King Charles: 'మేము లేకపోతే మీరు ఫ్రెంచ్ మాట్లాడేవారు'.. ట్రంప్ను ఆట పట్టించిన కింగ్ చార్ల్స్
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్, బ్రిటన్ రాజు కింగ్ చార్లెస్ మూడవ వారి మధ్య వైట్హౌస్లో జరిగిన విందులో ఆసక్తికరమైన సంభాషణ చోటుచేసుకుంది. ఇరువురు నేతలు ఒకరిపై ఒకరు వ్యంగ్య బాణాలు విసురుకుంటూ నవ్వులు పూయించారు. గతంలో ట్రంప్ చేసిన వ్యాఖ్యలకు చార్లెస్ తన ప్రత్యేక శైలిలో సమాధానం ఇచ్చారు. "మేం లేకపోయి ఉంటే ఇప్పుడు మీరు ఫ్రెంచ్ మాట్లాడేవారేమో" అని చార్లెస్ అన్న మాట సభలో అందరినీ అలరించింది. మంగళవారం నిర్వహించిన ఈ విందులో చార్లెస్ ప్రసంగిస్తూ, అమెరికా స్వాతంత్ర్యానికి ముందు ఉత్తర అమెరికాలో ఆధిపత్యం కోసం బ్రిటన్, ఫ్రాన్స్ మధ్య జరిగిన పోరాటాలను ప్రస్తావించారు. ఇటీవల దావోస్ సమావేశంలో ట్రంప్ చేసిన వ్యాఖ్యలకు ప్రతిస్పందనగా ఈ వ్యాఖ్య చేశారని భావించబడింది.
వివరాలు
వైట్హౌస్ను గతంలో తామూ తగలబెట్టామంటూ చారిత్రక ఘటనల ప్రస్తావన
ట్రంప్ అప్పట్లో రెండో ప్రపంచ యుద్ధంలో అమెరికా సహాయం లేకపోయి ఉంటే యూరప్ దేశాలు జర్మన్ మాట్లాడేవని అన్నారు. చార్లెస్ తన హాస్యాన్ని కొనసాగిస్తూ ట్రంప్ చేపట్టిన వైట్హౌస్ మార్పులపై చమత్కరించారు. "వైట్హౌస్ పునర్నిర్మాణ ప్రయత్నాన్ని మేము 1814లోనే చేశాం" అని బ్రిటిష్ సైన్యం వైట్హౌస్ను దహనం చేసిన సంఘటనను గుర్తుచేసి నవ్వించారు. అలాగే ఈ విందు 1773లో జరిగిన బోస్టన్ టీ పార్టీ సంఘటన కంటే ఎంతో మెరుగ్గా ఉందని వ్యాఖ్యానించారు. చార్లెస్ వ్యాఖ్యలను ట్రంప్ సానుకూలంగా స్వీకరించారు. అమెరికా శాసనసభలో చార్లెస్ చేసిన ప్రసంగాన్ని ప్రశంసిస్తూ, "మీ ప్రసంగానికి ప్రతిపక్ష సభ్యులు కూడా లేచి నిలబడ్డారు. నేను అలాంటి అనుభవం పొందలేకపోయాను" అని చెప్పడంతో మరోసారి నవ్వులు వెల్లువెత్తాయి.
వివరాలు
రెండో ప్రపంచ యుద్ధం నాటి సబ్మెరైన్ గంటను ట్రంప్కు బహుమతిగా ఇచ్చిన చార్లెస్
ఈ పర్యటనలో భాగంగా ఇరాన్ అంశంపై బ్రిటన్ ప్రధాని కైర్ స్టార్మర్పై ట్రంప్ విమర్శలు చేసిన నేపథ్యంలో, రెండు దేశాల మధ్య సంబంధాలను మెరుగుపర్చే ప్రయత్నాలు కొనసాగుతున్నాయి. ఈ సందర్భంలో చార్లెస్ ట్రంప్కు ప్రత్యేక బహుమతి అందజేశారు. రెండో ప్రపంచ యుద్ధ సమయంలో 1944లో ప్రారంభించిన బ్రిటిష్ జలాంతర్గామి "హెచ్ఎంఎస్ ట్రంప్"కు చెందిన గంటను బహుమతిగా ఇచ్చారు. "మీకు ఎప్పుడైనా మా అవసరం ఉంటే మాకు ఒక సంకేతం ఇవ్వండి" అని చార్లెస్ చెప్పగా సభ చప్పట్లతో మారుమోగింది. ఇరాన్ వంటి అంశాలపై అభిప్రాయ భేదాలు ఉన్నప్పటికీ, ఈ విందు రెండు దేశాల మధ్య ఉన్న ప్రత్యేక సంబంధాన్ని మరోసారి వెల్లడించింది.