వర్జీనియా: గ్రాడ్యుయేషన్ వేడుకలో కాల్పులు; ఇద్దరు మృతి
ఈ వార్తాకథనం ఏంటి
వర్జీనియాలోని రిచ్‌మండ్‌లో హైస్కూల్ గ్రాడ్యుయేషన్ వేడుకలో తుపాకీ కాల్పులు కలకలం సృష్టించాయి.
వేడుక వెలుపల గుంపుపై దుండగుడు ఏకంగా నాలుగు తుపాకులతో బుల్లెట్ల వర్షం కురిపించాడు.
ఈ ఘటనలో ఇద్దరు చనిపోయారు. మరో ఐదుగురు గాయపడ్డారు.
వర్జీనియా కామన్వెల్త్ యూనివర్శిటీ క్యాంపస్‌లోని థియేటర్‌లో హ్యూగెనాట్ హైస్కూల్ ప్రారంభోత్సవ వేడుకలో ఈ ఘటన జరగ్గా, నిందితుడిని వెంటనే అరెస్టు చేసినట్లు పోలీసులు తెలిపారు.
నిందితుడి వయసు 19 ఏళ్లు ఉన్నట్లు వెల్లడించారు. నిందితుడిపై ఇతర నేరాలతో పాటు సెకండ్-డిగ్రీ హత్యకు సంబంధించి రెండు అభియోగాలు మోపే అవకాశం ఉందని తాత్కాలిక రిచ్‌మండ్ పోలీస్ చీఫ్ రిక్ ఎడ్వర్డ్స్ విలేకరుల సమావేశంలో తెలిపారు.
తుపాకీ కాల్పులు
ఒక వ్యక్తిని లక్ష్యంగా చేసుకొని షూటర్ కాల్పులు
వాస్తవానికి ఒక వ్యక్తిని లక్ష్యంగా చేసుకొని షూటర్ కాల్పులు జరిపినట్లు పోలీస్ చీఫ్ ఎడ్వర్డ్స్ తెలిపారు. ఇదొక పిరికి చర్యగా ఆయన అభివర్ణించారు.
మృతులు 18, 36 సంవత్సరాల వయస్సు గల పురుషులని పోలీస్ చీఫ్ చెప్పారు.
ఈ గందరగోళంలో 9ఏళ్ల బాలికను కారు ఢీకొట్టింది. దీంతో ఆమెను వెంటనే ఆస్పత్రికి తరలించారు.
చివరికి నిందితుడిని అరెస్టు చేసి, అతని వద్ద నుంచి నాలుగు తుపాకులను స్వాధీనం చేసుకున్నట్లు పోలీసులు చెప్పారు.
పాఠశాలలు, షాపింగ్ కేంద్రాలు, చర్చిలు వంటి బహిరంగ ప్రదేశాల్లో సామూహిక కాల్పులు అమెరికాలో సర్వసాధారంగా జరుగుతుంటాయి.
గన్ వాయిలెన్స్ ఆర్చీవ్ ప్రకారం 2023లో 157 రోజుల్లోనే దేశంలో ఇది 279వ సామూహిక కాల్పులు కావడం గమనార్హం.