుగబా తుర్కియే ముందు కొన్ని సంచలన, విచిత్రమైన డిమాండ్లను ఉంచారు. అవి అంతర్జాతీయంగా చర్చకు దారితీశాయి. తుర్కియే తమకు 1 బిలియన్ డాలర్లు చెల్లించాలని, అదనంగా ఆ దేశంలో అత్యంత అందమైన యువతితో తనకు వివాహం చేయాలని కోరుతూ ఆయన చేసిన వ్యాఖ్యలు వివాదానికి కేంద్రబిందువయ్యాయి. ఈ డిమాండ్లను 30 రోజుల్లోగా అమలు చేయకపోతే ఉగాండాలో ఉన్న తుర్కియే రాయబార కార్యాలయాన్ని మూసివేస్తామని తీవ్ర హెచ్చరిక జారీ చేశారు. సోమాలియాలో మౌలిక సదుపాయాలు, వ్యాపార ప్రాజెక్టుల ద్వారా తుర్కియే భారీ లాభాలు పొందుతోందని, అయితే భద్రతా బాధ్యతలను మాత్రం ఉగాండానే మోస్తోందని కైనెరుగబా ఆరోపించారు.
వివరాలు
సెక్యూరిటీ డివిడెండ్' కింద 1 బిలియన్ డాలర్లు
గత రెండు దశాబ్దాలుగా ఆఫ్రికన్ యూనియన్ మిషన్లలో భాగంగా ఉగాండా సైన్యం సోమాలియాలో అల్-షబాబ్ ఉగ్రవాద సంస్థపై పోరాటం సాగిస్తోందని ఆయన గుర్తుచేశారు. ఈ భద్రతా సేవలకు ప్రతిఫలంగా తుర్కియే తమకు 'సెక్యూరిటీ డివిడెండ్' కింద 1 బిలియన్ డాలర్లు చెల్లించాల్సిందేనని ఆయన స్పష్టం చేశారు. తుర్కియేకు ఇది సులభమైన ఒప్పందమని, తమకు డబ్బు చెల్లించకపోతే ఉగాండాలోని వారి రాయబార కార్యాలయాన్ని మూసివేస్తామని ఆయన వెల్లడించారు. అవసరమైతే తుర్కియేలోని ఉగాండా రాయబార కార్యాలయాన్ని కూడా మూసివేయొచ్చని, అందులో తమకు ఎలాంటి అభ్యంతరం లేదన్నారు. ఇది సామాజిక మాధ్యమాల్లో సరదాగా చేసిన వ్యాఖ్య కాదని, అవసరమైతే తుర్కియేతో దౌత్య సంబంధాలను తెంచుకునే పరిస్థితి వస్తుందని హెచ్చరించారు.
వివరాలు
వెన్నుపోటు పొడిచే మిత్రుడు ఎవరికి అవసరం?
"వెన్నుపోటు పొడిచే మిత్రుడు ఎవరికి అవసరం?" అంటూ ప్రశ్నించారు. భద్రతా కారణాల దృష్ట్యా ఉగాండా ప్రజలు తుర్కియేకు వెళ్లకుండా ఉండాలని సూచించారు. ఇదే సమయంలో ఇజ్రాయెల్కు మద్దతుగా మరో వివాదాస్పద ప్రకటన చేశారు. "దేవుడైన జీసస్ క్రైస్ట్ పవిత్ర భూమిని రక్షించడానికి, నా నాయకత్వంలో లక్ష మంది ఉగాండా సైనికులను ఇజ్రాయెల్కు పంపేందుకు సిద్ధంగా ఉన్నాను" అని వెల్లడించారు. కైనెరుగబా ఇలాంటి వ్యాఖ్యలు చేయడం ఇదే తొలిసారి కాదు. 2022 అక్టోబర్లో ఇటలీ ప్రధానమంత్రి జార్జియా మెలోనీను వివాహం చేసుకునేందుకు ప్రతిఫలంగా 'ప్రపంచంలో అత్యంత అందమైనవి'గా పేర్కొన్న 100 అంకోలే ఆవులను ఇస్తానని ప్రకటించి అప్పట్లో కూడా వార్తల్లో నిలిచారు.