USA: అమెరికా ఆంక్షల మధ్య.. కొనుగోలుదార్లను వెతుక్కుంటూ రష్యా గ్యాస్‌ నౌకలు ఆసియాకు..!
ఈ వార్తాకథనం ఏంటి
అమెరికా విధించిన ఆంక్షల ప్రభావంలో ఉన్న రష్యా సహజ వాయువు కేంద్రం నుంచి బయల్దేరిన రెండు భారీ ట్యాంకర్లు ప్రస్తుతం ఆసియా వైపు ప్రయాణం మొదలుపెట్టాయి. వాషింగ్టన్‌లో శాంతి చర్చలు జరుగుతున్న సమయానికే ఈ ధ్రువీకృత సహజ వాయువు (ఎల్‌ఎన్‌జీ) సరఫరా నౌకలు ఆసియా దిశగా రావడం అంతర్జాతీయ స్థాయిలో చర్చకు దారి తీసింది. 'ది ఐరిస్‌', 'వోస్కోడ్‌' పేర్లతో ఉన్న ఈ రెండు నౌకలు సైబీరియాలోని ఆర్కిటిక్‌ ఎల్‌ఎన్‌జీ-2 ప్లాంట్‌ నుంచి ఉత్తర ఆసియాకు బయల్దేరాయి. వీటికి సంబంధించిన సమాచారం బ్లూమ్‌బెర్గ్‌ షిప్‌ ట్రాకింగ్‌ డేటాలో కనిపించింది. వాస్తవానికి ఈ ట్యాంకర్లు కొన్ని నెలల పాటు సముద్రంలో ఖాళీగా ఉన్నాయి.
వివరాలు
గత ఏడాది వేసవిలో ఆర్కిటిక్‌-2 నుంచి దాదాపు ఎనిమిది కార్గోలు
ఆర్కిటిక్‌-2 ప్లాంట్‌ను రష్యా కంపెనీ నోవాటెక్‌ పీజేఎస్‌సీ నిర్వహిస్తోంది. రాబోయే 2030నాటికి గ్యాస్‌ ఎగుమతులను మూడింతలు పెంచాలన్న రష్యా ప్రభుత్వ లక్ష్యంలో ఈ కంపెనీ కీలక పాత్ర పోషిస్తోంది. ఐరోపా దేశాలు పైప్‌లైన్‌ ద్వారా రష్యా గ్యాస్‌ కొనుగోళ్లు తగ్గించిన తరువాత మాస్కో ప్రత్యామ్నాయ మార్కెట్లను అన్వేషించే దిశగా కృషి చేస్తోంది. గత ఏడాది వేసవిలో ఆర్కిటిక్‌-2 నుంచి దాదాపు ఎనిమిది కార్గోలు ఎగుమతయ్యాయి. కానీ అక్టోబర్‌ కల్లా మంచు తీవ్రం కావడంతో కొత్త కొనుగోలుదారులు లభించక ఉత్పత్తిని నిలిపివేశారు. అనంతరం అమెరికా అధ్యక్షుడు బైడెన్‌ ప్రభుత్వం ఈ ప్లాంట్‌పై ఆంక్షలు విధించింది. అయితే ఈ ఏడాది జూన్‌ నుండి మళ్లీ ఎల్‌ఎన్‌జీని నౌకల్లో నింపడం ప్రారంభించారు.
వివరాలు
రష్యా నుంచి చమురు, సహజవాయువు అత్యధికంగా దిగుమతి చేసుకునే దేశాల్లో భారత్‌-చైనా
ఇప్పటివరకు అక్కడినుంచి బయల్దేరిన నౌకలు ఒక్క పోర్టులోనూ ఆగకుండానే ప్రయాణం కొనసాగించాయి. ఇప్పటివరకు నాలుగు నౌకలు కొనుగోలుదార్లను వెతుక్కుంటూ ఆసియాకు చేరాయి. అదనంగా మంచులో ప్రయాణించగల మరో డజను నౌకలను కూడా ఆర్కిటిక్‌-2 కోసం సిద్ధం చేశారు. రష్యా నుంచి చమురు, సహజవాయువు అత్యధికంగా దిగుమతి చేసుకునే దేశాల్లో భారత్‌-చైనా ముందు వరుసలో నిలుస్తున్నాయి. ఇప్పటికే న్యూఢిల్లీపై వాషింగ్టన్‌ ఆర్థిక శిక్షలు విధించిన సంగతి తెలిసిందే.