US visa: నెల వ్యవధిలోనే.. అమెరికాలో 1,000 కి పైగా అంతర్జాతీయ విద్యార్థుల వీసాలు రద్దు
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ అక్రమ వలసదారులపై కఠిన వైఖరి పాటించిన విషయం తెలిసిందే.
ఈ నేపథ్యంలో, ఇప్పుడు ఆయన పరిపాలన విదేశీ విద్యార్థులపైనా గట్టిగా స్పందిస్తోంది.
ఇటీవల కొన్ని వారాల వ్యవధిలోనే వెయ్యి మందికిపైగా విదేశీ విద్యార్థుల వీసాలు లేదా వారి చట్టబద్ధ హోదాలు రద్దైనట్లు సమాచారం.
ఈ నిర్ణయాలపై తీవ్ర అభ్యంతరాలు వ్యక్తమవుతున్నాయి. పలు విద్యార్థులు ట్రంప్ ప్రభుత్వం తీసుకుంటున్న చర్యలపై న్యాయస్థానాలను ఆశ్రయిస్తున్నారు.
ఫెడరల్ ప్రభుత్వం ఈ రద్దులను సమర్థవంతంగా నిర్వహించడం లేదని వారు అభిప్రాయపడుతున్నారు.
వివరాలు
నిర్బంధం - స్వదేశానికి పంపించే ప్రమాదం
వీసాలు రద్దు చేయడంలో ఫెడరల్ అధికారులు తీసుకుంటున్న చర్యల కారణంగా అనేక మంది విదేశీ విద్యార్థులు నిర్బంధం లేదా డిపోర్టేషన్‌ (దేశం నుంచి వెళ్ళగొట్టడం) ప్రమాదాన్ని ఎదుర్కొంటున్నారు.
హార్వర్డ్, స్టాన్ఫర్డ్, మేరీల్యాండ్ యూనివర్సిటీ, ఒహాయో స్టేట్‌ వంటి ప్రముఖ విద్యాసంస్థలతో పాటు చిన్నకాలేజీల్లో చదువుతున్న విద్యార్థులు కూడా ఈ పరిస్థితికి లోనవుతున్నారు.
మార్చి చివరి వారం నుంచి ఇప్పటివరకు సేకరించిన సమాచారం ప్రకారం, మొత్తం 160 కాలేజీల్లో కనీసం 1024 మంది విద్యార్థుల వీసాలు రద్దయ్యాయని అసోసియేటెడ్ ప్రెస్‌ వెల్లడించింది.
మరోవైపు, హోంల్యాండ్ సెక్యూరిటీ విభాగం తీసుకుంటున్న చర్యలను అభ్యంతరిస్తూ పలువురు కోర్టులను ఆశ్రయించారు.
తమ వీసా రద్దుకు గల చట్టబద్ధ కారణాలు ప్రభుత్వానికి లేవని వారు వాదిస్తున్నారు.
వివరాలు
వీసాలు ఎందుకు రద్దవుతున్నాయి?
వీసాల రద్దుకు ప్రభుత్వం అనేక కారణాలు చూపిస్తున్నప్పటికీ, విద్యాసంస్థల ప్రకారం ఎక్కువవిగా చిన్న ట్రాఫిక్ ఉల్లంఘనలు లేదా అలాంటి తక్కువ తీవ్రత గల ఘటనలే కారణంగా ఉన్నాయి.
కొన్ని సందర్భాల్లో వీసా రద్దు చేయడానికి అసలు కారణమే తెలియకపోవడం మరింత అనుమానాలకు దారి తీస్తోంది.
మిషిగాన్ యూనివర్సిటీ తరఫున కోర్టులో వాదిస్తున్న న్యాయవాదులు తమ పిటిషన్‌లో.. ''ఈ విధంగా పెద్ద ఎత్తున విద్యార్థి వీసాలను రద్దు చేయడం అనుమానాస్పదంగా ఉంది. దీని వెనుక ప్రభుత్వం విధానపరమైన నిర్ణయమే ఉందా?'' అనే ప్రశ్నను లేవనెత్తారు.
న్యూహ్యాంప్‌షైర్‌లోని కొన్ని కాలేజీల విద్యార్థులు వేసిన కేసులలోనూ ఈ తరహా విషయాలు ప్రస్తావించబడ్డాయి.
అయితే ఇప్పటివరకు హోంల్యాండ్ సెక్యూరిటీ (DHS) నుంచి ఈ విషయంపై స్పష్టమైన ప్రకటన రాలేదు.
వివరాలు
వీసా రద్దయితే జరగే పరిణామాలు
విద్యార్థి వీసా రద్దైనపుడు, ఇమిగ్రేషన్ అధికారులు విద్యార్థులను అరెస్టు చేసే అవకాశం ఉంది.
దీనివల్ల భయాందోళనకు లోనైన కొందరు విద్యార్థులు తమ చదువులు మధ్యలోనే వదిలి స్వదేశాలకు తిరిగి వెళ్తున్నారు.
ఈ విధమైన పరిస్థితులు అమెరికాలో చదవాలని ఆశించే విదేశీ విద్యార్థుల్లో భయాన్ని, అసంతృప్తిని పెంచుతున్నాయని విద్యావేత్తలు పేర్కొంటున్నారు.
వీసా రద్దుకు గల స్పష్టమైన కారణాలు తెలియకపోవడం విద్యార్థుల్లో తీవ్ర అనిశ్చితిని కలిగిస్తోంది.
వివరాలు
కాలేజీల సహకారం - విద్యార్థులకు జాగ్రత్త సూచనలు
విద్యార్థులకు ధైర్యం చెబుతూ కొన్ని విద్యాసంస్థలు వీసాల రద్దుపై ఫెడరల్ అధికారులతో సంప్రదింపులు జరుపుతున్నట్లు వెల్లడించాయి.
మరికొన్ని కాలేజీలు విద్యార్థులకు ప్రయాణ సమయంలో పాటించాల్సిన జాగ్రత్తలపై మార్గనిర్దేశం చేస్తున్నాయి.
ముఖ్యంగా పాస్‌పోర్ట్‌, ఇమిగ్రేషన్‌కు సంబంధించిన పత్రాలను ఎప్పుడూ తమవద్ద ఉంచుకోవాలని సూచిస్తున్నాయి.