France: ఫ్రాన్స్ను కుదిపేస్తున్న చిన్నారుల లైంగిక వేధింపుల స్కాండల్
ఈ వార్తాకథనం ఏంటి
ఫ్రాన్స్ రాజధాని పారిస్లో చిన్నారులపై జరుగుతున్న లైంగిక వేధింపుల వ్యవహారం దేశవ్యాప్తంగా తీవ్ర సంచలనం సృష్టిస్తోంది. పాఠశాలలు, చిన్నారుల సంరక్షణ కేంద్రాల్లో పిల్లల భద్రతను చూసుకోవాల్సిన సిబ్బందే వారిపై దాడులకు పాల్పడ్డారన్న ఆరోపణలు వెలుగులోకి రావడంతో అధికారులు విస్తృత స్థాయిలో దర్యాప్తు చేపట్టారు. నగరంలోని 84 ప్రీ స్కూళ్లు, 20 ప్రాథమిక పాఠశాలలు, 10 చిన్నారుల సంరక్షణ కేంద్రాల్లో విచారణ కొనసాగుతోందని పారిస్ ప్రాసిక్యూటర్ లోర్ బెక్యువా తెలిపారు. భోజన విరామాలు, ఆట సమయాలు, పిల్లలు నిద్రించే వేళల్లో వారిని పర్యవేక్షించే సిబ్బందే ఈ దారుణాలకు పాల్పడినట్లు ఆరోపణలు వెల్లువెత్తుతున్నాయి. వీరు జాతీయ విద్యా వ్యవస్థ ద్వారా కాకుండా స్థానిక సంస్థల ద్వారా నియమించబడిన వారిగా గుర్తించారు.
వివరాలు
కోర్టుకు చేరిన డేవిడ్ జి అనే నిందితుడి కేసు
చిన్నారులపై అరవడం, జుట్టు పట్టుకుని లాగడం, ఆహారం ఇవ్వకుండా వేధించడం మాత్రమే కాకుండా లైంగికంగా హింసించారని తల్లిదండ్రులు ఆరోపిస్తున్నారు.
తమ ఫిర్యాదులపై అధికారులు స్పందించడానికి చాలా నెలలు పట్టిందని బాధిత కుటుంబాల తరఫు న్యాయవాదులు ఆవేదన వ్యక్తం చేశారు.
ఈ కుంభకోణానికి సంబంధించిన కీలక కేసు విచారణ ఈ వారం పారిస్ కోర్టులో ప్రారంభమవడంతో ప్రజల్లో తీవ్ర ఆగ్రహం వ్యక్తమవుతోంది.
36 ఏళ్ల పాఠశాల సహాయకుడు డేవిడ్ జి.పై 3 నుంచి 5 ఏళ్ల మధ్య వయస్సున్న ఐదుగురు చిన్నారులపై లైంగిక దాడులకు పాల్పడ్డాడనే ఆరోపణలు ఉన్నాయి.
అదేవిధంగా ఇద్దరు మహిళా సహోద్యోగులను కూడా వేధించాడని కేసు నమోదైంది.
అయితే నిందితుడు ఆరోపణలను ఖండిస్తున్నాడు.
వివరాలు
నిందితుడికి 10 ఏళ్ల జైలు శిక్ష పడే అవకాశం
కానీ చిన్నారులను తన ఒడిలో కూర్చోబెట్టుకోవడం వంటి నిబంధనలకు విరుద్ధమైన చర్యలు చేసిన విషయాన్ని అంగీకరించాడు.
ఈ కేసులో నేరం రుజువైతే అతనికి పదేళ్ల జైలు శిక్షతో పాటు భారీ జరిమానా విధించే అవకాశం ఉంది.
ఈ ఘటనలతో బాధిత చిన్నారులు తీవ్రమైన మానసిక వేదనకు గురవుతున్నారని తల్లిదండ్రులు చెబుతున్నారు.
ఒక నిందితుడి వేధింపుల కారణంగా మూడేళ్ల బాలుడు పాఠశాలకు వెళ్లడానికే భయపడుతున్నాడని బాధితుల తరఫు న్యాయవాది లూయిస్ కైలీజ్ వెల్లడించారు.
వివరాలు
తొలి మూడు నెలల్లో 78 మంది సిబ్బంది సస్పెన్షన్
ఘటనపై రాజకీయ ఒత్తిడి పెరగడంతో పారిస్ మేయర్ ఇమ్మాన్యుయేల్ గ్రెగోయిర్ కఠిన చర్యలకు ఆదేశించారు.
ఈ నేపథ్యంలో 2026 తొలి మూడు నెలల్లోనే 78 మంది పాఠశాల సిబ్బందిని విధుల నుంచి సస్పెండ్ చేశారు.
ఫ్రాన్స్లో ప్రతి సంవత్సరం సుమారు లక్షా అరవై వేల మంది చిన్నారులు లైంగిక దాడులు, అత్యాచారాలకు గురవుతున్నారని అక్కడి స్వతంత్ర కమిషన్ 'సీఐఐవీఐఎస్ఈ' అంచనా వేయడం పరిస్థితి ఎంత తీవ్రమైందో చూపిస్తోంది.