US-Iran Peace Treaty: అమెరికా- ఇరాన్ యుద్ధానికి ముగింపు.. MoUలపై సంతకాలు!
ఈ వార్తాకథనం ఏంటి
అమెరికా, ఇరాన్ మధ్య నెలకొన్న ఉద్రిక్తతలకు ముగింపు పలుకుతూ ఇరు దేశాలు శాంతి ఒప్పందంపై సంతకాలు చేశాయి. అమెరికా అధ్యక్షుడు డొనాల్డ్ ట్రంప్, ఇరాన్ అధ్యక్షుడు మసౌద్ పెజెష్కియాన్ బుధవారం డిజిటల్ విధానంలో ఈ ఒప్పందంపై సంతకాలు చేసినట్లు అధికారికంగా ప్రకటించారు. ఈ ఒప్పందం బుధవారం నుంచే అమల్లోకి వచ్చినట్లు సమాచారం. మూడు నెలలుగా కొనసాగుతున్న యుద్ధం ముగియడంతో పాటు ప్రపంచ వాణిజ్యానికి కీలకమైన హోర్ముజ్ జలసంధిని త్వరలోనే తిరిగి తెరవనున్నట్లు తెలుస్తోంది. జీ7 సదస్సులో పాల్గొనేందుకు ఫ్రాన్స్ వెళ్లిన డొనాల్డ్ ట్రంప్, అక్కడి చారిత్రక వర్సైల్లెస్ ప్యాలెస్లో శాంతి ఒప్పందంపై సంతకం చేశారు. అనంతరం మీడియాతో మాట్లాడుతూ.. ''శాంతి ఒప్పంద ప్రక్రియ పూర్తయింది. ఇప్పుడే వర్సైల్లెస్లో సంతకం చేశాను'' అని వెల్లడించారు.
వివరాలు
మాట తప్పితే మళ్లీ దాడులే..
ఇదే విషయంపై ఇరాన్ విదేశాంగ మంత్రిత్వ శాఖ ప్రతినిధి ఎస్మాయిల్ బఘేయ్ స్పందించారు. ప్రభుత్వ అధికారిక వార్తా సంస్థ ఐఆర్ఎన్ఏ (IRNA)తో మాట్లాడుతూ.. రెండు దేశాల అధ్యక్షుల సంతకాలతో ఇస్లామాబాద్ అవగాహన ఒప్పందం అమల్లోకి వచ్చిందని, ఇప్పుడు దాని అమలును పరిశీలించే సమయం ప్రారంభమైందని తెలిపారు. శాంతి ఒప్పందంపై సంతకం చేయడానికి ముందు అమెరికా అధ్యక్షుడు ట్రంప్ చేసిన వ్యాఖ్యలు ప్రపంచవ్యాప్తంగా చర్చకు దారితీశాయి. ఒప్పందంలోని నిబంధనలను ఇరాన్ పాటించకపోతే మరోసారి కఠిన సైనిక చర్యలు తీసుకుంటామని ఆయన హెచ్చరించారు.
వివరాలు
శాంతి ఒప్పందాన్ని నిజాయితీగా అమలు చేయాల్సిన బాధ్యత ఇరాన్పైనే..
అవగాహన ఒప్పందం ఇంకా పూర్తిస్థాయి తుది ఒప్పందం కాదని, ఒకవేళ అది తన అంచనాలకు అనుగుణంగా లేకపోయినా లేదా ఇరాన్ దానికి కట్టుబడి ఉండకపోయినా అమెరికా మళ్లీ ఇరాన్పై బాంబు దాడులు చేయడానికి వెనుకాడదని ట్రంప్ స్పష్టం చేశారు. గత 47 ఏళ్లుగా ఇరాన్ మోసపూరిత వైఖరిని ప్రదర్శిస్తోందని ఆరోపించిన ఆయన, శాంతి ఒప్పందాన్ని నిజాయితీగా అమలు చేయాల్సిన బాధ్యత ఇరాన్పైనే ఉందని పేర్కొన్నారు. మూడు నెలల యుద్ధానికి ముగింపు పలికిన ఈ శాంతి ఒప్పందం పశ్చిమాసియాలో శాంతి స్థాపనకు ఎంతవరకు దోహదపడుతుందనేది రానున్న రోజుల్లో తేలనుంది.
ట్విట్టర్ పోస్ట్ చేయండి
అమెరికా-ఇరాన్ మధ్య శాంతి ఒప్పందం.. ట్రంప్ కీలక ప్రకటన
🚨 President Donald J. Trump has SIGNED the Iran Memorandum of Understanding at Versailles in France. 🇺🇸 pic.twitter.com/JQ6qlbvFAF
— The White House (@WhiteHouse) June 17, 2026