అమెరికా:యూనివర్సిటీ ఆఫ్‌ నార్త్‌ కరోలినాలో కాల్పుల కలకలం.. ప్రొఫెసర్ మృతి
అమెరికా నార్త్‌ కరోలినా చాపెల్‌ హిల్‌లోని యూనివర్సిటీ ఆఫ్‌ నార్త్‌ కరోలినాలో కాల్పులు కలకలం సృష్టించాయి. ఓ దుండగుడు కాల్పులకు తెగబడ్డాడు. వర్సిటీ క్యాంపస్‌లోకి సోమవారం మధ్యాహ్నం 2.30 గంటలకు (స్థానిక కాలమానం ప్రకారం) చొరబడిన దుండగుడు.. సైన్స్‌ భవనంలో కాల్పులు జరపడంతో ఫ్రొఫెసర్‌ జిజీ యాన్ మృతి చెందాడు. సమాచారం అందుకున్న పోలీసులు ఆ ప్రాంతాన్ని తమ ఆధీనంలోకి తీసుకున్నారు. సుమారు మూడు గంటల తర్వాత నిందితుడిని అదుపులోకి తీసుకున్నారు. ఈ ఘటనలో మరెవరికి గాయాలు కాలేదు. నిందితుడు పోలీసుల కస్టడీలో ఉన్నాడని వర్సిటీ చాన్సలర్‌ కెవిన్‌ గుస్కివీజ్‌ చెప్పారు. వర్సిటీలో కాల్పులు చోటుచేసుకోవడంతో విద్యార్థులు భయభ్రాంతులకు గురయ్యారు.
