Netanyahu : నెతన్యాహూకు ఎదురుదెబ్బ తప్పదా?.. తాజా సర్వేల్లో ప్రతిపక్షం దూకుడు
ఈ వార్తాకథనం ఏంటి
పశ్చిమాసియాలో ప్రస్తుతం కొనసాగుతున్న తీవ్ర ఉద్రిక్త పరిస్థితులు, యుద్ధ పరిణామాల్లో ఇజ్రాయెల్ ప్రధాని బెంజమిన్ నెతన్యాహూ పాత్ర గురించి ప్రత్యేకంగా చెప్పాల్సిన అవసరం లేదు. ఇరాన్పై సైనిక చర్యకు, ఆ దేశ అత్యున్నత నాయకుడు ఆయతుల్లా అలీ ఖమేనీని హతమార్చే ప్రయత్నాలకు అమెరికాను నెతన్యాహూ ప్రోత్సహించారనే ఆరోపణలు కూడా ఉన్నాయి. ఇజ్రాయెల్ భద్రతను కాపాడుతానంటూ భారీ స్థాయిలో సైనిక చర్యలకు దిగిన నెతన్యాహూకు ఇప్పుడు సొంత దేశ ప్రజల నుంచే వ్యతిరేకత పెరుగుతున్న సంకేతాలు కనిపిస్తున్నాయి. తాజాగా వెలువడిన ఎన్నికల సర్వేలు ఈ విషయాన్ని స్పష్టం చేస్తున్నాయి.
వివరాలు
లికుడ్ పార్టీ 21 స్థానాలకే పరిమితం..
ఇజ్రాయెల్ పార్లమెంట్ అయిన నెస్సెట్కు ఈ ఏడాది అక్టోబర్ 27న ఎన్నికలు జరగనున్నాయి.
అయితే ఈ ఎన్నికల్లో నెతన్యాహూ నేతృత్వంలోని కూటమి మరోసారి అధికారాన్ని నిలబెట్టుకోవడం అంత సులభం కాదని తాజా అంచనాలు సూచిస్తున్నాయి.
మాజీ ఆర్మీ చీఫ్ గాడి ఐజన్కోట్ నాయకత్వంలోని ప్రతిపక్ష 'యషార్' పార్టీ నెతన్యాహూ నేతృత్వంలోని లికుడ్కు గట్టి పోటీ ఇస్తున్నట్లు సర్వేలు చెబుతున్నాయి.
తాజా సర్వే అంచనాల ప్రకారం.. 'యషార్' పార్టీకి 25 నెస్సెట్ స్థానాలు దక్కే అవకాశం ఉంది.
మరోవైపు నెతన్యాహూకు చెందిన లికుడ్ పార్టీ 21 స్థానాలకే పరిమితం కావచ్చని సర్వే పేర్కొంది.
అంటే రెండు పార్టీల మధ్య నాలుగు స్థానాల వ్యత్యాసం ఏర్పడే అవకాశం కనిపిస్తోంది.
వివరాలు
నెస్సెట్లో మొత్తం 120 స్థానాలు..
గత కొన్ని వారాల్లో నిర్వహించిన పలు సర్వేల్లో ఈ రెండు పార్టీల మధ్య పోటీ చాలా స్వల్పంగానే ఉండేది.
ఒక సర్వేలో ఒకటి, మరో సర్వేలో రెండు స్థానాల తేడా మాత్రమే కనిపించింది.
అయితే తాజా సర్వేలో మాత్రం 'యషార్' పార్టీ ఏకంగా నాలుగు స్థానాల ఆధిక్యంలోకి దూసుకెళ్లడం రాజకీయ వర్గాల్లో ప్రాధాన్యం సంతరించుకుంది.
ఇజ్రాయెల్ నెస్సెట్లో మొత్తం 120 స్థానాలు ఉన్నాయి. ప్రభుత్వాన్ని ఏర్పాటు చేయాలంటే కనీసం 61 మంది ఎంపీల మద్దతు అవసరం.
తాజా సర్వేలో 'యషార్' అతిపెద్ద పార్టీగా అవతరించే అవకాశాలు కనిపిస్తున్నప్పటికీ.. ఆ పార్టీకి ఒంటరిగా ప్రభుత్వం ఏర్పాటు చేసేంత బలం మాత్రం ఉండదు.
వివరాలు
ఇజ్రాయెల్ రాజకీయాలపై చర్చ..
ఇక ఇజ్రాయెల్ ఎన్నికల విధానం కూడా ప్రత్యేకంగా ఉంటుంది. అక్కడి ప్రజలు ప్రధానమంత్రిని నేరుగా ఎన్నుకోరు.
ఎన్నికల్లో ఓటర్లు వ్యక్తులకు కాకుండా రాజకీయ పార్టీలకు ఓటు వేస్తారు.
నెస్సెట్లో వివిధ పార్టీలకు లభించిన స్థానాల ఆధారంగా ప్రభుత్వం ఏర్పాటయ్యే విధానం ఉంటుంది.
ఈ నేపథ్యంలో అక్టోబర్ 27న జరగనున్న నెస్సెట్ ఎన్నికలు నెతన్యాహూ రాజకీయ భవిష్యత్తును నిర్ణయించడంలో కీలకంగా మారనున్నాయి.
తాజా సర్వేలు ప్రతిపక్షానికి ఊపునిస్తున్నప్పటికీ.. చివరికి ఏ కూటమి 61 స్థానాల మద్దతును కూడగడుతుందనేదే ఇజ్రాయెల్ రాజకీయాల్లో అసలు ప్రశ్నగా మారింది.