Trump: ట్రంప్ చిత్రంతో ప్రత్యేక పాస్పోర్టులు.. అమెరికా సంచలన నిర్ణయం
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ నాయకత్వంలోని ప్రభుత్వం మరో కీలక నిర్ణయం తీసుకుంది. ట్రంప్ ముఖచిత్రంతో ప్రత్యేక పాస్పోర్టులను త్వరలో విడుదల చేయాలని నిర్ణయించింది. అమెరికా 250వ స్వాతంత్ర్య వేడుకలను పురస్కరించుకుని పరిమిత సంఖ్యలో వీటిని రూపొందించనున్నట్లు మొదట వివిధ మాధ్యమాల్లో వార్తలు వెలువడ్డాయి. తాజాగా ఆ దేశ విదేశాంగ శాఖ ఈ విషయాన్ని అధికారికంగా ధృవీకరించింది. జులైలో జరగనున్న స్వాతంత్ర్య వేడుకల సందర్భంలో ఈ ప్రత్యేక పాస్పోర్టులను విడుదల చేయడానికి అన్ని ఏర్పాట్లు జరుగుతున్నాయని విదేశాంగ శాఖ ప్రతినిధి టామీ పిగాట్ తెలిపారు. ఇవి పరిమిత సంఖ్యలో మాత్రమే అందుబాటులో ఉంటాయని,అదనపు రుసుము ఉండదని కూడా స్పష్టం చేశారు. ఈ నిర్ణయాన్ని వైట్ హౌస్ కూడా ధృవీకరిస్తూ సంబంధిత చిత్రాలను పంచుకుంది.
వివరాలు
చారిత్రక ఘట్టాలు, ప్రకృతి సౌందర్య దృశ్యాలకు ప్రాధాన్యం
విడుదల చేయబోయే పాస్పోర్టుల రూపకల్పనలో స్వాతంత్ర్య ప్రకటన పత్రంపై ట్రంప్ చిత్రం, దాని కింద బంగారు రంగులో ఆయన సంతకం ప్రత్యేక ఆకర్షణగా కనిపిస్తోంది. మరొక రూపకల్పనలో దేశ స్థాపకుల చారిత్రక దృశ్యాలు ఉన్నాయి. ఇవి ప్రస్తుతం అంతర్జాలంలో విస్తృతంగా చర్చకు దారి తీస్తున్నాయి. సాధారణంగా అధికారంలో ఉన్న నాయకుల చిత్రాలను పాస్పోర్టులపై ముద్రించడం చాలా అరుదు. చాలా దేశాలు చారిత్రక ఘట్టాలు, ప్రకృతి సౌందర్య దృశ్యాలకు ప్రాధాన్యం ఇస్తాయి. ప్రస్తుతం అమెరికా పాస్పోర్టులపై చారిత్రక సంఘటనలు, స్వేచ్ఛకు ప్రతీకగా నిలిచిన ప్రముఖ విగ్రహాలు వంటి చిత్రాలు ఉన్నాయి. ఈ నేపథ్యంలో ట్రంప్ చిత్రంతో ప్రత్యేక పాస్పోర్టులను రూపొందించడం విశేషంగా భావిస్తున్నారు.
వివరాలు
ట్రంప్ సంతకం ఉన్న కరెన్సీ నోట్లు విడుదల
ఇదిలా ఉండగా, స్వాతంత్ర్య వేడుకల సందర్భంగా ట్రంప్ ముఖచిత్రంతో స్మారక నాణెం తయారీపై కూడా చర్యలు కొనసాగుతున్నాయి. అదనంగా ఆయన సంతకం ఉన్న కరెన్సీ నోట్లు విడుదల చేయనున్నట్లు ఖజానా శాఖ ప్రకటించింది. దీంతో దేశ కరెన్సీ నోట్లపై సంతకం చేయనున్న తొలి అధ్యక్షుడిగా ట్రంప్ నిలిచే అవకాశం ఉంది.