Nigeria: నైజీరియాలో ఇంధన ట్యాంకర్ పేలుడు.. 100 మంది మృతి.. 50 మందికి పైగా గాయాలు
ఈ వార్తాకథనం ఏంటి
ఉత్తర నైజీరియాలో ఘోర విషాదం చోటుచేసుకుంది. ఇంధన ట్యాంకర్ పేలడంతో 100 మందికి పైగా ప్రాణాలు కోల్పోగా , 50 మందికి పైగా గాయపడినట్లు బుధవారం పోలీసులు ప్రకటించారు.
ఉత్తర జిగావా రాష్ట్రంలో రహదారిపై పెట్రోల్ ట్యాంకర్ బోల్తా పడింది. సమీపంలోని స్థానికులకు ఈ సమాచారం తెలిసిన వెంటనే, వారు రోడ్డుపై పడిన ఇంధనాన్ని సేకరించేందుకు ప్రయత్నించారు.
కానీ, అప్పుడే హఠాత్తుగా మంటలు అంటుకుని ట్యాంకర్ పేలిపోయింది. ఈ పేలుడు కారణంగా భారీగా మంటలు చెలరేగి, పెద్ద సంఖ్యలో ప్రజలు ప్రాణాలు కోల్పోయారని పోలీసులు వెల్లడించారు.
వివరాలు
హైవేపై ఇంధన ట్యాంకర్ బోల్తా
మంగళవారం అర్ధరాత్రి 12.30 గంటల సమయంలో ఈ ట్యాంకర్ ప్రమాదానికి గురైంది.
డ్రైవర్ నియంత్రణ కోల్పోవడం వలన, హైవేపై బోల్తా పడింది. ప్రజలు పెట్రోల్ తీసుకుంటుండగా ప్రమాదవశాత్తు మంటలు చెలరేగడంతో ట్యాంకర్ ఒక్కసారిగా పేలిపోయింది.
క్షతగాత్రులలో కొందరి పరిస్థితి విషమంగా ఉందని పోలీసులు తెలిపారు. మృతుల సంఖ్య మరింత పెరిగే అవకాశం ఉందని కూడా సమాచారం అందుతోంది.
ట్యాంకర్‌కు దూరంగా ఉండాలని ప్రజలను హెచ్చరించినప్పటికీ, వారు వినిపించుకోలేదని, ఒక్కసారిగా మంటలు ఎగబడడంతో భారీ ప్రాణనష్టం జరిగింది అని అధికారులు వెల్లడించారు.