Donald Trump: ట్రంప్ మరో సంచలన నిర్ణయం.. హార్వర్డ్‌లో విదేశీ విద్యార్థులపై నిషేధం
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ సంచలనాత్మక నిర్ణయం తీసుకున్నారు.
ప్రపంచ ప్రఖ్యాతి గాంచిన హార్వర్డ్ విశ్వవిద్యాలయంలో చదువుకోవడానికి విదేశీ విద్యార్థులు ఇకపై అమెరికాలోకి ప్రవేశించకూడదని, ఈ మేరకు బుధవారం ఆయన ఒక కార్యనిర్వాహక ఉత్తర్వుపై సంతకం చేశారు.
ఈ తాజా చర్య ఇప్పటికే హార్వర్డ్ విశ్వవిద్యాలయం, ట్రంప్ ప్రభుత్వాల మధ్య కొనసాగుతున్న గోప్యమైన వివాదానికి మరింత మంటపెట్టినట్లయింది.
ఈ ఉత్తర్వు ప్రకారం, హార్వర్డ్‌కు సంబంధం ఉన్న అంతర్జాతీయ విద్యార్థుల వీసాలను రద్దు చేసే ప్రక్రియను ప్రారంభించే అధికారాన్ని విదేశాంగ మంత్రి మార్కో రూబియోకు అప్పగించారు.
ఇది అమెరికా ఉన్నత విద్యావ్యవస్థలో, ముఖ్యంగా విదేశీ విద్యార్థుల ప్రవేశ వ్యవహారంలో ఒక కీలక మలుపుగా భావిస్తున్నారు.
వివరాలు
ట్రంప్ కొత్త ఉత్తర్వుతో మరోమారు చర్చ
ఇదిలా ఉండగా, ఇటీవల హార్వర్డ్ క్యాంపస్‌లో యూదులకు వ్యతిరేకత, పౌరహక్కుల ఉల్లంఘనల ఆరోపణల నేపథ్యంలో, హార్వర్డ్ విదేశీ విద్యార్థులను చేర్చుకునే హక్కును రద్దు చేయాలని హోంల్యాండ్ సెక్యూరిటీ శాఖ చేసిన ప్రయత్నాన్ని ఒక ఫెడరల్ న్యాయమూర్తి అడ్డుకున్న సంగతి విదితమే.
ఇప్పుడు ట్రంప్ కొత్త ఉత్తర్వుతో మరోమారు చర్చలకు తావిచ్చారు. వైట్ హౌస్ విడుదల చేసిన ప్రకటనలో ఈ కార్యనిర్వాహక ఉత్తర్వుకు సంబంధించి పలు కారణాలను పేర్కొన్నారు.
హార్వర్డ్ క్యాంపస్‌లో యూదు వ్యతిరేకత పెరుగుతుండటం, విశ్వవిద్యాలయం డైవర్సిటీ, ఈక్విటీ, ఇన్‌క్లూజన్ (DEI) కార్యక్రమాలను ప్రోత్సహించటం, క్యాంపస్ నేరాల రేటు పెరగడం, ఫెడరల్ డేటా అభ్యర్థనలపై హార్వర్డ్ అనుసరిస్తున్న నిర్లక్ష్య ధోరణి వంటి అంశాలను ఉదహరించారు.
వివరాలు
ఈ నిషేధంపై ఇంకా అధికారికంగా స్పందించ‌ని హార్వర్డ్
తాజాగా ట్రంప్ ప్రభుత్వం ఆఫ్రికా, మధ్యప్రాచ్యంలోని 12 దేశాల నుంచి ప్రవేశాన్ని పూర్తిగా నిషేధించేందుకు, మరో ఏడింటి నుంచి ప్రవేశాన్ని పరిమితం చేయడానికి చేసిన ప్రయత్నాల సరసన ఈ ఉత్తర్వు నిలుస్తోంది.
ఈ చర్యపై హార్వర్డ్ విశ్వవిద్యాలయం ఇప్పటివరకు ఎటువంటి అధికారిక ప్రకటన విడుదల చేయలేదు.
ప్రపంచస్థాయి విద్య, నైపుణ్యం కోసం విభిన్న దేశాల విద్యార్థులపై ఆధారపడే హార్వర్డ్, గతంలోనూ ఇటువంటి ఫెడరల్ పరిమితులను చట్టపరంగా సవాలు చేసింది.
ఇప్పుడు కూడా అదే దిశగా స్పందించే అవకాశం ఉందని నిపుణులు అంచనా వేస్తున్నారు.
వివరాలు
ట్రంప్ చర్యపై విద్యా, దౌత్య వర్గాల్లో తీవ్ర ఆందోళన
ట్రంప్ నిర్ణయం విద్యా రంగంతో పాటు, దౌత్య రంగంలోనూ తీవ్ర దుమారం రేపింది.
ఇది విద్యాస్వేచ్ఛకు వ్యతిరేకంగా నిలుస్తుందని, అంతర్జాతీయ స్థాయిలో ఉన్నత విద్య, పరిశోధనలో అమెరికాకు ఉన్న ఖ్యాతిని పాడు చేస్తుందని విమర్శకులు గట్టిగా అభిప్రాయపడుతున్నారు.
ఈ ఉత్తర్వుపై న్యాయపరమైన సవాళ్లు తలెత్తే అవకాశం ఉన్నందున, దీని ప్రభావం హార్వర్డ్‌తో పాటు ఇతర అమెరికా విశ్వవిద్యాలయాల్లో అంతర్జాతీయ విద్యార్థుల ప్రవేశంపై ఎలా ప్రభావం చూపుతుందో స్పష్టంగా చెప్పలేని పరిస్థితి నెలకొంది.