Trump Tariffs: ట్రంప్ టారిఫ్లకు బ్రేక్.. రూ.9.5 లక్షల కోట్ల రీఫండ్ ప్రారంభం
ఈ వార్తాకథనం ఏంటి
ప్రపంచ దేశాలపై అమెరికా అధ్యక్షుడు డొనాల్డ్ ట్రంప్ విధించిన దిగుమతి సుంకాల వ్యవహారంలో కీలక పరిణామం చోటుచేసుకుంది. ట్రంప్ అమలు చేసిన టారిఫ్లను అమెరికా సుప్రీంకోర్టు చెల్లవని ప్రకటించిన నేపథ్యంలో, ఆ సుంకాల కింద వసూలు చేసిన మొత్తాన్ని అమెరికా ప్రభుత్వం దిగుమతిదారులకు తిరిగి చెల్లిస్తోంది. ఇప్పటికే 100 బిలియన్ డాలర్లు (భారత కరెన్సీలో రూ.9.5 లక్షల కోట్లకు పైగా) రీఫండ్ చేసినట్లు అధికారిక కోర్టు దాఖలాల్లో వెల్లడైంది. రెండోసారి అధ్యక్ష బాధ్యతలు చేపట్టిన అనంతరం ట్రంప్ అంతర్జాతీయ ఆర్థిక అత్యవసర అధికారాల చట్టం (International Emergency Economic Powers Act) ఆధారంగా పలు దేశాలపై భారీ దిగుమతి సుంకాలను అమలు చేశారు.
వివరాలు
100 బిలియన్ డాలర్లను దిగుమతిదారులకు తిరిగి చెల్లించిన ట్రంప్
ఈ నిర్ణయంతో వివిధ దేశాల నుంచి అమెరికాకు దిగుమతయ్యే వస్తువులపై అధిక టారిఫ్లు విధించగా, వాటి ద్వారా మొత్తం 166 బిలియన్ డాలర్ల మేర ఆదాయం సమకూరింది.
అయితే ఈ సుంకాల చట్టబద్ధతపై దాఖలైన పిటిషన్లను విచారించిన అమెరికా సుప్రీంకోర్టు, అధ్యక్షుడు తన అధికార పరిమితులను దాటి టారిఫ్లు విధించారని ఈ ఏడాది ఫిబ్రవరిలో తీర్పు వెలువరించింది.
అధిక సుంకాల పేరుతో కంపెనీల నుంచి వసూలు చేసిన మొత్తాన్ని తిరిగి చెల్లించాలని కేంద్ర ప్రభుత్వాన్ని ఆదేశించింది.
సుప్రీంకోర్టు ఆదేశాల మేరకు ఇప్పటివరకు 100 బిలియన్ డాలర్లను దిగుమతిదారులకు తిరిగి చెల్లించినట్లు ట్రంప్ ప్రభుత్వం కోర్టుకు సమర్పించిన పత్రాల్లో పేర్కొంది.
మిగిలిన మొత్తాల చెల్లింపుల ప్రక్రియ కూడా కొనసాగుతున్నట్లు సమాచారం.
వివరాలు
అమెరికా ఖజానాకు ప్రతిరోజూ సుమారు రూ.4,538 కోట్ల ఆదాయం
ఈ టారిఫ్లు అమల్లో ఉన్న సమయంలో అమెరికా ఖజానాకు ప్రతిరోజూ సుమారు రూ.4,538 కోట్ల ఆదాయం చేరినట్లు అప్పట్లో అంచనా వేశారు.
అయితే కోర్టు తీర్పుతో ఆ వసూళ్లలో పెద్ద భాగాన్ని తిరిగి చెల్లించాల్సిన పరిస్థితి ఏర్పడింది.
ఈ నిర్ణయం వల్ల చైనా, భారత్, జపాన్, దక్షిణ కొరియా, తైవాన్ వంటి ఆసియా దేశాల నుంచి అమెరికాకు ఎగుమతులు చేసే సంస్థలకు గణనీయమైన ఊరట లభించింది.
అధిక దిగుమతి సుంకాల భారం తగ్గడంతో అంతర్జాతీయ వాణిజ్యానికి కూడా ఇది సానుకూల పరిణామంగా భావిస్తున్నారు.