Miss Universe 2024: మిస్ యూనివర్స్ 2024.. విజేతగా డెన్మార్క్ కు చెందిన యువతి
73వ మిస్ యూనివర్స్ 2024 పోటీలో విజేతగా డెన్మార్క్‌కు చెందిన 21 ఏళ్ల విక్టోరియా క్జెర్ థెల్విగ్ నిలిచింది. ఆమె ఈ ఏడాది మిస్ యూనివర్స్ కిరీటాన్ని సొంతం చేసుకుంది. మొదటి రన్నరప్‌గా నైజీరియాకు చెందిన చిడిన్మా అడెత్షినా, రెండో రన్నరప్‌గా మెక్సికోకు చెందిన మరియా ఫెర్నాండా బెల్ట్రాన్ ఎంపికయ్యారు. ఇక మూడో రన్నరప్‌గా థాయ్‌లాండ్‌కు చెందిన ఒపాల్ సుచతా చువాంగ్‌స్రీ, నాల్గో రన్నరప్‌గా వెనిజులాకు చెందిన ఇలియానా మార్క్వెజ్ ఉన్నారు. ఈ ఏడాది మిస్ యూనివర్స్ పోటీలు మెక్సికోలో జరిగాయి. ఇండియాకు చెందిన రియా సింఘా గ్రాండ్ ఫినాలేలో పాల్గొన్నారు. ఆమె టాప్ 30లో స్థానం సంపాదించుకుంది. 73వ మిస్ యూనివర్స్ పోటీల్లో ఈసారి చరిత్రలోనే అత్యధికంగా 125 ఎంట్రీలు నమోదయ్యాయి.
కిరీటానికి 'లూమియర్ డి ఎల్ ఇన్ఫిని' గా నామకరణం
ఇది 2018లో నమోదైన 94 ఎంట్రీల రికార్డును అధిగమించింది. గతేడాది నికరాగ్వాకు చెందిన షెన్నిస్ పలాసియోస్ మిస్ యూనివర్స్ విజేతగా నిలిచారు. మిస్ యూనివర్స్ 2024 కిరీటం ఈసారి ప్రత్యేకంగా ఉండటంతో, దీనికి 'లూమియర్ డి ఎల్ ఇన్ఫిని' అనే పేరు పెట్టారు. ఈ కిరీటం మహిళల సాధికారతను ప్రతిబింబిస్తుందని నిర్వాహకులు తెలిపారు. వజ్రాలతో పాటు 23 బంగారు ముత్యాలతో ఈ కిరీటాన్ని రూపొందించారు. ఫిలిపినో కళాకారులు 2 సంవత్సరాలపాటు సాంప్రదాయ పద్ధతులను ఉపయోగించి దీనిని తయారు చేశారు.
