US Strikes on Iran: అమెరికా దాడులతో ఇరాన్లో తాగునీటి సంక్షోభం.. 20 వేల మందిపై ప్రభావం
ఈ వార్తాకథనం ఏంటి
అమెరికా-ఇరాన్ మధ్య ఉద్రిక్తతలు మరోసారి ప్రమాదకర స్థాయికి చేరుకున్నాయి. తాజాగా అమెరికా జరిపిన వైమానిక దాడుల్లో దక్షిణ ఇరాన్లోని సిరిక్ కౌంటీ పరిధిలో ఉన్న బెమానీ, కూహెస్టాక్ ప్రాంతాల్లోని రెండు నీటి నిల్వ ట్యాంకులు ధ్వంసమైనట్లు ఇరాన్ అధికారులు వెల్లడించారు. ఈ ఘటనతో సుమారు 20 వేల మందితో పాటు చుట్టుపక్కల 10 గ్రామాల ప్రజలకు తాగునీటి సరఫరా నిలిచిపోయింది. ఈ ప్రాంత ప్రజలు ప్రధానంగా సముద్రపు నీటిని శుద్ధి చేసే డీశాలినేషన్ ప్లాంట్పైనే ఆధారపడుతుండగా, ప్రస్తుతం అక్కడ ఉష్ణోగ్రతలు 100డిగ్రీల ఫారెన్హీట్ను దాటడంతో పరిస్థితి మరింత క్లిష్టంగా మారింది. ఇరాన్ హోర్ముజ్ జలసంధిలో గస్తీ నిర్వహిస్తున్న అమెరికా అపాచీ హెలికాప్టర్ను కూల్చివేసిన ఘటనకు ప్రతిస్పందనగా ఈ దాడులు జరిగినట్లు అమెరికా పేర్కొంది.
వివరాలు
డీశాలినేషన్ ప్లాంట్లు అత్యంత కీలకం
ఇవి ఆత్మరక్షణ చర్యలని,ఇరాన్ దాడులకు తగిన సమాధానమని అమెరికా వర్గాలు తెలిపాయి. ఈ దాడుల్లో సిరిక్ పట్టణంలోని ఒక టెలికమ్యూనికేషన్ టవర్ కూడా తీవ్రంగా దెబ్బతిన్నట్లు సమాచారం. పశ్చిమాసియా దేశాల్లో నీటి కొరత తీవ్రంగా ఉండటంతో సముద్రపు నీటిని శుద్ధి చేసి తాగునీటిగా మార్చే డీశాలినేషన్ ప్లాంట్లు అత్యంత కీలకంగా మారాయి. భూగర్భ జలాలు తక్కువగా ఉండటంతో బహ్రెయిన్,కువైట్,ఒమన్,ఖతార్,యూఏఈ,సౌదీ అరేబియా వంటి దేశాలు ఈ ప్లాంట్లపైనే అధికంగా ఆధారపడుతున్నాయి. ఖతార్లో తాగునీటిలో 99శాతం, బహ్రెయిన్, కువైట్లలో 90శాతానికి పైగా, ఒమన్లో 86 శాతం, సౌదీలో 70 శాతం, యూఏఈలో 42 శాతానికి పైగా డీశాలినేషన్ ప్లాంట్ల నుంచే అందుతోంది. ఈ కీలక వసతులన్నీ ఇరాన్ క్షిపణులు, డ్రోన్ల పరిధిలోనే ఉండటం ఆందోళన కలిగిస్తోంది.
వివరాలు
ఎండిపోయిన 19 ఆనకట్టలు
ఇప్పటికే వరుసగా ఐదేళ్లుగా కరువు పరిస్థితులను ఎదుర్కొంటున్న ఇరాన్లో 2025 నాటికి దాదాపు 19 ఆనకట్టలు ఎండిపోయినట్లు అధికారులు చెబుతున్నారు. ఈ నేపథ్యంలో నీటి నిల్వ కేంద్రాలపై అమెరికా దాడులను ఇరాన్ తీవ్రంగా ఖండించింది. నీటి వనరులపై దాడి చేయడం యుద్ధ నేరంగా పరిగణించాలని ఇరాన్ నీటి పరిశ్రమ ప్రతినిధులు పేర్కొన్నారు. అంతర్జాతీయ న్యాయ సూత్రాల ప్రకారం యుద్ధ సమయంలో నీటి వనరులను ధ్వంసం చేయడం నిషేధితమేనని వారు గుర్తు చేశారు.
వివరాలు
మార్చి 7 దాడి తర్వాత అమెరికా జరిపిన రెండో దాడి ఇదే..
హోర్ముజ్ జలసంధి సమీపంలోని కేష్మ్ ద్వీపంలో మార్చి 7న జరిగిన దాడి తర్వాత ఇరాన్ నీటి వసతులపై అమెరికా జరిపిన రెండో దాడి ఇదేనని సమాచారం. ఆ ఘటనలో 30 గ్రామాలకు నీటి సరఫరా నిలిచిపోయింది. దీనికి ప్రతీకారంగా ఇరాన్ ఇప్పటికే కువైట్, బహ్రెయిన్, యూఏఈలోని డీశాలినేషన్ ప్లాంట్లను లక్ష్యంగా చేసుకుంది. తాజా పరిణామాలతో గల్ఫ్ ప్రాంతంలోని నీటి మౌలిక సదుపాయాలపై మరిన్ని దాడులు జరిగే అవకాశముందని, అలా జరిగితే పశ్చిమాసియాలో తీవ్ర మానవతా సంక్షోభం తలెత్తే ప్రమాదం ఉందని నిపుణులు హెచ్చరిస్తున్నారు.