Ola: ఫిబ్రవరి అమ్మకాల డేటా విడుదల చేసిన ఓలా.. గతేడాదితో పోలిస్తే క్షీణించిన అమ్మకాలు
ఈ వార్తాకథనం ఏంటి
ప్రముఖ విద్యుత్‌ ద్విచక్ర వాహన తయారీ సంస్థ ఓలా ఎలక్ట్రిక్‌ 2025 ఫిబ్రవరి నెలకు సంబంధించిన అమ్మకాల గణాంకాలను వెల్లడించింది.
ఈ కాలంలో కంపెనీ మొత్తం 25,000 యూనిట్లను విక్రయించింది, అయితే ఇది 2024 ఫిబ్రవరితో పోలిస్తే 25.86% తగ్గుదలగా ఉంది.
గత ఏడాది ఇదే నెలలో ఓలా ఎలక్ట్రిక్‌ 33,722 యూనిట్లను విక్రయించింది. అమ్మకాలు తగ్గినప్పటికీ, భారతదేశంలోని ఎలక్ట్రిక్‌ ద్విచక్ర వాహన రంగంలో 28% మార్కెట్‌ వాటాతో ఓలా ఎలక్ట్రిక్‌ ఇప్పటికీ అగ్రస్థానంలో కొనసాగుతోంది.
వివరాలు
అమ్మకాల్లో తగ్గుదలకున్న కారణాలు
ఓలా ఎలక్ట్రిక్‌ వాహన రిజిస్ట్రేషన్‌ ఏజెన్సీలతో ఉన్న ఒప్పందాల్లో కొన్ని మార్పులను చేసింది.
ఖర్చులను తగ్గించడంతో పాటు రిజిస్ట్రేషన్‌ విధానాన్ని మెరుగుపరిచేందుకు ఈ నిర్ణయం తీసుకున్నట్లు కంపెనీ వెల్లడించింది.
ఈ మార్పుల కారణంగా ఫిబ్రవరిలో వాహన్‌ పోర్టల్‌లో వాహన రిజిస్ట్రేషన్ల సంఖ్య తాత్కాలికంగా తగ్గిందని పేర్కొంది.
అయినప్పటికీ, జనవరి 2025తో పోలిస్తే ఫిబ్రవరిలో అమ్మకాల్లో పెద్దగా మార్పు లేదు. జనవరిలో 24,330 యూనిట్ల విక్రయాలు జరిగాయి, అలాగే 4,000కి పైగా కస్టమర్లు ఓలా S1 సిరీస్‌ స్కూటర్‌ను కొనుగోలు చేశారు.
వివరాలు
కొత్త తరహా వాహనాలు
తాజాగా, ఓలా ఎలక్ట్రిక్‌ మూడో తరం జనరేషన్‌ ప్లాట్‌ఫామ్‌పై ఆధారపడి కొత్త ఎలక్ట్రిక్‌ స్కూటర్లను లాంచ్‌ చేసింది.
ఎస్‌1 ఎక్స్‌, ఎస్‌1 ఎక్స్‌+, ఎస్‌1 ప్రో, ఎస్‌1 ప్రో+ అనే నాలుగు మోడళ్లు వివిధ బ్యాటరీ ఎంపికలతో అందుబాటులోకి తెచ్చింది.
వీటి ప్రారంభ ధర రూ.79,000గా ఉండగా, గరిష్టంగా రూ.1.69 లక్షల వరకు ఉంది. ముఖ్యంగా, కంపెనీ ప్రస్తుత మోడళ్లకు అదనంగా ఎస్‌1 ప్రో+ అనే కొత్త మోడల్‌ను పరిచయం చేయడం విశేషం.
వివరాలు
కొత్త మోడళ్ల వివరాలు
ఓలా ఎలక్ట్రిక్‌ ఇటీవల మార్కెట్లోకి తీసుకువచ్చిన ఎస్‌1 ప్రో+ స్కూటర్‌ 5.3kWh, 4kWh బ్యాటరీ ఆప్షన్లలో లభిస్తుంది.
వీటి ధరలు వరుసగా రూ.1,69,999 మరియు రూ.1,54,999గా నిర్ణయించబడింది.
ఎస్‌1 ప్రో 4kWh బ్యాటరీ వేరియంట్‌ రూ.1,34,999, 3kWh వేరియంట్‌ రూ.1,14,999 ధరతో లభిస్తుంది.
అలాగే, ఎస్‌1 ఎక్స్‌ మోడల్‌ 2kWh బ్యాటరీ వేరియంట్‌ రూ.79,999, 3kWh వేరియంట్‌ రూ.89,999, 4kWh వేరియంట్‌ రూ.99,999కు అందుబాటులో ఉంది.
ఇక ఎస్‌1 ఎక్స్‌+ మోడల్‌ కేవలం 4kWh బ్యాటరీ వేరియంట్‌లో మాత్రమే లభిస్తుంది, దీని ధర రూ.1,07,999గా నిర్ణయించారు.