Taiwan: తైవాన్ అధ్యక్ష బరిలో ఫాక్స్‌కాన్ వ్యవస్థాపకుడు టెర్రీ గౌ.. స్వతంత్ర అభ్యర్థిగా పోటీ
ఈ వార్తాకథనం ఏంటి
తైవాన్ అధ్యక్ష పదవికి తాను స్వతంత్ర అభ్యర్థిగా పోటీ చేస్తానని ఫాక్స్‌కాన్ టెక్నాలజీ గ్రూప్ వ్యవస్థాపకుడు టెర్రీ గౌ సోమవారం ప్రకటించారు.
వచ్చే ఏడాది జనవరిలో తైవాన్‌లో అధ్యక్ష ఎన్నికలు జరగనున్నాయి.
తైవాన్‌కు నాయకుడిగా ఎదగాలని టెర్రీ గౌ చాలా ఏళ్లుగా ప్రయత్నిస్తున్నారు. వాస్తవానికి తైవాన్‌లోని ప్రతిపక్ష కోమింటాంగ్ పార్టీ నుంచి అధ్యక్షుడిగా పోటీ చేయాలని టెర్రీ గౌ అనుకున్నారు. కానీ అది సాధ్యం కాలేదు.
2019లో కూడా టెర్రీ గౌ పదవికి పోటీ చేసి ఓడిపోయారు. ఈ సారి మళ్లీ పోటీ చేసేందుకు సిద్ధమవుతున్నారు.
ఎన్నికల్లో పోటీ చేసేందుకు టెర్రీ గౌ 2019లో ఫాక్స్‌కాన్ చీఫ్ పదవికి రాజీనామా చేశారు.
తైవాన్
స్వతంత్ర అభ్యర్థిగా పోటీ చేయాలంటే 2,90,000 సంతకాలు అవసరం
ఈ సందర్భంగా నిర్వహించిన విలేకరుల సమావేశంలో టెర్రీ గౌ మాట్లాడారు. తనకు అధ్యక్షుడిగా ఈ సారి అవకాశం ఇవ్వాలని తైవాన్ ప్రజలను టెర్రీ గౌ కోరారు.
తనను గెలిపిస్తే తైవాన్ ద్వీపంలో వచ్చే యాభై సంవత్సరాల పాటు శాంతిని పునరుద్ధరిస్తానని టెర్రీ గౌ స్పష్టం చేశారు.
టెర్రీ గౌ స్వతంత్ర అభ్యర్థిగా అర్హత సాధించడానికి నవంబర్ 2 నాటికి 2,90,000 సంతకాలను సేకరించాల్సి ఉంటుంది. దీనికోసం ఇప్పటికే ప్రచారకార్యక్రమాన్ని సైతం మొదలు పెట్టారు.
తైవాన్‌ను చైనా తన భూభాగంగా పరిగణిస్తుంది. బలవంతంగా తైవాన్‌ను స్వాధీనం చేసుకునేందుకు ప్రయత్నిస్తోంది.
అయితే తైవాన్‌పై చైనా ఆధిపత్యాన్ని గౌ వ్యతిరేకిస్తున్నారు. తైవాన్ ప్రస్తుత అధ్యక్షుడు త్సాయ్ ఇంగ్-వెన్ రెండు దఫాలు ఎన్నికల్లో గెలిచి ఏడేళ్లుగా అధికారంలో ఉన్నారు.
తైవాన్
టెర్రీ గౌను చైనా ఏజెంట్ అంటూ విమర్శలు
2016లో డెమోక్రటిక్ ప్రోగ్రెసివ్ పార్టీ నుంచి త్సాయ్ ఇంగ్-వెన్ అధికారంలోకి వచ్చిన దగ్గర నుంచి తైవాన్‌పై చైనా అధిపత్యం పెరిగిన విషయం తెలిసిందే.
డెమోక్రటిక్ ప్రోగ్రెసివ్ పార్టీ ఏడేళ్ల పాలన తైవాన్‌కు యుద్ధ ప్రమాదాన్ని తెచ్చిపెట్టిందని గౌ విమర్శించారు. తైవాన్‌ను తదుపరి ఉక్రెయిన్‌గా ఎప్పటికీ అనుమతించబోనని అతను స్పష్టం చేశాడు.
అయితే ప్రతిపక్ష నాయకులు మాత్రం టెర్రీ గౌను చైనా ఏజెంట్‌గా చెబుతున్నారు.
ఫాక్స్‌కాన్ చైనాలో భారీ ఫ్యాక్టరీలను నిర్మించింది. బీజింగ్‌లోని నాయకత్వంతో అతనికి సన్నిహత సంబంధాలు ఉన్నాయని విమర్శలు ఉన్నాయి. అయితే టెర్రీ గౌ ఈ ఆరోపణలను ఖండిస్తున్నారు.
తాను తాను నాలుగేళ్లుగా ఫాక్స్‌కాన్ నిర్వహణలో పాలుపంచుకోవడం లేదని గౌ చెప్పారు.