Indian Embassy: బ్లాక్‌ సీ డ్రోన్‌ దాడి.. భారతీయ నావికుడి పరిస్థితిపై రాయబార కార్యాలయం స్పందన
ఈ వార్తాకథనం ఏంటి
బ్లాక్‌ సీలో టర్కీకి చెందిన కార్గో నౌక 'ఎంవీ రోయాద్‌ మమ్మదోవ్‌'పై రష్యా డ్రోన్లు దాడి చేశాయి. ఈ ఘటనలో కనీసం ఇద్దరు మృతి చెందగా.. పలువురు సిబ్బంది గాయపడినట్లు సమాచారం. గాయపడిన వారిలో ఓ భారతీయ నావికుడు కూడా ఉన్నారు. రొమేనియాలోని భారత రాయబార కార్యాలయం ఈ విషయాన్ని ధ్రువీకరించింది. గాయపడిన భారతీయుడు ప్రస్తుతం సురక్షితంగా ఉన్నాడని, వైద్య చికిత్స పొందుతున్నట్లు తెలిపింది. బ్లాక్‌ సీలో వాణిజ్య నౌక 'ఎంవీ రోయాద్‌ మమ్మదోవ్‌'పై ఈ రోజు దాడి జరిగినట్లు తమకు సమాచారం అందిందని రాయబార కార్యాలయం పేర్కొంది.
వివరాలు
ఉక్రెయిన్‌ అధ్యక్షుడి ధ్రువీకరణ.. కెప్టెన్‌ మృతి
ఈ దాడిని ఉక్రెయిన్‌ అధ్యక్షుడు వొలోదిమిర్‌ జెలెన్‌స్కీ ధ్రువీకరించారు. ఈ ఘటనలో నౌక కెప్టెన్‌ మృతి చెందినట్లు తెలిపారు.
తటస్థ జలాల్లో మొక్కజొన్నను తరలిస్తున్న టర్కీకి చెందిన పౌర నౌకపై రష్యాకు చెందిన రెండు డ్రోన్లు భయానకంగా దాడి చేశాయని ఆయన పేర్కొన్నారు.
రష్యా-ఉక్రెయిన్‌ యుద్ధం నేపథ్యంలో ఉద్రిక్తతలు కొనసాగుతున్న వేళ బ్లాక్‌ సీలో వాణిజ్య నౌకల రాకపోకలకు ఉన్న ముప్పును ఈ ఘటన మరోసారి స్పష్టం చేసింది.
వివరాలు
దాడితో భారతీయుల భద్రతపై ఆందోళనలు
మాస్కో, కీవ్‌తో దౌత్య సంబంధాలను భారత్ మరింత విస్తరిస్తున్న సమయంలో ఈ ఘటన చోటుచేసుకుంది.
రష్యా-ఉక్రెయిన్‌ యుద్ధానికి ముగింపు పలికేందుకు చర్చలు, దౌత్యపరమైన ప్రయత్నాలకు భారత్ కట్టుబడి ఉందని విదేశాంగ మంత్రి ఎస్‌. జైశంకర్‌ తెలిపారు.
బ్లాక్‌ సీ ప్రాంతంలో జరిగిన తాజా దాడితో అక్కడి భారతీయులు, భారత వాణిజ్య ప్రయోజనాల భద్రతపై మరోసారి ఆందోళనలు వ్యక్తమవుతున్నాయి.
వివరాలు
వాణిజ్య నౌకల భద్రత కోసం అంతర్జాతీయ కూటమిలో భారత్
సముద్ర భద్రతకు మరింత ప్రాధాన్యం ఇవ్వాల్సిన అవసరం ఉందని జైశంకర్‌ పేర్కొన్నారు.
వాణిజ్య నౌకల రాకపోకలకు రక్షణ కల్పించేందుకు లైబీరియాతో పాటు మరో 23 భాగస్వామ్య దేశాలు ఉన్న అంతర్జాతీయ కూటమిలో భారత్ చేరిందని తెలిపారు.
సముద్ర ప్రాంతాల్లో కొత్త సవాళ్లు తలెత్తడంతో.. ఇప్పటికే భూభాగంలో ఉన్న సవాళ్లకు అవి మరింతగా తోడయ్యాయని జైశంకర్‌ అన్నారు.
వివిధ సముద్ర మార్గాల్లో వాణిజ్య నౌకలు, నావికులకు ఎదురవుతున్న ముప్పుపై ప్రపంచవ్యాప్తంగా అవగాహన కల్పించడం, వాటి భద్రతకు చర్యలు తీసుకోవడం ఈ కూటమి లక్ష్యంగా ఉంది.