French: సిరియాలో హోటల్ సమీపంలో వరుస పేలుళ్లు.. ఫ్రాన్స్ అధ్యక్షుడు మెక్రాన్కు తృటిలో తప్పిన పెను ప్రమాదం..
ఈ వార్తాకథనం ఏంటి
ఫ్రాన్స్ అధ్యక్షుడు ఇమ్మాన్యుయేల్ మాక్రాన్కు సిరియా పర్యటనలో పెను ప్రమాదం తృటిలో తప్పింది. ఆయన బస చేసిన హోటల్ సమీపంలో మూడు కారు బాంబులు పేలడంతో ఒక్కసారిగా తీవ్ర ఉద్రిక్త పరిస్థితులు నెలకొన్నాయి. ఈ ఘటనలో నలుగురు పౌరులు గాయపడినట్లు ప్రాథమిక సమాచారం వెల్లడైంది. అయితే మెక్రాన్ సురక్షితంగా ఉండటంతో అధికారులు, భద్రతా సిబ్బంది ఊపిరి పీల్చుకున్నారు. ప్రస్తుతం మెక్రాన్ అధికారిక పర్యటనలో భాగంగా సిరియాలోని డమాస్కస్లో ఉన్నారు. అక్కడ ఆయన ఒక హోటల్లో బస చేస్తున్నారు. ఇదే సమయంలో హోటల్ సమీపంలో వరుసగా మూడు కారు బాంబులు పేలడంతో భారీ శబ్దాలు వినిపించాయి. పేలుళ్లతో పరిసర ప్రాంతాల్లో భయాందోళనలు నెలకొనగా, భద్రతా బలగాలు వెంటనే అప్రమత్తమయ్యాయి.
వివరాలు
ఘటనపై భద్రతా సంస్థలు దర్యాప్తు ప్రారంభం
అధికారిక సమాచారం ప్రకారం పేలుళ్లు జరిగిన సమయంలో మెక్రాన్ సిరియా అధ్యక్షుడు అహ్మద్ అల్-షరాతో కలిసి అధ్యక్ష భవనంలో సమావేశంలో పాల్గొంటున్నారు. దీంతో ఆయనకు ఎలాంటి ప్రమాదం జరగలేదు. ఈ విషయం వెలుగులోకి రావడంతో ఫ్రాన్స్, సిరియా అధికార వర్గాలు ఊరట వ్యక్తం చేశాయి. ఈ దాడికి బాధ్యులు ఎవరు అనే విషయంపై ఇప్పటివరకు అధికారికంగా ఎలాంటి ప్రకటన వెలువడలేదు. అలాగే ఏ ఉగ్రవాద సంస్థ కూడా ఈ పేలుళ్లకు బాధ్యత వహిస్తున్నట్లు ప్రకటించలేదు. ఘటనపై భద్రతా సంస్థలు దర్యాప్తు ప్రారంభించాయి.
వివరాలు
2024 తర్వాత సిరియాను సందర్శించిన తొలి EU దేశాధినేతగా ఇమ్మాన్యుయెల్
2024లో అహ్మద్ అల్-షరా నేతృత్వంలోని తిరుగుబాటు బలగాలు బషర్ అల్-అసద్ ప్రభుత్వాన్ని కూల్చివేసిన తర్వాత సిరియాను సందర్శించిన తొలి యూరోపియన్ యూనియన్ (EU) దేశాధినేతగా ఇమ్మాన్యుయెల్ మెక్రాన్ నిలిచారు. ఈ నేపథ్యంలో ఆయన పర్యటన సందర్భంగా చోటుచేసుకున్న ఈ పేలుళ్లు సిరియాలో ఇప్పటికీ భద్రతా పరిస్థితులు పూర్తిగా సాధారణ స్థితికి రాలేదనే విషయాన్ని మరోసారి స్పష్టం చేస్తున్నాయి.