Trump-Musk: అంతరిక్ష సంబంధిత ప్రభుత్వ నిర్ణయాల్లో మస్క్ జోక్యం ఉండదు: ట్రంప్
ఈ వార్తాకథనం ఏంటి
రెండోసారి అధ్యక్ష పదవిని చేపట్టిన డొనాల్డ్ ట్రంప్ (Donald Trump) తన ప్రభుత్వంలో ప్రపంచ ప్రముఖ పారిశ్రామికవేత్త ఎలాన్ మస్క్ (Elon Musk) కు కీలక బాధ్యతలు అప్పగించిన విషయం తెలిసిందే. ఈ నేపథ్యంలో, ట్రంప్ పాలనలో మస్క్ పాత్ర గురించి వచ్చిన ప్రశ్నకు అధ్యక్షుడు ఆసక్తికరమైన సమాధానం ఇచ్చారు. అంతరిక్ష సంబంధమైన వ్యవహారాల్లో మస్క్ జోక్యం ఉండదని ఆయన స్పష్టం చేశారు. "మస్క్ నిర్వహిస్తున్న వ్యాపారాలతో సంబంధం ఉన్న శాఖలకు ఆయన దూరంగా ఉంటారు. అంతరిక్ష సంబంధమైన నిర్ణయాల్లో ఆయన జోక్యం ఉండదు" అని ఓ విలేకరి అడిగిన ప్రశ్నకు ట్రంప్ సమాధానమిచ్చారు.
వివరాలు
ఇంటర్వ్యూలో పలు ఆసక్తికర విషయాలను వెల్లడించిన మస్క్,ట్రంప్
ఇక,మస్క్,ట్రంప్ కలిసి ఓ మీడియా సంస్థకు ఇచ్చిన ఇంటర్వ్యూలో పలు ఆసక్తికర విషయాలను వెల్లడించారు. డోజ్‌నిర్వహణకు మస్క్ కంటే తెలివైన వ్యక్తి కోసం తాను వెతికానని,ఎవరూ దొరక్కపోవడంతో ఆయన్నే ఎంపిక చేశానని ట్రంప్ వెల్లడించారు. ప్రభుత్వశాఖల్లో వృథా ఖర్చును మస్క్ తగ్గిస్తారని తనకు నమ్మకం ఉందని అన్నారు. అంతేకాక,ఎగ్జిక్యూటివ్‌ ఆర్డర్‌ల అమలులో డోజ్‌ టీమ్ సమర్థవంతంగా పనిచేస్తుందని ట్రంప్ అభిప్రాయపడ్డారు. ఇదిలా ఉండగా,క్యాపిటల్‌ భవనం దాడి నేపథ్యంలో ఎక్స్ ఖాతా నిషేధంపై ట్రంప్ వేసిన దావాపై మస్క్ రాజీకి వచ్చినట్లు వార్తలు వచ్చాయి. అయితే,ఇటీవలి పరిణామాల్లో ఇద్దరూ ఈ వార్తలను ఖండించారు.ఇది న్యాయపరమైన అంశమని మస్క్ స్పష్టం చేయగా,తాను మస్క్ నుంచి మరింత ఎక్కువ మొత్తంలో పరిహారం ఆశిస్తున్నట్లు ట్రంప్ సరదాగా వ్యాఖ్యానించారు.
వివరాలు
ట్రంప్ కొత్త ఉత్తర్వులు జారీ
అధ్యక్ష బాధ్యతలు చేపట్టిన తర్వాత ట్రంప్ ప్రభుత్వం ఏర్పాటు చేసిన "డిపార్ట్‌మెంట్‌ ఆఫ్‌ గవర్నమెంట్ ఎఫీషియెన్సీ"(DOGE) కు ఎలాన్ మస్క్‌ను సారథిగా నియమించారు. ప్రభుత్వ వ్యవస్థలో సమూల మార్పులు తీసుకురావడం, వృథా ఖర్చులను తగ్గించడం ఈ శాఖ లక్ష్యంగా పని చేస్తుందని ట్రంప్ పేర్కొన్నారు. ఈ ప్రక్రియలో భాగంగా వివిధ ప్రభుత్వ శాఖల్లో వేలాది ఉద్యోగులను తొలగించే చర్యలు కొనసాగుతున్నాయి. దీనితో, ట్రంప్ యంత్రాంగాన్ని మస్క్ వెనుకుండి నడిపిస్తున్నారనే విమర్శలు వెల్లువెత్తుతున్నాయి. ఫెడరల్ ఏజెన్సీలు డోజ్‌తో సంప్రదింపులు జరిపిన తర్వాతే ఉద్యోగుల తొలగింపు, నియామకాలపై నిర్ణయాలు తీసుకోవాలని ట్రంప్ కొత్త ఉత్తర్వులు జారీ చేశారు. ప్రతి ఏజెన్సీ ఉద్యోగుల తగ్గింపు ప్రణాళిక రూపొందించాలని, అవసరమైన సందర్భాల్లో మాత్రమే నియామకాలు చేపట్టాలని ఆదేశించారు.
వివరాలు
మస్క్ ప్రభుత్వంలో కేవలం ఒక సేవా ఉద్యోగి మాత్రమే
ఇదిలా ఉండగా, మస్క్ ప్రభుత్వంలో కేవలం ఒక సేవా ఉద్యోగి మాత్రమేనని వైట్‌హౌస్ (White House) తాజాగా స్పష్టం చేసింది. వైట్‌హౌస్‌లోని సీనియర్ సలహాదారుల మాదిరిగా స్వతంత్రంగా ప్రభుత్వ నిర్ణయాలను తీసుకునే అధికారం మస్క్‌కు లేదని వైట్‌హౌస్ వ్యవహారాల డైరెక్టర్ జోషువా ఫిషర్ పేర్కొన్నారు. న్యూమెక్సికో రాష్ట్ర ప్రభుత్వం మస్క్ నిర్ణయాలను వ్యతిరేకిస్తూ దాఖలు చేసిన ఒక కేసు విషయంలో వైట్‌హౌస్ ఈ వివరణ ఇచ్చింది.