Russia: ఉక్రెయిన్ యుద్ధం రష్యాకు భారంగా మారిందా? సైనికుల కొరతతో పుతిన్కు కొత్త సవాళ్లు
ఈ వార్తాకథనం ఏంటి
ఉక్రెయిన్పై కొనసాగుతున్న యుద్ధంలో రష్యాకు ఇప్పటివరకు ఉన్న భారీ మానవ వనరుల ఆధిక్యం క్రమంగా తగ్గుతున్నట్లు అంతర్జాతీయ విశ్లేషకులు చెబుతున్నారు. సైన్యంలో చేరేందుకు రష్యా ప్రభుత్వం భారీ నగదు ప్రోత్సాహకాలు ప్రకటిస్తున్నప్పటికీ ఆశించిన స్థాయిలో యువకులు ముందుకు రావడం లేదని నివేదికలు వెల్లడిస్తున్నాయి. సైన్యంలో చేరిన వారికి సుమారు 80 వేల డాలర్ల వరకు బోనస్లు, 1.4 లక్షల డాలర్ల వరకు రుణ మాఫీ వంటి ఆఫర్లు ఇస్తోంది. అంతేకాకుండా రష్యా పౌరసత్వం, దేశ సేవ చేసే హీరోగా గుర్తింపు వంటి హామీలతో ప్రచారం నిర్వహిస్తోంది. అయినప్పటికీ ఈ ఏడాది తొలి త్రైమాసికంలో సైనిక నియామకాలు గత ఏడాదితో పోలిస్తే సుమారు 20 శాతం తగ్గినట్లు నిపుణులు చెబుతున్నారు.
వివరాలు
సైనికుల కొరత, ఆర్థిక ఒత్తిడి మాస్కోకు పెద్ద సవాలు
ఇప్పటి వరకు రష్యా వ్యూహం తన భారీ జనాభా, బలమైన రక్షణ పరిశ్రమ ఆధారంగా దీర్ఘకాల యుద్ధాన్ని కొనసాగించడమే. అయితే యుద్ధం ఐదో సంవత్సరంలోకి ప్రవేశించడంతో సైనికుల కొరత, ఆర్థిక ఒత్తిడి మాస్కోకు పెద్ద సవాలుగా మారుతున్నాయి. చమురు ధరలు పెరగడంతో ప్రభుత్వానికి కొంత ఆర్థిక లాభం వచ్చినా, డబ్బుతో మాత్రమే యుద్ధం గెలవలేమని విశ్లేషకులు పేర్కొంటున్నారు. రష్యా చరిత్రలో తొలిసారిగా బలవంతపు నియామకాల కంటే భారీ పారితోషికాలతో పౌరులను సైన్యంలోకి ఆకర్షించే ప్రయత్నం జరుగుతోందని నిపుణులు చెబుతున్నారు. అయినప్పటికీ యుద్ధభూమిలోని కఠిన పరిస్థితులు, సైనికులు ఎదుర్కొంటున్న ఇబ్బందులపై వస్తున్న కథనాలు యువతను సైన్యంలో చేరకుండా చేస్తున్నాయని విశ్లేషకులు అభిప్రాయపడుతున్నారు.
వివరాలు
సైన్యంలో చేరితే భారీ రుణాలను మాఫీ చేస్తామని ప్రకటించిన రష్యా
ఇప్పటికే వేలాది మంది మాజీ ఖైదీలను రష్యా యుద్ధ రంగానికి పంపింది. ఉత్తర కొరియా సైనికుల సహాయాన్ని కూడా పొందింది. వలసదారులను సైన్యంలో చేరేందుకు ప్రోత్సహిస్తోంది. తాజాగా అప్పుల్లో ఉన్న వ్యక్తులు సైన్యంలో చేరితే భారీ రుణాలను మాఫీ చేస్తామని ప్రకటించింది. యుద్ధ ప్రభావం కేవలం సైన్యంపైనే కాకుండా రష్యా ఆర్థిక వ్యవస్థపై కూడా తీవ్రంగా పడుతోంది. పనిచేసే వయస్సులో ఉన్న లక్షలాది మంది యుద్ధానికి వెళ్లడం లేదా విదేశాలకు వెళ్లిపోవడంతో కార్మికుల కొరత ఏర్పడింది. పరిశ్రమలు, ఫ్యాక్టరీలు సిబ్బంది కోసం ఇబ్బందులు పడుతున్నాయి. రక్షణ పరిశ్రమలు ఇప్పటికే పూర్తి సామర్థ్యంతో పనిచేస్తుండటంతో ఉత్పత్తిని మరింత పెంచడం కష్టంగా మారింది.
