Pennsylvania Shooting: అమెరికాలో మరోసారి కాల్పులు కలకలం.. ముగ్గురు పోలీసులు మృతి
ఈ వార్తాకథనం ఏంటి
అమెరికాలో మళ్లీ కాల్పుల ఘటన కలకలం రేపింది. పెన్సిల్వేనియాలోని (Pennsylvania) నార్త్‌ కొడోరస్‌ టౌన్‌షిప్‌లో ఒక దుండగుడు పోలీసులను లక్ష్యంగా చేసుకుని కాల్పులకు తెగబడ్డాడు. ఈ దాడిలో ముగ్గురు పోలీసు అధికారులు అక్కడికక్కడే ప్రాణాలు కోల్పోయారు. మరో ఇద్దరు తీవ్రంగా గాయపడ్డారు. దాడి జరుగుతున్న సమయంలోనే పోలీసులు ప్రతిదాడి చేయగా, దుండగుడు కూడా అక్కడికక్కడే మృతి చెందినట్లు అధికారులు ధృవీకరించారు. ఈ కాల్పుల వెనుక కారణాలు ఇంకా వెలుగులోకి రాలేదని, పూర్తి స్థాయి దర్యాప్తు జరుగుతుందని వారు వివరించారు. ఈ ఘటనపై సమగ్రంగా విచారణ చేపడతామని పెన్సిల్వేనియా స్టేట్‌ పోలీస్‌ కమిషనర్‌ క్రిస్టొఫర్‌ పారిస్‌ స్పష్టం చేశారు.
వివరాలు
హింసాత్మక చర్యలకు సమాజంలో చోటులేదు: జోష్‌ షపిరో
ఈ ఘటనపై పెన్సిల్వేనియా గవర్నర్‌ జోష్‌ షపిరో తీవ్ర దిగ్భ్రాంతి వ్యక్తం చేశారు. తమ రాష్ట్రం, దేశం కోసం విధుల్లో ఉన్న విలువైన పోలీసు అధికారులను కోల్పోవడం ఎంతో బాధాకరమని పేర్కొన్నారు. ఇటువంటి హింసాత్మక చర్యలకు సమాజంలో చోటులేదని ఆయన ఖండించారు. భవిష్యత్తులో మెరుగైన, శాంతియుత సమాజ నిర్మాణం కోసం అందరూ కలసి కృషి చేయాలని పిలుపునిచ్చారు.