US-Iran: అణు ఒప్పందంపై ట్రంప్ హెచ్చరికలు.. క్షిపణులతో ప్రతీకారం తీర్చుకోవడానికి ఇరాన్ సిద్ధం..!
ఈ వార్తాకథనం ఏంటి
అణ్వాయుధాల అభివృద్ధి విషయంలో ఇరాన్-అమెరికా (US-Iran) మధ్య మళ్లీ ఉద్రిక్తతలు పెరిగిపోయాయి. అణు ఒప్పందానికి సంబంధించి, అమెరికా అధ్యక్షుడు డొనాల్డ్‌ ట్రంప్ (Donald Trump) టెహ్రాన్‌కు తీవ్ర హెచ్చరికలు జారీ చేశారు. ఒప్పందం కుదరకపోతే, ఇరాన్‌పై బాంబు దాడులకు వెనుకాడబోమని ఆయన స్పష్టం చేశారు. ఈ నేపథ్యంలో అప్రమత్తమైన టెహ్రాన్.. తన క్షిపణి వ్యవస్థలను సిద్ధం చేసిందని సమాచారం. స్థానిక మీడియా నివేదికల ప్రకారం, టెహ్రాన్ రక్షణ వ్యూహాన్ని పునఃపరిశీలించినట్లు తెలుస్తోంది.
వివరాలు
ఇరాన్‌లో భూగర్భ ప్రయోగ కేంద్రాల వద్ద క్షిపణుల సిద్ధత
ఇరాన్ వ్యాప్తంగా ఉన్న భూగర్భ ప్రయోగ కేంద్రాల వద్ద భారీ సంఖ్యలో క్షిపణులను లాంచ్‌ప్యాడ్‌లపై సిద్ధంగా ఉంచినట్లు టెహ్రాన్ టైమ్స్ నివేదించింది. అవసరమైన సమయంలో ఇవి వైమానిక దాడుల కోసం ప్రయోగించే అవకాశముందని పేర్కొంది. అత్యవసర పరిస్థితులలో, అమెరికా సంబంధిత ప్రాంతాలపై దాడులు చేసేందుకు ఈ క్షిపణులను వినియోగించే ప్రణాళిక ఉందని నివేదికలు తెలియజేశాయి.
వివరాలు
అణు ఒప్పందంపై చర్చల అభిప్రాయభేదాలు
అణు ఒప్పందంపై అమెరికా చేసిన ప్రత్యక్ష చర్చల ఆహ్వానాన్ని తిరస్కరించినట్లు ఇరాన్ అధ్యక్షుడు మసూద్‌ పెజెష్కియాన్‌ తెలిపారు. అయితే, పరోక్షంగా చర్చలు జరిపేందుకు తాము సిద్ధంగా ఉన్నామని ప్రకటించారు. దీనిపై ట్రంప్ ఓ మీడియా ఇంటర్వ్యూలో మాట్లాడుతూ, టెహ్రాన్‌కు గట్టి హెచ్చరికలు చేశారు. ''ఇరాన్ అణు ఒప్పందాన్ని అంగీకరించకపోతే, తీవ్ర పరిణామాలను ఎదుర్కొనాల్సి వస్తుంది. ఇలాంటి బాంబు దాడులు ఆ దేశం ఇప్పటివరకు చూడనే లేదు. అదనంగా, మరింత కఠిన ఆంక్షలు ఎదుర్కోవాల్సి వస్తుంది,'' అని ఆయన హెచ్చరించారు. అయితే, ఇరాన్‌తో పరోక్ష చర్చలకు అంగీకరిస్తారా? లేదా? అనే దానిపై ట్రంప్ స్పష్టమైన ప్రకటన చేయలేదు.
వివరాలు
2018 నుంచి కొనసాగుతున్న ఉద్రిక్తతలు
ట్రంప్ అధ్యక్ష హయాంలోనే 2018లో అమెరికా అణు ఒప్పందం నుంచి తప్పుకుంది. అదే సమయంలో, టెహ్రాన్‌పై ఆంక్షలు విధించడంతో రెండు దేశాల మధ్య సంబంధాలు మరింత క్షీణించాయి. అనేక సంవత్సరాలుగా పరోక్ష చర్చలు ఫలించకపోవడంతో, ఇటీవల ట్రంప్ మళ్లీ అణు ఒప్పందంపై ఆసక్తి వ్యక్తం చేశారు. కానీ, ఇరాన్ వైఖరి యథాతథంగా కొనసాగుతుండటం ఉద్రిక్తతలను మరింత పెంచే అవకాశం ఉన్నట్లు విశ్లేషకులు భావిస్తున్నారు.