ఆస్ట్రేలియాలో ఆలయాలపై దాడుల అంశాన్ని లేవనెత్తిన ప్రధాని మోదీ; కఠినమైన చర్యలకు అల్బనీస్ హామీ
ఈ వార్తాకథనం ఏంటి
ఆస్ట్రేలియా పర్యటనలో ఉన్న ప్రధాని నరేంద్ర మోదీ బిజీబిజీగా గడుపుతున్నారు. ఈ క్రమంలో బుధవారం ఆస్ట్రేలియా ప్రధాని ఆంథోనీ అల్బనీస్‌తో జరిగిన సమావేశంలో కీలక అంశాలపై చర్చించారు. ప్రధానంగా ఆస్ట్రేలియాలో హిందూ దేవాలయాలపై జరుగుతున్న దాడుల అంశాన్ని మోదీ లేవనెత్తగా, ఆంథోనీ అల్బనీస్ సానుకూలంగా స్పందిచారు. ఇటువంటి అంశాలపై కఠిన చర్యలు తీసుకుంటామని అల్బనీస్ హామీ ఇచ్చారు. ఇరుదేశాల ప్రధానుల సమావేశం అనంతరం మీడియాతో మాట్లాడారు. ఈ సందర్భంగా మోదీ మాట్లాడుతూ, ఆస్ట్రేలియాలోని దేవాలయాలపై దాడులు, వేర్పాటువాదుల కార్యకలాపాలపై అల్బనీస్, తాను చర్చించినట్లు చెప్పారు. ఇలాంటి దాడులను తాము అంగీకరించబోమని తెలిపారు. ఇరుదేశాల స్నేహపూర్వక సంబంధాలను దెబ్బతీసే అంశాల పట్ల కఠిన చర్యలు తీసుకుంటామని అల్బనీస్ హామీ ఇచ్చినట్లు మోదీ చెప్పారు.
మోదీ
మార్చిలో బ్రిస్బేన్‌లోని శ్రీ లక్ష్మీ నారాయణ దేవాలయంపై దాడి
ఖలిస్థానీ కార్యకర్తలు, భారత అనుకూల ప్రదర్శనకారుల మధ్య జరిగిన ఘర్షణలు ఇటీవల ఆస్ట్రేలియాలోని అనేక ప్రాంతాల్లో వెలుగులోకి వచ్చాయి. ఇటీవల ఆస్ట్రేలియాలో భారత జాతీయ జెండాలను దహనం చేసి హిందూ దేవాలయాన్ని కూడా ధ్వంసం చేశారు. అంతకుముందు, అల్బనీస్ మార్చిలో తన భారత పర్యటన సందర్భంగా మతపరమైన భవనాలలో జరిగే ఎటువంటి విపరీతమైన చర్యలు, దాడులను ఆస్ట్రేలియా సహించదని, హిందూ దేవాలయాలపై అలాంటి చర్యలకు చోటు లేదని అన్నారు. ఈ ఏడాది మార్చిలో ఆస్ట్రేలియాలోని బ్రిస్బేన్‌లోని శ్రీ లక్ష్మీ నారాయణ దేవాలయాన్ని ఖలిస్థాన్ అనుకూల మద్దతుదారులు ధ్వంసం చేశారు.