Sheikh Hasina: 'కుట్రపూరిత తీర్పు'.. మరణశిక్షపై హసీనా
ఈ వార్తాకథనం ఏంటి
బంగ్లాదేశ్‌లో చోటుచేసుకున్న అల్లర్ల కేసులో ఢాకా ఇంటర్నేషనల్ క్రైమ్స్ ట్రైబ్యునల్ తనకు విధించిన మరణదండనను మాజీ ప్రధాని షేక్ హసీనా తీవ్రంగా తప్పుబట్టారు. ఈ తీర్పు పూర్తిగా వక్రీకృతమైందని, దానికి ఎలాంటి న్యాయబలం లేదని ఆమె ఆరోపించారు. ప్రజాస్వామ్య ప్రక్రియలకు విరుద్ధంగా ఏర్పడిన ప్రస్తుత ప్రభుత్వం, ఉద్దేశపూర్వకంగా తనను టార్గెట్ చేస్తూ కుట్రపూరితంగా ఈ శిక్షను తెచ్చిందని విమర్శించారు. తాను నిర్దోషిని అని నిరూపించుకునే అవకాశాన్ని కోర్టు ఇవ్వకపోవడం పట్ల ఆమె తీవ్ర అసంతృప్తి వ్యక్తం చేసి, విచారణలో న్యాయమూర్తులు పూర్తిగా పక్షపాత ధోరణితో వ్యవహరించారని అన్నారు.
వివరాలు
షేక్ హసీనాను దోషిగా తేల్చి మరణ శిక్ష
గతేడాది విద్యార్థుల ఆందోళనలు అనూహ్యంగా పెరగడంతో షేక్ హసీనా ఆగస్టు 5న ప్రధానిగా పదవి వదిలి, బంగ్లాదేశ్ నుంచి బయలుదేరి భారత్‌కు రావాల్సి వచ్చింది. అప్పటి నుంచి ఆమె ఢిల్లీలోని ఒక రహస్య ప్రదేశంలో ఉంటున్నారు. ఆ సమయంలో బంగ్లాదేశ్‌లో అల్లర్లు తీవ్రమై భారీగా హింస చెలరేగిన సంగతి తెలిసిందే. ఈ ఘటనల్లో అనేకమంది ప్రాణాలు కోల్పోవడంతో, హత్యతో పాటు పలు కేసులు ఆమెపై నమోదు అయ్యాయి. ఈ కేసులన్నిటిని పరిశీలించిన ఢాకా ఇంటర్నేషనల్ క్రైమ్స్ ట్రైబ్యునల్, షేక్ హసీనాను దోషిగా తేల్చి మరణ శిక్ష విధించింది. అల్లర్ల సమయంలో తనకు వ్యతిరేకంగా నిలిచిన నిరసనకారులపై హెలికాప్టర్లు, ప్రాణాంతక ఆయుధాలు వినియోగించి, వారిని కాల్చివేయాలని ఆమె ఆదేశించినట్లు ట్రైబ్యునల్ పేర్కొంది.