మా సైన్యాన్ని ఆధునీకరించడం వల్ల ఏ దేశానికీ ముప్పు ఉండదు: చైనా
ఈ వార్తాకథనం ఏంటి
చైనా తన రక్షణ వ్యయాన్ని భారీగా పెంచవచ్చనే ఊహాగానాల నేపథ్యంలో ఆ దేశ పార్లమెంటు ప్రతినిధి శనివారం స్పందించారు. చైనా సైన్యాన్ని ఆధునీకరించడం వల్ల ఏ దేశానికీ ముప్పు ఉండదని నేషనల్ పీపుల్స్ కాంగ్రెస్ అధికార ప్రతినిధి వాంగ్ చావో పేర్కొన్నారు. స్థూల దేశీయోత్పత్తిలో చైనా రక్షణ వ్యయం వాటా చాలా ఏళ్లుగా స్థిరంగా కొనసాగుతోంది. ఆదివారం ఆ దేశ బడ్జెట్‌ను పార్లమెంట్‌లో ప్రవేశపెట్టనున్నారు. ఈ నేపథ్యంలో రక్షణ వ్యయం పెరగొచ్చని ప్రచారం జరుగుతోంది. అయితే బడ్జెట్ పెరుగుదల అనేది సహేతుకమైనదని వాంగ్ చావో చెప్పారు.
చైనా
చుట్టూ వివాదాలే, సైన్యాన్ని విస్తరించే యోచనలో చైనా!
ఈ ఏడాది చైనా రక్షణ బడ్జెట్ ఎంత పెరుగుతుంది? ఎక్కువగా ఉంటుందా? తక్కువగా ఉంటుందా? అనేది వాంగ్ వెల్లడించలేదు. ఈ ఏడాది రక్షణ బడ్జెట్‌కు సంబంధించి గణాంకాలను చెప్పేందుకు ఆయన నిరాకరించారు. సైన్యం సంక్షేమం కోసం కేటాయించే బడ్జెట్‌ను ప్రపంచ శాంతికి ముప్పుగా భావించవద్దని, దాన్ని మామూలుగానే పరిగణించాలని చైనా చెబుతోంది. చైనా ఆక్రమిత ద్వీపాల్లో భద్రత, దక్షిణ చైనా సముద్రంలో సమీపంలో అమెరికా నావికా దళం వైమానిక కార్యకలాపాలు, భారత్‌తో చెలరేగుతున్న సరిహద్దు ప్రతిష్ఠంభన.. ఇలా చైనా చుట్టూ వివాదాలు నెలకొన్న నేపథ్యంలో సైన్యాన్ని మరింత విస్తరించాలని చైనా భావిస్తోంది. ఈ నేపథ్యంలో ఈ ఏడాది భారీగా బడ్జెట్ కేటాయించే అవకాశం ఉందని విశ్లేషకులు భావిస్తున్నారు.