Trump: ఇరాన్ యుద్ధం ప్రభావం.. ఆయుధాల ఉత్పత్తి పెంచాలని ట్రంప్ కీలక ఆదేశాలు
ఈ వార్తాకథనం ఏంటి
ఇరాన్తో జరిగిన యుద్ధం అమెరికా ఆయుధ నిల్వలపై తీవ్ర ప్రభావం చూపిన నేపథ్యంలో అధ్యక్షుడు డొనాల్డ్ ట్రంప్ కీలక నిర్ణయం తీసుకున్నారు. దేశ రక్షణ అవసరాల కోసం ఆయుధాలు,క్షిపణులు,ఇతర రక్షణ సామగ్రి ఉత్పత్తిని పెంచాలని రక్షణ రంగ సంస్థలకు ఆదేశాలు జారీ చేశారు. ఇందుకోసం అమెరికాలో అమల్లో ఉన్న డిఫెన్స్ ప్రొడక్షన్ యాక్ట్ (డీపీఏ)ను అమలు చేశారు. గత వారం ట్రంప్ సంతకం చేసిన ఉత్తర్వుల్లో దేశ భద్రతకు ముప్పు కలిగించే పరిస్థితులు నెలకొన్నాయని పేర్కొన్నారు. ముఖ్యంగా ఆయుధాల తయారీ రంగంలో ఉత్పత్తి సామర్థ్యం తక్కువగా ఉండటం,సరఫరా వ్యవస్థ బలహీనంగా ఉండటం,కీలక ముడిసరుకుల కొరత,ఉత్పత్తిలో జాప్యం వంటి సమస్యలు అమెరికా రక్షణ సన్నద్ధతపై ప్రభావం చూపే అవకాశం ఉందని వెల్లడించారు.
వివరాలు
ఇజ్రాయెల్,ఉక్రెయిన్లకు పెద్దఎత్తున ఆయుధాలు
ఈ ఉత్తర్వులను రక్షణ శాఖ మంత్రి పీట్ హెగ్సెత్కు పంపించారు. ప్రైవేట్ కంపెనీలను నేరుగా ఆయుధాల తయారీ పెంచాలని ప్రభుత్వం ఆదేశించడం అమెరికాలో కీలక పరిణామంగా భావిస్తున్నారు. ఇరాన్ యుద్ధంతో పాటు గాజా,ఉక్రెయిన్ యుద్ధాల సమయంలో అమెరికా తన మిత్రదేశాలైన ఇజ్రాయెల్,ఉక్రెయిన్లకు పెద్దఎత్తున ఆయుధాలు అందించడంతో నిల్వలు తగ్గినట్లు విశ్లేషకులు చెబుతున్నారు. అమెరికా రక్షణ శాఖ పెంటగాన్కు చాలా కాలంగా ఆయుధాల తయారీ వేగంపై ఆందోళనలు ఉన్నాయి. ఇరాన్ యుద్ధంలో కీలక క్షిపణులు భారీగా వినియోగించడంతో ఈ సమస్య మరింత పెరిగిందని నిపుణులు అభిప్రాయపడుతున్నారు. ఇరాన్తో యుద్ధంలో చివరి రెండు రోజులు తీవ్ర స్థాయిలో పోరు జరిగిందని ట్రంప్ పేర్కొన్నారు. ఆ సమయంలో దాదాపు 200మిలియన్ డాలర్ల విలువైన బాంబులను వినియోగించినట్లు వెల్లడించారు.
వివరాలు
ఆయుధ నిల్వల తగ్గుదలపై పెంటగాన్ ఆందోళన
అయితే, అమెరికా ఆయుధ నిల్వల విషయంలో ఎలాంటి సంక్షోభం లేదని రక్షణ మంత్రి పీట్ హెగ్సెత్ బహిరంగంగా పేర్కొన్నారు. మీడియా దీనిని అతిశయోక్తిగా ప్రచారం చేస్తోందని వ్యాఖ్యానించారు. కానీ అంతర్గతంగా మాత్రం ఆయుధ నిల్వల తగ్గుదలపై పెంటగాన్ ఆందోళన వ్యక్తం చేస్తున్నట్లు నివేదికలు సూచిస్తున్నాయి. తాజాగా విడుదలైన సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్ (సీఎస్ఐఎస్) నివేదిక ప్రకారం, అమెరికా తన ప్రెసిషన్ స్ట్రైక్ క్షిపణుల్లో కనీసం 45 శాతం వినియోగించింది. అలాగే పేట్రియట్ వైమానిక రక్షణ వ్యవస్థ, థాడ్ క్షిపణుల నిల్వల్లో సగానికి పైగా ఖర్చు చేసినట్లు అంచనా వేసింది.
వివరాలు
దేశీయ ఖనిజ ఉత్పత్తి పెంపునకు.. 1950 దశకంలో రూపొందించిన డిఫెన్స్ ప్రొడక్షన్ యాక్ట్
1950 దశకంలో రూపొందించిన డిఫెన్స్ ప్రొడక్షన్ యాక్ట్ ద్వారా జాతీయ భద్రతకు అవసరమైన వస్తువుల ఉత్పత్తికి ప్రభుత్వం ప్రైవేట్ సంస్థలకు ప్రత్యేక ఆదేశాలు జారీ చేయవచ్చు. కీలక ముడిసరుకుల ఉత్పత్తిని ప్రోత్సహించడంతో పాటు రక్షణ రంగ ఒప్పందాలకు ప్రాధాన్యం కల్పించే అధికారాలు కూడా అధ్యక్షుడికి ఈ చట్టం ద్వారా లభిస్తాయి. కరోనా మహమ్మారి సమయంలో వెంటిలేటర్ల తయారీ కోసం ట్రంప్ ఈ చట్టాన్ని ఉపయోగించారు. అలాగే దేశీయ ఖనిజ ఉత్పత్తి పెంపునకు కూడా దీనిని అమలు చేశారు. మాజీ అధ్యక్షుడు జో బైడెన్ సైతం స్వచ్ఛ ఇంధన సాంకేతికతల ఉత్పత్తిని వేగవంతం చేసేందుకు ఇదే చట్టాన్ని వినియోగించారు.
వివరాలు
తగ్గిన నిల్వలను భర్తీ చేయడానికి ఒకటి నుంచి నాలుగేళ్ల వరకు సమయం
ఇరాన్ యుద్ధానికి ముందే అమెరికా జాయింట్ చీఫ్స్ ఆఫ్ స్టాఫ్ చైర్మన్ జనరల్ డాన్ కేన్, యుద్ధం ఎక్కువ కాలం కొనసాగితే అమెరికా ఆయుధ నిల్వలపై ప్రభావం పడే అవకాశం ఉందని హెచ్చరించినట్లు సమాచారం. ప్రస్తుతం తగ్గిన నిల్వలను భర్తీ చేయడానికి ఒకటి నుంచి నాలుగేళ్ల వరకు సమయం పట్టవచ్చని రక్షణ నిపుణులు అంచనా వేస్తున్నారు. ఈ నేపథ్యంలో అమెరికా రక్షణ సామర్థ్యాన్ని మరింత బలోపేతం చేయడమే లక్ష్యంగా ట్రంప్ ఈ నిర్ణయం తీసుకున్నట్లు విశ్లేషకులు భావిస్తున్నారు.