Iran Israel War: ఇరాన్ 'దోమల దండు'పై అమెరికా ఆందోళన
ఈ వార్తాకథనం ఏంటి
అమెరికాకు సవాల్ విసురుతూ ఇరాన్ సముద్ర వ్యూహాలను మరింత బలపరుస్తోంది. ప్రపంచ చమురు సరఫరాకు అత్యంత కీలకమైన హర్మూజ్ జలసంధిపై ఆధిపత్యం సాధించేందుకు ఇరాన్ ప్రత్యేక నౌకాదళాన్ని సిద్ధం చేసినట్లు సమాచారం. ఈ ప్రాంతంలో ఉద్రిక్తతలు పెరుగుతున్న నేపథ్యంలో అమెరికా మూడు భారీ యుద్ధ విమాన వాహక నౌకలను గల్ఫ్ ప్రాంతానికి పంపింది. అయినప్పటికీ అవి హర్మూజ్ జలసంధి వైపు పూర్తిగా చేరేందుకు ఇంకా జాగ్రత్తగా వ్యవహరిస్తున్నాయని విశ్లేషకులు చెబుతున్నారు. మరోవైపు ఇరాన్కు చెందిన విప్లవ రక్షక దళాల నౌకాదళం, అమెరికా నౌకలు వచ్చినా ఎదుర్కొనేందుకు తాము సిద్ధంగా ఉన్నామని ప్రకటించింది.
వివరాలు
ఏమిటి 'మస్కిటో ఫ్లీట్' వ్యూహం?
ఇరాన్ నౌకాదళం ఉపయోగిస్తున్న చిన్నపాటి వేగవంతమైన పడవలను 'మస్కిటో ఫ్లీట్' అని పిలుస్తారు. ఇవి పరిమాణంలో చిన్నవైనా సముద్ర యుద్ధ వ్యూహాల్లో కీలక పాత్ర పోషిస్తాయి. 10 టన్నుల బరువుతో ఉండే ఈ ఫాస్ట్ బోట్లలో 1,500 వరకు ఇరాన్ వద్ద ఉన్నట్లు అంచనా. రెండో ప్రపంచ యుద్ధ కాలంలో వాడిన పీటీ బోట్ల వ్యూహాలను ఆధునిక యాంటీ-షిప్ క్షిపణులతో మిళితం చేసి ఇరాన్ ఈ బోట్లను వినియోగిస్తోంది. ఈ బోట్లపై నాసర్, కౌసర్ వంటి షార్ట్ రేంజ్ గైడెడ్ క్షిపణులను అమర్చినట్లు సమాచారం. అలాగే ఘదెర్, జాఫర్, అబు మహదీ వంటి క్షిపణులు కూడా సిద్ధంగా ఉన్నాయి. అవసరమైతే సముద్రంలో స్మార్ట్ మైన్స్ అమర్చే సామర్థ్యం కూడా ఈ బోట్లకు ఉంది.
వివరాలు
భారీ నౌకలకు సవాల్గా చిన్న పడవలు
ఈ ఫాస్ట్ బోట్స్ గంటకు 50 నుంచి 110 నాట్స్ వేగంతో కదలగలవు. గుంపులుగా దాడి చేస్తే భారీ యుద్ధ నౌకల టార్గెటింగ్ వ్యవస్థలు కూడా కష్టాలను ఎదుర్కొంటాయి. ముఖ్యంగా హర్మూజ్ జలసంధి ఇరుకుగా ఉండటం వల్ల పెద్ద నౌకలు వేగంగా దిశ మార్చుకోవడం కష్టమవుతుంది. దీంతో చిన్న బోట్ల దాడులకు అవి సులభంగా లక్ష్యాలయ్యే అవకాశం ఉంటుంది.
వివరాలు
డ్రోన్ బోట్లతో కొత్త ముప్పు
ఇరాన్ తయారు చేసిన చిన్న డ్రోన్ బోట్ల వల్ల చమురు ట్యాంకర్లకు కొత్త ప్రమాదం ఏర్పడింది. గతంలో కొన్ని ట్యాంకర్లపై జరిగిన దాడుల్లో ఇవి ఉపయోగించబడ్డాయని అనుమానాలు ఉన్నాయి. ఇటీవల విడుదల చేసిన వీడియోల్లో భూగర్భ స్థావరాల్లో పెద్ద సంఖ్యలో డ్రోన్ బోట్లను ఇరాన్ నిల్వ ఉంచినట్లు కనిపించింది. ఇరాన్కు మద్దతుగా పనిచేస్తున్న యెమెన్ కూడా ఇలాంటి డ్రోన్ బోట్లను ఉపయోగించినట్లు నివేదికలు చెబుతున్నాయి. ఫైబర్ గ్లాస్ లేదా చెక్కతో తయారైన చిన్న పడవలను మానవ రహిత బోట్లుగా మార్చి దాడులకు వినియోగిస్తున్నారు.