Trump: కెనడాతో ట్రంప్ ట్రేడ్ వార్.. బాంబార్డియర్ జెట్లపై అమెరికా కీలక హెచ్చరిక
ఈ వార్తాకథనం ఏంటి
అమెరికా-కెనడా మధ్య వాణిజ్య వివాదం రోజురోజుకూ తీవ్ర రూపం దాల్చుతోంది. తాజాగా కెనడాకు చెందిన ప్రముఖ ప్రైవేట్ జెట్ తయారీ సంస్థ బాంబార్డియర్పై అమెరికా అధ్యక్షుడు డొనాల్డ్ ట్రంప్ తీవ్ర ఆగ్రహం వ్యక్తం చేశారు. అమెరికా మార్కెట్లో జెట్లను విక్రయించాలంటే వాటిని అమెరికాలోనే తయారు చేయాలని స్పష్టం చేశారు. లేదంటే దేశంలో బాంబార్డియర్ జెట్ల అమ్మకాలను అనుమతించబోమని హెచ్చరించారు.
వివరాలు
ట్రూత్ సోషల్లో ట్రంప్ ఘాటు వ్యాఖ్యలు
ట్రూత్ సోషల్లో తాజాగా చేసిన పోస్టులో ట్రంప్ బాంబార్డియర్ను లక్ష్యంగా చేసుకున్నారు.
అమెరికాలో ఇకపై బాంబార్డియర్ విక్రయాలు ఉండవని, అమెరికా మార్కెట్లో కొనసాగాలంటే ఉత్పత్తులను 'ఇక్కడే తయారు చేయాలి' అని పేర్కొన్నారు.
అమెరికాను 'పిగ్గీ బ్యాంక్'లా ఉపయోగించుకోవద్దంటూ సంస్థపై విమర్శలు గుప్పించారు.
అంతేకాదు.. బాంబార్డియర్ తయారు చేసే ఉత్పత్తుల నాణ్యతపైనా అసంతృప్తి వ్యక్తం చేశారు.
వివరాలు
కెనడా ప్రతీకార సుంకాలు
అమెరికా విధిస్తున్న టారిఫ్లకు ప్రతిస్పందనగా కెనడా మంగళవారం నుంచి కొత్త సుంకాలను అమలు చేయనుంది.
అమెరికా నుంచి దిగుమతి చేసుకునే వందలాది ఉత్పత్తులపై గరిష్ఠంగా 50 శాతం వరకు టారిఫ్లు విధించనుంది.
అల్యూమినియం ఫాయిల్, రెయిన్కోట్లు, చీజ్ వంటి అనేక వస్తువులు ఈ కొత్త సుంకాల పరిధిలోకి రానున్నాయి.
మొత్తంగా సుమారు 20 బిలియన్ డాలర్ల విలువైన అమెరికా ఉత్పత్తులపై ఈ టారిఫ్లు ప్రభావం చూపనున్నాయి.
మంగళవారం అర్ధరాత్రి నుంచి కొత్త సుంకాలు అమల్లోకి రానున్నాయి.
దీంతో ఇప్పటికే ఉద్రిక్తంగా ఉన్న అమెరికా-కెనడా వాణిజ్య సంబంధాలు మరింత దెబ్బతినే అవకాశం ఉంది.
కెనడా ప్రతీకార సుంకాలపై ట్రంప్ కూడా తీవ్రంగా స్పందిస్తున్నారు. అవసరమైతే అమెరికా మరింత కఠిన చర్యలు తీసుకుంటుందని హెచ్చరిస్తున్నారు.
వివరాలు
కెనడా ప్రతీకార సుంకాలు
కెనడాలో తయారయ్యే కార్లు, ఆటో విడిభాగాలపై ప్రస్తుతం ఉన్న 25 శాతం టారిఫ్ను 50 శాతానికి పెంచుతామని ట్రంప్ గత నెలలోనే ప్రకటించారు.
ఈ పెంపు జనవరి నుంచి అమల్లోకి వస్తుందని తెలిపారు. 'మనకు కెనడా అవసరం లేదు.. వారికి మనమే అవసరం' అంటూ ట్రంప్ గతంలో చేసిన వ్యాఖ్యలు కూడా ఇరుదేశాల మధ్య పెరుగుతున్న వాణిజ్య ఉద్రిక్తతలను స్పష్టం చేస్తున్నాయి.
వివరాలు
అమెరికాలో బాంబార్డియర్కు భారీ వ్యాపారం
బాంబార్డియర్పై ట్రంప్ తాజా హెచ్చరిక ఆ సంస్థకు కీలకపరిణామంగా మారింది.
అయితే అమెరికాతో కంపెనీకి చాలా కాలంగా బలమైన వ్యాపార సంబంధాలు ఉన్నాయి.
మాంట్రియల్ కేంద్రంగా కార్యకలాపాలు నిర్వహించే బాంబార్డియర్కు అమెరికాలో సుమారు 3,500మంది ఉద్యోగులు ఉన్నారు.
దాదాపు 2,800మంది అమెరికా సరఫరాదారులతో సంస్థకు వ్యాపార సంబంధాలు ఉన్నాయి.
అమెరికాలో ఇప్పటికే పలు ఫ్యాక్టరీలు, సర్వీస్ సెంటర్లను బాంబార్డియర్ నిర్వహిస్తోంది. మరో సర్వీస్ సెంటర్ను కూడా అక్కడ ఏర్పాటు చేస్తోంది.
