OpenAI: ఓపెన్‌ఏఐలో సమాచార దుర్వినియోగం.. ముగ్గురు ఉద్యోగులపై వేటు
ఈ వార్తాకథనం ఏంటి
చాట్‌జీపీటీని రూపొందించిన ఓపెన్‌ఏఐ.. ముగ్గురు ఉద్యోగులను సంస్థ నుంచి తొలగించింది. కీలకమైన, సున్నితమైన సమాచారాన్ని దుర్వినియోగం చేశారన్న ఆరోపణలపై ఈ చర్య తీసుకున్నట్లు కంపెనీ వెల్లడించింది. అంతేకాకుండా ఆర్టిఫిషియల్‌ ఇంటెలిజెన్స్‌ (AI) మోడళ్లను పరీక్షించే ఓ బయటి సంస్థతో వారు కలిసి పనిచేశారని తెలిపింది. ఇది ఓపెన్‌ఏఐ విధానాలను ఉల్లంఘించడమేనని పేర్కొంది. ఈ కారణాలతోనే ముగ్గురు ఉద్యోగుల సేవలను నిలిపివేసినట్లు ఒక ప్రకటనలో స్పష్టం చేసింది. 'ముగ్గురు ఉద్యోగులు సున్నితమైన సమాచారాన్ని దుర్వినియోగం చేశారన్న ఆరోపణలు వచ్చాయి. అలాగే ఓ బయటి సంస్థతో కలిసి పనిచేసినట్లు కూడా గుర్తించాం. దీంతో వారిపై దర్యాప్తు చేపట్టాం. విచారణలో ఆరోపణలు నిజమని నిర్ధారణ కావడంతో ఉద్యోగులపై చర్యలు తీసుకున్నాం' అని ఓపెన్‌ఏఐ తెలిపింది.
వివరాలు
ఏఐ సేఫ్టీపై నిరంతరం పోస్టులు
అయితే, ఉద్యోగుల పేర్లు లేదా వారి వ్యక్తిగత గుర్తింపును మాత్రం కంపెనీ వెల్లడించలేదు.
తొలగించిన ముగ్గురిలో ఇద్దరు సేఫ్టీ, అలైన్‌మెంట్‌ విభాగాల్లో పనిచేసినట్లు 'వాల్‌స్ట్రీట్‌ జర్నల్‌', 'బ్లూమ్‌బెర్గ్‌' నివేదికలను ఉటంకిస్తూ సమాచారం వెలువడింది.
ఉద్యోగాల నుంచి తొలగింపునకు గురైన ముగ్గురు వ్యక్తులు గత కొన్ని వారాలుగా ఏఐ భద్రత, దాని వల్ల ఎదురయ్యే ముప్పులపై ఎక్స్‌ వేదికగా వరుసగా పోస్టులు చేసినట్లు ఓపెన్‌ఏఐ తెలిపింది.
భవిష్యత్తులో మానవాళి అంతరించిపోయే అవకాశాలకు ఏఐ కారణమయ్యే అవకాశం ఉందని వారిలో ఒకరు పోస్టు చేసినట్లు కంపెనీ పేర్కొంది.
వివరాలు
ఏఐ సేఫ్టీపై నిరంతరం పోస్టులు
అదే సమయంలో ఓపెన్‌ఏఐ అనుసరిస్తున్న కొన్ని విధానాలపై కూడా ఆ ఉద్యోగులు బహిరంగంగానే అసంతృప్తి వ్యక్తం చేసినట్లు సంస్థ తెలిపింది.
అయితే వారి తొలగింపునకు ఈ అభిప్రాయాలే కారణమని కాకుండా.. సున్నితమైన డేటా దుర్వినియోగం చేశారన్న ఆరోపణలపై చేపట్టిన దర్యాప్తులో అవి నిజమని తేలిన తర్వాతే చర్యలు తీసుకున్నామని ఓపెన్‌ఏఐ స్పష్టం చేసింది.