రహస్య పత్రాల కేసులో మియామీలోని ఫెడరల్ కోర్టులో లొంగిపోయిన డొనాల్డ్ ట్రంప్
ఈ వార్తాకథనం ఏంటి
రహస్య పత్రాల కేసులో క్రిమినల్ అభియోగాలు ఎదుర్కొంటున్న అమెరికా మాజీ అధ్యక్షుడు డొనాల్డ్ ట్రంప్ మియామీలోని ఫెడరల్ కోర్టు హౌస్‌లో న్యాయమూర్తి ఎదుట లొంగిపోయారు.
అనంతరం పోలీసులు ఆయనను అరెస్టు చేశారు. ఆ తర్వాత పూచీకత్తుపై విడుదల చేశారు.
తన పదవీకాలం ముగిసిపోయాక కూడా ప్రభుత్వానికి సంబంధించిన కీలక పత్రాలను తన వద్దే ఉంచుకున్నారని, వాటిని తిరిగి పొందేందుకు ప్రభుత్వం చేస్తున్న ప్రయత్నాలను అడ్డుకునేందుకు కుట్ర పన్నారనే అభియోగాలు ట్రంప్‌పై మోపారు.
అయితే ఈ ఆరోపణలను ట్రంప్ అంగీకరించలేదు. తాను నిర్దోషిని అని కోర్టు ఎదుట వాదించారు.
ఈ క్రమంలో క్రిమినల్ ఆరోపణలు ఎదుర్కొంటున్న తొలి అమెరికా మాజీ అధ్యక్షుడిగా ట్రంప్ నిలిచారు.
అమెరికా
రెండు క్రిమినల్ కేసులను ఎదుర్కొంటున్న ట్రంప్
తన మార్-ఎ-లాగో ఎస్టేట్‌లో భద్రపరిచిన అణు కార్యక్రమాలకు సంబంధించిన పత్రాలు, ఇతర సున్నితమైన సైనిక రహస్యాలను తిరిగి పొందకుండా ప్రభుత్వాన్ని నిరోధించడానికి ట్రంప్ పథకం వేసి, అబద్ధాలు చెప్పారని ఫెడరల్ అధికారులు చెబుతున్నారు.
2024లో జరిగే అమెరికా అధ్యక్ష ఎన్నికలకు పోటీ పడేందుకు సిద్ధమవుతున్న ట్రంప్ ఎదుర్కొంటున్న రెండో క్రిమినల్ కేసు ఇది.
2016లో జరిగిన ఎన్నికల ప్రచార సమయంలో చేసిన హుష్-మనీ చెల్లింపులకు సంబంధించిన వ్యాపార రికార్డులను తప్పుదారి పట్టించారని న్యూయార్క్ కోర్టులో ఆయనపై ప్రస్తుతం విచారణ జరుగుతోంది.
అయితే ఈ రెండు కేసుల్లో ట్రంప్ తాను నిర్దోషిని అని వాదించారు. దీంతో కోర్టు ఈ కేసులపై విచారించి, నిజానిజాలను తేల్చనుంది.