Isreal wild fire: ఇజ్రాయెల్‌లో కార్చిచ్చు బీభత్సం.. జెరూసలెం శివారులోని అడవుల్లో భారీగా మంటలు
ఈ వార్తాకథనం ఏంటి
ఇజ్రాయెల్‌లో ఘోరమైన అగ్నిప్రమాదం సంభవించింది. జెరూసలెం శివారులోని అరణ్య ప్రాంతాల్లో భారీగా మంటలు చెలరేగాయి.
ఈ మంటల కారణంగా నగరాన్ని పొగ ముసిరిపోయింది. పరిస్థితి మరింత విషమించడంతో, అధికారులు దేశవ్యాప్తంగా అత్యవసర పరిస్థితిని ప్రకటించారు.
గత 24 గంటల్లో వేలాది మంది ప్రజలను అధికారులు సురక్షిత ప్రాంతాలకు తరలించాల్సి వచ్చింది.
ఇది దేశ చరిత్రలోనే అత్యంత భారీ అగ్నిప్రమాదాలలో ఒకటిగా అధికార వర్గాలు పేర్కొన్నాయి.
ఈ కార్చిచ్చులో ఇప్పటివరకు 13 మంది గాయపడినట్లు సమాచారం.
అయితే ప్రాణహానిపై స్పష్టమైన సమాచారం ఇంకా అందుబాటులోకి రాలేదు.
ఈ ఘోరమైన ఘటనకు సంబంధించిన దృశ్యాలు ప్రస్తుతం సోషల్ మీడియా వేదికలపై విస్తృతంగా వైరల్ అవుతున్నాయి.
వివరాలు
జాతీయ అత్యవసర పరిస్థితి
వాతావరణ పరిస్థితులు కూడా ఈ అగ్ని వ్యాప్తికి అనుకూలంగా మారాయి. వర్షాభావ పరిస్థితులు, అలాగే గాలుల వేగం ఎక్కువగా ఉండటంతో మంటలు వేగంగా పక్కా పక్కా ప్రాంతాలకు వ్యాపిస్తున్నాయి.
ఈ మంటలు జెరూసలెం నగరానికి చేరే ప్రమాదం ఉందని ప్రధాని బెంజమిన్ నెతన్యాహు హెచ్చరించారు.
ఈ పరిణామాన్ని ఆయన "జాతీయ అత్యవసర పరిస్థితి"గా పేర్కొన్నారు. జెరూసలెంను రక్షించడమే ప్రస్తుత ప్రభుత్వ ప్రాధాన్యమని ప్రకటించారు.
ఈ తరుణంలో టెల్ అవీవ్, జెరూసలెం నగరాలను కలిపే ప్రధాన రహదారిని తాత్కాలికంగా మూసివేశారు.
పొగ సాంద్రత అధికంగా ఉండటంతో రహదారులు స్పష్టంగా కనిపించకపోవడమే కాక, కొన్ని చోట్ల మంటలు రోడ్లను చుట్టుముట్టాయి.
దీంతో ప్రయాణికులు తమ వాహనాలను వదిలిపెట్టి పరుగులు పెట్టిన ఘటనలు నమోదయ్యాయి.
వివరాలు
సహాయ చర్యలతో పాటు అత్యవసర వైద్య సేవలు కూడా అందుబాటులోకి..
ఈ పరిస్థితిని అదుపులోకి తీసుకురావడానికి సైన్యాన్ని రంగంలోకి దింపారు.
సహాయ చర్యలతో పాటు అత్యవసర వైద్య సేవలు కూడా అందుబాటులోకి తీసుకువచ్చారు.
ఇప్పటివరకు 23 మందికి వైద్య సహాయం అందించగా, అందులో 13 మంది కాలిన గాయాలతో చికిత్స పొందుతున్నారని అధికారులు వెల్లడించారు.