Pakistan: పాకిస్తాన్‌లో మరోసారి బాంబు పేలుడు.. 9 మంది మృతి, నలుగురికి తీవ్రగాయాలు..
ఈ వార్తాకథనం ఏంటి
పాకిస్థాన్‌లో మరోసారి ఉగ్రవాదం బీభత్సం సృష్టించింది. కైబర్ ఫఖ్తుంఖ్వా రాష్ట్ర రాజధాని పెషావర్‌లో గురువారం చోటుచేసుకున్న బాంబు పేలుడు భారీ ప్రాణనష్టానికి దారితీసింది. ఈ ఘటనలో తొమ్మిది మంది ప్రాణాలు కోల్పోగా, మరో నలుగురు గాయాలపాలైనట్లు సమాచారం. పేలుడు ప్రధానంగా పోలీస్ సిబ్బందినే లక్ష్యంగా చేసుకున్నదని అక్కడి పాక్ మీడియా వెల్లడించింది. ఈ దాడి వివరాలను పెషావర్ క్యాపిటల్ సిటీ పోలీస్ అధికారి మియాన్ సయీద్ కార్యాలయం ధృవీకరించిందని డాన్ పత్రిక నివేదించింది. ఘటన అనంతరం పెషావర్ నగరంలో భారీ సంఖ్యలో భద్రతా దళాలు మోహరించాయి.
వివరాలు
క్వెట్టా దాడిలో పది మంది మృతి
ఇక ఇటీవలే, సెప్టెంబర్ 30న బలూచిస్తాన్ రాష్ట్ర రాజధాని క్వెట్టాలో కూడా ఘోరమైన దాడి జరిగింది. ఫ్రాంటియర్ కార్ప్స్ (FC) ప్రధాన కార్యాలయం దగ్గర రద్దీగా ఉండే వీధిలో ఆ రోజు శక్తివంతమైన బాంబు పేలింది. ఆ దాడిలో పది మంది మరణించగా, మరో 32 మందికి తీవ్ర గాయాలు అయ్యాయి. క్వెట్టా ఘటన ప్రభావం ఇంకా చల్లారకముందే, ఇప్పుడు పెషావర్‌లోని ఈ దాడి పాకిస్తాన్ భద్రతా పరిస్థితులపై మళ్లీ ప్రశ్నలు లేవనెత్తుతోంది.