Royal Enfield Classic 350: ఫ్లెక్స్-ఫ్యూయల్ టెక్నాలజీపై రాయల్ ఎన్ఫీల్డ్ ఫోకస్.. కొత్త క్లాసిక్ 350 రాబోతుందా?
ఈ వార్తాకథనం ఏంటి
రాయల్ ఎన్ఫీల్డ్ తమ బెస్ట్సెల్లింగ్ మోడల్ క్లాసిక్ 350కి ఫ్లెక్స్-ఫ్యూయల్ వెర్షన్పై నిశ్శబ్దంగా పని చేస్తున్నట్లు తెలుస్తోంది. చెన్నైలో తాజాగా కనిపించిన టెస్ట్ మ్యూల్ ఈ విషయానికి సంకేతాలు ఇస్తోంది. ఎలాంటి కవర్ లేకుండా పరీక్షలు చేస్తున్న ఈ బైక్పై ఫ్యూయల్ ట్యాంక్ దగ్గర చేతితో రాసిన 'E85 Fuel' స్టికర్ కనిపించడం గమనార్హం. దీన్ని బట్టి ఈ బైక్లో సాధారణం కంటే భిన్నమైన ఇంధన వ్యవస్థను పరీక్షిస్తున్నట్లు స్పష్టమవుతోంది. ఈ ఫ్లెక్స్-ఫ్యూయల్ క్లాసిక్ 350 ప్రస్తుతం మార్కెట్లో ఉన్న మోడల్లానే కనిపిస్తుంది. అయితే రెండు ముఖ్యమైన మార్పులు కనిపిస్తున్నాయి.
వివరాలు
ఫ్యూయల్ సిస్టమ్ కంపాటిబిలిటీపై దృష్టి..
ఒకటి కొత్తగా ఇంకా విడుదల కాని కలర్ షేడ్, మరొకటి వైర్-స్పోక్ వీల్స్ స్థానంలో అలాయ్ వీల్స్ వినియోగం. వీటిని తప్పితే డిజైన్, స్టాన్స్, మెకానికల్ సెటప్లో పెద్దగా మార్పులు లేవు. అంటే ప్రస్తుతం కంపెనీ లుక్ మార్చడంపై కాకుండా ఫ్యూయల్ సిస్టమ్ కంపాటిబిలిటీపై దృష్టి పెట్టినట్లు తెలుస్తోంది. ఇందులో మరో ఆసక్తికర విషయం ప్లాట్ఫామ్కు సంబంధించినది. క్లాసిక్ 350లో ఉపయోగిస్తున్న J-సిరీస్ ఇంజిన్ అదే విధంగా మీటియర్ 350, హంటర్ 350, బుల్లెట్ 350 మోడళ్లలో కూడా ఉంది. కాబట్టి ఈ ఫ్లెక్స్-ఫ్యూయల్ టెక్నాలజీ విజయవంతమైతే, ఈ మొత్తం బైక్ ఫ్యామిలీని ఒకేసారి E85 ఫ్యూయల్కు అనుకూలంగా మార్చే అవకాశం ఉంది.
వివరాలు
ఆ దిశగా అడుగులు వేస్తున్న కంపెనీలు..
ఇటీవల రోడ్డురవాణా, రహదారుల మంత్రిత్వ శాఖ భారత్లో E85, E100 ఇంధనాలను అధికారిక ప్రమాణాలుగా గుర్తించే డ్రాఫ్ట్ నిబంధనలను విడుదల చేసింది. పెట్రోల్, డీజిల్ వినియోగాన్ని తగ్గించి పర్యావరణానికి అనుకూలమైన బయోఫ్యూయల్స్ వైపు వెళ్లాల్సిన అవసరాన్ని కేంద్ర మంత్రి నితిన్ గడ్కరీ పలుమార్లు ప్రస్తావించారు. దీంతో ఆటో మొబైల్ కంపెనీలు కూడా ఈ దిశగా అడుగులు వేస్తున్నాయి. ఈ రంగంలో రాయల్ ఎన్ఫీల్డ్ మొదటిది కాదు. ఇప్పటికే హోండా 2024 అక్టోబర్లో CB300F ఫ్లెక్స్ ఫ్యూయల్ మోడల్ను విడుదల చేసింది. అలాగే బజాజ్ 2024 సెప్టెంబర్లో E100 పై నడిచే పల్సర్ NS160ను ప్రదర్శించింది. కార్ల విభాగంలో మారుతి సుజుకి కూడా 2025 జపాన్ మొబిలిటీ షోలో ఫ్రాంక్స్ E85 ప్రోటోటైప్ను ప్రదర్శించింది.
వివరాలు
భవిష్యత్తులో వచ్చే నిబంధనలకు ముందుగానే సిద్ధం..
అయితే క్లాసిక్ 350 ఫ్లెక్స్-ఫ్యూయల్ వెర్షన్ ఎప్పుడు విడుదల అవుతుందన్న విషయంపై ఇప్పటివరకు ఎలాంటి అధికారిక సమాచారం లేదు. ధర కూడా ప్రస్తుత మోడల్తో పోలిస్తే కొంచెం ఎక్కువగా ఉండే అవకాశం ఉంది. అయితే తాజా టెస్ట్ మ్యూల్ దర్శనం చూస్తే, భవిష్యత్తులో వచ్చే నిబంధనలకు ముందుగానే రాయల్ ఎన్ఫీల్డ్ సిద్ధమవుతున్నట్లు తెలుస్తోంది.