Hyundai Venue Knight Edition: బ్లాక్ థీమ్లో హ్యుందాయ్ వెన్యూ నైట్ ఎడిషన్.. ధర, ఫీచర్లు ఇవే!
ఈ వార్తాకథనం ఏంటి
హ్యుందాయ్ భారత మార్కెట్లో తన కాంపాక్ట్ ఎస్యూవీ వెన్యూ 'నైట్ ఎడిషన్'ను విడుదల చేసింది. ఈ కొత్త ఎడిషన్లో ఆకట్టుకునే డిజైన్ ఎలిమెంట్స్, ఆధునిక ఫీచర్లను కంపెనీ జోడించింది. వెన్యూ నైట్ ఎడిషన్లో బ్లాక్ థీమ్ ప్రధాన ఆకర్షణగా నిలుస్తోంది. ఇందులో బ్లాక్ ఫ్రంట్ రేడియేటర్ గ్రిల్, మ్యాట్ బ్లాక్ ఫ్రంట్, రియర్ హ్యుందాయ్ లోగోలు, బ్లాక్ స్కిడ్ ప్లేట్, బ్లాక్ రూఫ్ రైల్స్, ఆర్వీఎంలు (ORVMs), 16 అంగుళాల అలాయ్ వీల్స్, లక్కర్డ్ బ్రేక్ కాలిపర్స్, బ్రాంజ్ ఇన్సర్ట్స్, బ్లాక్ ఇంటీరియర్స్తో పాటు ప్రత్యేక సీట్ అప్హోల్స్టరీ అందుబాటులో ఉన్నాయి. ఇంకా HX6T, HX10, N10 వేరియంట్లలో కొత్తగా డాష్క్యామ్ ఫీచర్ను జోడించింది.
వివరాలు
ఇంజన్ పరంగా ఎలాంటి మార్పులు చేయలేదు
అలాగే హేజల్ బ్లూ మ్యాట్, మిస్టిక్ సఫైర్ మ్యాట్ వంటి కొత్త కలర్ ఆప్షన్లు కూడా వినియోగదారులకు అందిస్తోంది. ఇంజన్ పరంగా ఎలాంటి మార్పులు చేయలేదు. ఈ ఎస్యూవీ 1.2 లీటర్ పెట్రోల్, 1.0 లీటర్ టర్బో GDI పెట్రోల్, 1.5 లీటర్ CRDI డీజిల్ ఇంజన్ ఎంపికలతో అందుబాటులో ఉంది. ఇవి మాన్యువల్, ఆటోమేటిక్ ట్రాన్స్మిషన్లతో వస్తాయి. హ్యుందాయ్ వెన్యూ నైట్ ఎడిషన్ ప్రారంభ ధర రూ.9.69 లక్షలు (ఎక్స్షోరూమ్)గా ఉండగా, టాప్ వేరియంట్ ధర రూ.15.48 లక్షలు (ఎక్స్షోరూమ్)గా ఉంది. కాంపాక్ట్ ఎస్యూవీ సెగ్మెంట్లో ఈ మోడల్ కియా సోనెట్, కియా సైరోస్, మహీంద్రా XUV 3XO, టాటా నెక్సాన్, మారుతి బ్రెజ్జా వంటి మోడళ్లతో పోటీ పడనుంది.