Sharjah: షార్జాలో కర్ణాటక వ్యక్తి హత్య.. కారులో ముక్కలుగా చేసిన మృతదేహం
ఈ వార్తాకథనం ఏంటి
యునైటెడ్ అరబ్ ఎమిరేట్స్లోని షార్జాలో కర్ణాటకకు చెందిన భారతీయుడు హత్యకు గురైన ఘటన కలకలం రేపుతోంది. ఉడుపి జిల్లాకు చెందిన అల్విన్ ప్రకాశ్ కుందర్ మృతదేహాన్ని ముక్కలుగా చేసి రెండు సంచుల్లో ఉంచి, కారులో తరలించినట్లు కుటుంబ సభ్యులు తెలిపారు. మరోవైపు.. ఆయన హత్య జరిగినట్లు అనుమానిస్తున్న సమయం నుంచి భార్య టీనా, కుమారుడు కనిపించకుండా పోవడం మరింత అనుమానాలకు తావిస్తోంది.
వివరాలు
జులైలోనే హత్య జరిగినట్లు అనుమానం
కర్ణాటకలోని ఉడుపి జిల్లాకు చెందిన అల్విన్ ప్రకాశ్ కుందర్ గత 14 ఏళ్లుగా షార్జా విమానాశ్రయంలో పనిచేస్తున్నారు.
ఆయన భార్య టీనా పాఠశాల ఉపాధ్యాయినిగా పనిచేస్తున్నారు. వీరికి ఓ కుమారుడు ఉన్నాడు. కుటుంబం యూఏఈలోనే నివసిస్తోంది.
జులైలో షార్జా నుంచి భారత్కు వచ్చేందుకు వారు సిద్ధమైన సమయంలో అల్విన్ హత్యకు గురైనట్లు తెలుస్తోంది.
వివరాలు
జులై 20 తర్వాత ఫోన్ స్విచ్ఛాఫ్
అల్విన్ సోదరుడు అనిల్ వెల్లడించిన వివరాల ప్రకారం.. జులై 20న తన సోదరుడితో ఫోన్లో మాట్లాడేందుకు ప్రయత్నించారు.
అయితే అల్విన్ కాల్కు స్పందించలేదు. కొద్దిసేపటి తర్వాత 'అంతా బాగానే ఉంది' అనే అర్థంలో ఓ టెక్స్ట్ మెసేజ్ పంపినట్లు అనిల్ తెలిపారు.
సాధారణంగా అల్విన్ వాయిస్ మెసేజ్లు పంపేవారని.. కానీ ఆ రోజు మాత్రం కేవలం టెక్స్ట్ మెసేజ్ రావడం అనుమానం కలిగించిందన్నారు.
వారం రోజుల తర్వాత మళ్లీ ఫోన్ చేసినా ఎలాంటి స్పందన రాలేదని చెప్పారు.
వివరాలు
భారత్ వెళ్లారని చెప్పిన వాచ్మెన్
అల్విన్ ఆచూకీ కోసం ఆయన స్నేహితుడి సహాయంతో ఇంటి వద్దకు వెళ్లి ఆరా తీశారు.
కుటుంబం మొత్తం భారత్కు వెళ్లిపోయిందని అక్కడి వాచ్మెన్ చెప్పినట్లు అనిల్ తెలిపారు. అల్విన్ పనిచేస్తున్న సంస్థ నుంచి కూడా ఇదే సమాచారం అందిందన్నారు.
అయితే అల్విన్ భారత్కు చేరుకున్నట్లు ఎలాంటి ఆధారాలు లేకపోవడంతో ఆయన ఎక్కడున్నారో తెలుసుకోవాలని కుటుంబ సభ్యులు ప్రయత్నించారు.
పాస్పోర్ట్ వివరాలతో మిస్సింగ్ ఫిర్యాదు
అల్విన్ పాస్పోర్ట్ వివరాలను పరిశీలించగా.. ఆయన ఇంకా షార్జాలోనే ఉన్నట్లు గుర్తించినట్లు కుటుంబ సభ్యులు తెలిపారు.
దీంతో పోలీసులను ఆశ్రయించి మిస్సింగ్ ఫిర్యాదు చేశారు. పోలీసులు దర్యాప్తు చేపట్టిన సమయంలో కీలక విషయం వెలుగులోకి వచ్చింది.
వివరాలు
కారులో శరీర భాగాలు గుర్తింపు
ఒమన్కు వెళ్లే మార్గం వైపు పార్క్ చేసి ఉంచిన ఓ కారులో అల్విన్ శరీర భాగాలు లభ్యమైనట్లు అనిల్ వెల్లడించారు.
మృతదేహాన్ని తొమ్మిది భాగాలుగా చేసి రెండు సంచుల్లో ఉంచినట్లు తెలిపారు.
దీంతో ఇది హత్యేనన్న అనుమానాలు బలపడ్డాయి. ఈ ఘటనపై షార్జా పోలీసులు దర్యాప్తు కొనసాగిస్తున్నారు.
వివరాలు
భార్య, కుమారుడి కోసం గాలింపు
అల్విన్ హత్య వెనుక కారణమేంటన్నది ప్రస్తుతం పోలీసుల దర్యాప్తులో తేలాల్సి ఉంది.
మరోవైపు హత్య జరిగిన తర్వాత నుంచి అల్విన్ భార్య టీనా, కుమారుడు కనిపించకపోవడంతో వారి ఆచూకీ కోసం అధికారులు ప్రయత్నిస్తున్నారు.
ఈ కేసులో టీనా ప్రమేయం ఏమైనా ఉందా? అనే కోణంలోనూ దర్యాప్తు చేస్తున్నట్లు సమాచారం.
అయితే అల్విన్, టీనా మధ్య ఎలాంటి గొడవలు ఉన్నట్లు తమకు తెలియదని కుటుంబ సభ్యులు తెలిపారు.
హత్యకు దారితీసిన పరిస్థితులు, కుటుంబ సభ్యుల అదృశ్యానికి సంబంధించిన వివరాలు దర్యాప్తు పూర్తయిన తర్వాతే స్పష్టమయ్యే అవకాశం ఉంది.