Usa Population: అమెరికా పట్టణాల్లో జనాభా వృద్ధి తగ్గుదల.. కారణాలు ఇవే..
ఈ వార్తాకథనం ఏంటి
అమెరికాలో పట్టణ ప్రాంతాల్లో జనాభా పెరుగుదల రేటు తగ్గిందని యూఎస్ సెన్సస్ బ్యూరో తాజా గణాంకాలు వెల్లడించాయి. ముఖ్యంగా యూఎస్-మెక్సికో సరిహద్దు ప్రాంతాలు, అలాగే ఫ్లోరిడా తీర ప్రాంత కౌంటీల్లో జనాభా పెరుగుదల గణనీయంగా నెమ్మదించిందని ఈ నివేదికలో స్పష్టం చేసింది. 2025లో వలసలు తగ్గడం దీనికి ప్రధాన కారణంగా భావిస్తున్నారు. గణాంకాల ప్రకారం, 2024లో మెట్రో ప్రాంతాల్లో సగటు జనాభా వృద్ధి రేటు 1.1 శాతంగా ఉండగా, 2025 నాటికి అది 0.6 శాతానికి పడిపోయింది. అంటే, కేవలం ఒకే సంవత్సరంలో వృద్ధి రేటు దాదాపు సగానికి తగ్గినట్లు తెలుస్తోంది.
వివరాలు
దేశంలోకి వచ్చే వలసదారుల సంఖ్య తగ్గింది: నిపుణులు
2025లో డొనాల్డ్ ట్రంప్ అధికారంలోకి వచ్చిన తర్వాత అమెరికాలో కఠిన వలస విధానాలు అమలు అవుతున్నాయి. ఈ కారణంగా దేశంలోకి వచ్చే వలసదారుల సంఖ్య తగ్గినట్లు నిపుణులు చెబుతున్నారు. అయితే, గత రెండు దశాబ్దాలుగా అమెరికాలో వృద్ధ జనాభా పెరుగుతుండగా, జననాల రేటు తగ్గిపోతున్న పరిస్థితిని వలసలు కొంతవరకు సమతుల్యం చేస్తున్నాయి. ఈ విషయంపై అమెరికా డెమోగ్రాఫర్ కెన్నెత్ జాన్సన్ మాట్లాడుతూ, "ఏ ప్రాంతం అభివృద్ధి చెందుతుందో, లేదా వెనుకబడుతుందో అనేది ఎక్కువగా వలసలపై ఆధారపడి ఉంటుంది. వలసలపై ఆధారపడే మెట్రో నగరాల్లో ఈ ప్రభావం మరింత స్పష్టంగా కనిపిస్తోంది" అని తెలిపారు.
వివరాలు
ఫ్లోరిడా తీర ప్రాంతాన్నితీవ్రంగా ప్రభావితం చేసిన హెలెన్, మిల్టన్ తుఫానులు
ఇక 2024లో ఫ్లోరిడా తీర ప్రాంతాన్ని హెలెన్, మిల్టన్ తుఫానులు తీవ్రంగా ప్రభావితం చేశాయి. ఈ ప్రకృతి విపత్తుల కారణంగా భారీ స్థాయిలో ఆస్తి నష్టం జరిగింది. ఫలితంగా అనేక మంది స్థానికులు తీర ప్రాంతాలను విడిచి వెళ్లాల్సి వచ్చింది. ఈ వలసల ప్రభావం కూడా జనాభా వృద్ధి తగ్గుదలకు ఒక కారణంగా యూఎస్ సెన్సస్ అంచనా వేసింది. ఇలా వెళ్లిపోయిన వారి సంఖ్య వేలల్లో ఉన్నట్లు పేర్కొంది.