సంస్థకు చెందిన ఫ్లాగ్షిప్ గ్లోబల్ 8000బిజినెస్ జెట్ రెక్కలను టెక్సాస్లో తయారు చేస్తున్నారు.
రక్షణ రంగ కార్యకలాపాల కోసం కాన్సాస్లో ప్రత్యేక కేంద్రాన్ని కూడా కంపెనీ నిర్వహిస్తోంది.
బాంబార్డియర్ కస్టమర్లు ప్రపంచవ్యాప్తంగా నిర్వహిస్తున్న సుమారు 5,100విమానాల్లో దాదాపు సగం అమెరికాలోనే ఉన్నాయి.
వివరాలు
అమెరికా సంస్థలపై ఆధారపడుతున్న బాంబార్డియర్
దీంతో అమెరికా మార్కెట్ ఆ సంస్థకు అత్యంత ముఖ్యమైన మార్కెట్లలో ఒకటిగా ఉంది.
అమెరికా,కెనడా విమానయాన రంగాలు ఎంతగా పరస్పరం అనుసంధానమై ఉన్నాయో బాంబార్డియర్ వ్యవహారం తెలియజేస్తోంది.
సంస్థ తయారు చేసే బిజినెస్ జెట్లలో వినియోగించే అనేక ఇంజిన్లను అమెరికాకు చెందిన హనీవెల్ ఏరోస్పేస్, జీఈ ఏరోస్పేస్ సంస్థలు తయారు చేస్తున్నాయి.
విమానాలు, వాటి విడిభాగాల సరఫరా విషయంలోనూ అమెరికా, కెనడా కంపెనీలు ఒకదానిపై మరొకటి ఆధారపడుతున్నాయి.
ఇప్పటివరకు ఈ పరస్పర ఆధారిత వ్యవస్థ కారణంగా ఏరోస్పేస్ రంగంపై టారిఫ్ల ప్రభావం పెద్దగా కనిపించలేదు.
అమెరికా ఏరోస్పేస్ ఇండస్ట్రీస్ అసోసియేషన్ గణాంకాల ప్రకారం.. 2025లో అమెరికా ఏరోస్పేస్, రక్షణ రంగం 109.2 బిలియన్ డాలర్ల వాణిజ్య మిగులును నమోదు చేసింది.
వివరాలు
గతంలోనూ బాంబార్డియర్పై ట్రంప్ గురి
అంటే ఒక దేశం దిగుమతుల ద్వారా ఖర్చు చేసిన విలువ కంటే ఎగుమతుల ద్వారా ఎక్కువ ఆదాయం పొందడాన్ని ట్రేడ్ సర్ప్లస్ అంటారు.
ఇదే సమయంలో అమెరికా ఏరోస్పేస్, రక్షణ రంగ ఎగుమతులు అంతకుముందు ఏడాదితో పోలిస్తే 25 శాతం పెరిగాయి.
బాంబార్డియర్పై ట్రంప్ విమర్శలు చేయడం ఇదే తొలిసారి కాదు.ఈ ఏడాది జనవరిలోనూ ఆయన సంస్థను లక్ష్యంగా చేసుకున్నారు.
బాంబార్డియర్ గ్లోబల్ ఎక్స్ప్రెస్ బిజినెస్ జెట్లకు ఇచ్చిన అమెరికా ధ్రువీకరణను రద్దు చేస్తామని అప్పట్లో హెచ్చరించారు.
కెనడాలో తయారయ్యే విమానాలపై 50 శాతం సుంకాలు విధిస్తామని కూడా ప్రకటించారు.
అయితే ఇప్పుడు చేసిన తాజా హెచ్చరికను అమెరికా ప్రభుత్వం ఏ విధంగా అమలు చేస్తుందన్నదానిపై ఇంకా స్పష్టత లేదు.
వివరాలు
ఇరుదేశాలకూ తప్పని నష్టమా?
అమెరికా ఫెడరల్ ఏవియేషన్ అడ్మినిస్ట్రేషన్(ఎఫ్ఏఏ)నుంచి ఇప్పటికే అనుమతులు పొందిన బాంబార్డియర్ విమానాల డెలివరీలను కూడా నిలిపివేస్తారా? అన్నది ప్రశ్నగా మారింది.
ట్రంప్ వ్యాఖ్యలపై బాంబార్డియర్ నుంచి ఇప్పటివరకు ఎలాంటి తక్షణ స్పందన వెలువడలేదు.
అమెరికా-కెనడా మధ్య వాణిజ్య సంబంధాలు ఇరుదేశాల ఆర్థిక వ్యవస్థలకు అత్యంత ప్రాధాన్యమైనవి.
2026 తొలి ఆరు నెలల్లో అమెరికా కెనడాకు 175.8బిలియన్ డాలర్ల విలువైన వస్తువులను ఎగుమతి చేసింది.
అమెరికా మొత్తం ఎగుమతుల్లో కెనడా వాటా 14శాతంగా ఉంది.
ప్రస్తుతం ఇరుదేశాల మధ్య రాకపోకలు సాగించే వస్తువుల్లో కొద్దిపాటి ఉత్పత్తులపైనే టారిఫ్లు అమల్లో ఉన్నాయి.
అయితే వాణిజ్య వివాదం మరింత విస్తరిస్తే అమెరికా,కెనడా వ్యాపార సంస్థలతో పాటు వినియోగదారులపైనా అదనపు భారం పడే అవకాశం ఉందని నిపుణులు హెచ్చరిస్తున్నారు.