Trump: 'అయన చాల పెద్ద తప్పు చేసాడు': రహస్యా సమాచారం బహిర్గతం చేశారని ఒబామాపై ట్రంప్ విమర్శ
ఈ వార్తాకథనం ఏంటి
అమెరికా మాజీ అధ్యక్షుడు బరాక్ ఒబామా(Barack Obama) పై ప్రస్తుత అధ్యక్షుడు డొనాల్డ్ ట్రంప్ (Donald Trump) సంచలన ఆరోపణలు చేశారు. అత్యంత గోప్యంగా ఉంచాల్సిన వర్గీకృత సమాచారాన్ని ఒబామా బయటపెట్టారని ట్రంప్ ఆరోపించారు. గ్రహాంతరవాసులు నిజంగా ఉన్నారని ఒబామా ఇటీవల చేసిన వ్యాఖ్యల నేపథ్యంలో ట్రంప్ ఈ విమర్శలు చేశారు. ఎయిర్ ఫోర్స్ వన్ విమానంలో ప్రయాణిస్తున్న సమయంలో ట్రంప్ను ఫాక్స్ న్యూస్ ప్రతినిధి ప్రశ్నించారు. "బరాక్ ఒబామా గ్రహాంతరవాసులు నిజమని చెప్పారు. భూమిని వారు సందర్శించినట్లు మీకు ఎలాంటి ఆధారాలు కనిపించాయా?" అని అడిగారు.
వివరాలు
తన వ్యాఖ్యలపై వివరణ ఇచ్చుకున్న ఒబామా
దీనికి స్పందించిన ట్రంప్, "ఆయన గోప్యమైన సమాచారాన్ని బయటపెట్టారు. అలా చేయడం సరికాదు. ఇది చాలా పెద్ద పొరపాటు" అని వ్యాఖ్యానించారు. గ్రహాంతరవాసులు ఉన్నారా? లేరా? అనే ప్రశ్నను మళ్లీ మళ్లీ అడగగా, "వారు నిజమో కాదో నాకు స్పష్టంగా తెలియదు. కానీ రహస్య సమాచారాన్ని ఆయన వెల్లడించారనే విషయం మాత్రం నేను చెప్పగలను" అని తెలిపారు. ఇటీవల ఒక పాడ్కాస్ట్ ఇంటర్వ్యూలో ఒబామా మాట్లాడుతూ, "గ్రహాంతరవాసులు ఉన్నారని నేను నమ్ముతున్నాను. అయితే నేను వారిని స్వయంగా చూడలేదు. అలాగే వారిని ఏరియా 51లో దాచిపెట్టలేదు" అని సరదాగా వ్యాఖ్యానించారు. ఈ వ్యాఖ్యలు వివాదానికి దారితీయడంతో ఆయన సామాజిక మాధ్యమాల ద్వారా వివరణ ఇచ్చారు.
వివరాలు
గణాంకాల ప్రకారం ఎక్కడో ఒకచోట జీవం ఉండే అవకాశాలు
"ఈ విశ్వం అపారమైనది. గణాంకాల ప్రకారం ఎక్కడో ఒకచోట జీవం ఉండే అవకాశాలు ఉన్నాయి. కానీ సౌర వ్యవస్థల మధ్య దూరం చాలా ఎక్కువగా ఉంటుంది. నా అధ్యక్ష పదవిలో ఉన్న సమయంలో గ్రహాంతరవాసులు మనతో సంప్రదించారనే ఎలాంటి ఆధారాలు నాకు కనిపించలేదు" అని స్పష్టం చేశారు. ఇదిలా ఉండగా, ట్రంప్ గతంలో కూడా గ్రహాంతరవాసులు, గుర్తుతెలియని ఎగిరే వస్తువులు (యూఎఫ్వోలు) గురించి పలుమార్లు మాట్లాడారు. వాటిపై తనకు ప్రత్యేక నమ్మకం లేదని, అయితే ప్రపంచంలో ఏదైనా జరిగే అవకాశం ఉంటుందని ఆయన అప్పట్లో వ్యాఖ్యానించిన విషయం తెలిసిందే.