PM Modi: యురేషియా,పశ్చిమాసియాలో శాంతి కోసం పిఎం మోదీ పిలుపు.. యుద్ధానికి కాదు.. దౌత్యానికి ప్రాధాన్యం ఇవ్వాలి
గ్లోబల్‌ సౌత్‌ దేశాలపై ప్రపంచంలోని వివిధ ప్రాంతాల్లో జరుగుతున్న ఘర్షణలు తీవ్ర ప్రతికూల ప్రభావం చూపిస్తున్నాయని నరేంద్ర మోదీ పేర్కొన్నారు. లావోస్‌లో జరిగిన 19వ ఈస్ట్‌ ఆసియా సమ్మిట్‌లో ప్రసంగించిన ఆయన, ''నేను బుద్ధుడి బోధనలను అనుసరించే దేశం నుంచి వచ్చాను. ఇది యుద్ధాల యుగం కాదు. యుద్ధం ద్వారా సమస్యలకు పరిష్కారాలు రావు'' అని అన్నారు. ప్రపంచంలోని వివిధ ప్రాంతాల్లో కొనసాగుతున్న ఘర్షణలు వర్ధమాన దేశాలపై తీవ్రమైన ప్రతికూలత కలిగిస్తున్నాయని ఆయన వివరించారు. ఉగ్రవాదం ప్రపంచ శాంతి భద్రతకు తీవ్రమైన సవాలుగా మారిందని, దీనిని ఎదుర్కొనడానికి మానవత్వంపై విశ్వాసమున్న శక్తులన్నీ కలిసికట్టుగా పని చేయాలని మోదీ పిలుపునిచ్చారు.
సమస్యల పరిష్కారానికి చర్చలు
సైబర్‌, సముద్ర, అంతరిక్ష రంగాల్లో పరస్పర సహకారాన్ని బలోపేతం చేసుకోవాలని, సార్వభౌమాధికారాన్ని, ప్రాదేశిక సమగ్రతను, అంతర్జాతీయ చట్టాలను గౌరవించాలన్నారు. అలాగే, సమస్యల పరిష్కారానికి చర్చలు, దౌత్యానికి ప్రాధాన్యమివ్వాలని, యురేషియా, పశ్చిమాసియా ప్రాంతాల్లో శాంతి, స్థిరత్వాన్ని పునరుద్ధరించాల్సిన అవసరం ఉందని మోదీ తెలిపారు.