వివరాలు
దేశం విడిచి వెళ్లిపోయిన లక్షలాది మంది
పాశ్చాత్య గూఢచారి సంస్థల అంచనాల ప్రకారం ఇప్పటి వరకు సుమారు ఐదు లక్షల మంది రష్యా సైనికులు యుద్ధంలో మరణించినట్లు చెబుతున్నారు. మరోవైపు బలవంతపు నియామకాల భయంతో లక్షలాది మంది దేశం విడిచి వెళ్లిపోయినట్లు సమాచారం. దీనివల్ల కార్మికుల కొరత మరింత పెరిగి ద్రవ్యోల్బణంపై ప్రభావం చూపుతోంది. ఈ పరిస్థితుల్లో భారత్, ఉత్తర కొరియా, ఆఫ్రికా దేశాల నుంచి మరిన్ని కార్మికులను రప్పించే అవకాశాన్ని రష్యా పరిశీలిస్తున్నట్లు నిపుణులు భావిస్తున్నారు. అవసరమైతే మరోసారి బలవంతపు సైనిక నియామకాలు చేపట్టే అవకాశం కూడా ఉందని విశ్లేషణలు చెబుతున్నాయి. అయితే గతంలో చేపట్టిన పాక్షిక మొబిలైజేషన్ తీవ్ర వ్యతిరేకతకు దారితీయడంతో అధ్యక్షుడు పుతిన్ ఆ నిర్ణయంపై జాగ్రత్తగా వ్యవహరిస్తున్నట్లు తెలుస్తోంది.
వివరాలు
ప్రజలపై అదనపు భారంగా ధరలు
ఆర్థికంగా కూడా రష్యాపై ఒత్తిడి పెరుగుతోంది. యుద్ధ ఖర్చులు ఏటా పదుల బిలియన్ డాలర్లకు చేరుతున్నాయని అంచనా. ఆర్థిక వృద్ధి మందగించడం, వ్యాపారాలు మూతపడటం, వినియోగదారుల నమ్మకం తగ్గడం వంటి పరిణామాలు కనిపిస్తున్నాయి. ఆహార ధరలు, విద్యుత్ ఛార్జీలు, ఇతర నిత్యావసరాల ధరలు పెరగడం ప్రజలపై అదనపు భారంగా మారింది. మరోవైపు ఉక్రెయిన్ యుద్ధ సాంకేతికతలో గణనీయమైన పురోగతి సాధిస్తోంది. డ్రోన్లు, రోబోటిక్ వ్యవస్థలను విస్తృతంగా వినియోగిస్తూ రష్యా సైన్యానికి భారీ నష్టాలు కలిగిస్తున్నట్లు సైనిక నిపుణులు చెబుతున్నారు. ఈ ఏడాది మొదటిసారిగా కేవలం డ్రోన్లు, రోబోట్ల సాయంతో రష్యా స్థావరాన్ని స్వాధీనం చేసుకున్నామని ఉక్రెయిన్ అధ్యక్షుడు ప్రకటించారు.
వివరాలు
రష్యా ఆక్రమించిన భూభాగం కంటే కోల్పోయిన భూభాగమే ఎక్కువ..
ఉక్రెయిన్ సైన్యం ప్రకారం ఇటీవల నెలల్లో రష్యా ఆక్రమించిన భూభాగం కంటే కోల్పోయిన భూభాగమే ఎక్కువగా ఉంది. ప్రతి నెలా వేలాది మంది రష్యా సైనికులు మరణించడం లేదా గాయపడుతున్నారని పాశ్చాత్య దేశాల అంచనా. యుద్ధరంగంలో సరైన శిక్షణ లేని సైనికులు, మాజీ ఖైదీలను పంపడం వల్ల రష్యా సైనిక సామర్థ్యం తగ్గుతోందని నిపుణులు పేర్కొంటున్నారు. ప్రస్తుతం రష్యా ప్రభుత్వం యుద్ధాన్ని కొనసాగించేందుకు మరింత కఠిన నిర్ణయాలు తీసుకోవాల్సిన పరిస్థితి ఏర్పడిందని, లేకపోతే తన యుద్ధ లక్ష్యాలను పునఃసమీక్షించాల్సి రావచ్చని అంతర్జాతీయ విశ్లేషకులు అభిప్రాయపడుతున్నారు.