Royal Enfield: FY27లో రూ.2,200 కోట్ల పెట్టుబడులు.. రాయల్ ఎన్ఫీల్డ్ భారీ ప్లాన్
ఈ వార్తాకథనం ఏంటి
దేశీయ ప్రముఖ బైక్ తయారీ సంస్థ రాయల్ ఎన్ఫీల్డ్ భారీ విస్తరణ ప్రణాళికలకు సిద్ధమవుతోంది. FY27లో సుమారు రూ.2,200 కోట్ల పెట్టుబడులు పెట్టాలని సంస్థ నిర్ణయించింది. ఉత్పత్తి సామర్థ్యాన్ని పెంచడం, కొత్త మోడళ్ల అభివృద్ధి, ఎలక్ట్రిక్ వాహనాల ప్రోగ్రామ్ల కోసం ఈ పెట్టుబడులను వినియోగించనుంది. ముఖ్యంగా ఆంధ్రప్రదేశ్లోని తడా యూనిట్ విస్తరణపై కంపెనీ ప్రత్యేక దృష్టి పెట్టినట్లు సమాచారం. ఈ రూ.2,200 కోట్ల క్యాపెక్స్ ప్రణాళికను B Govindarajan ఇటీవల మీడియా సమావేశంలో వెల్లడించారు. మొత్తం పెట్టుబడిలో సుమారు రూ.1,000 కోట్లు ఉత్పత్తి సామర్థ్య విస్తరణ కోసం వినియోగించనుండగా, మిగిలిన నిధులను కొత్త మోటార్సైకిళ్ల అభివృద్ధి, ఎలక్ట్రిక్ వాహనాల విభాగాన్ని బలోపేతం చేయడానికి ఖర్చు చేయనున్నారు.
వివరాలు
అమ్మకాలలో రికార్డు వృద్ధి
దేశీయ, అంతర్జాతీయ మార్కెట్లలో రాయల్ ఎన్ఫీల్డ్ బైక్లకు డిమాండ్ పెరుగుతూనే ఉంది. FY26లో కంపెనీ 11 లక్షలకు పైగా బైక్లను విక్రయించినట్లు సమాచారం. వరుసగా రెండో ఏడాది కూడా వార్షిక అమ్మకాలు 10 లక్షల మార్క్ దాటడం విశేషం. ఇక 2026 ఏప్రిల్ నెలలోనే లక్షకు పైగా యూనిట్ల అమ్మకాలు నమోదు చేసినట్లు నివేదికలు చెబుతున్నాయి. తమిళనాడుపైనే ఆధారపడకుండా ఉత్పత్తి కేంద్రాలను విస్తరించాలనే లక్ష్యంతో రాయల్ ఎన్ఫీల్డ్ ముందుకు సాగుతోంది. ఈ క్రమంలో ఆంధ్రప్రదేశ్లోని తడా ఫెసిలిటీ అభివృద్ధిపై కంపెనీ దృష్టి పెట్టింది. తమిళనాడులో ఉన్న సరఫరాదారుల నెట్వర్క్ ప్రయోజనాలను కొనసాగించడంతో పాటు, ఇతర రాష్ట్రాల్లో కూడా కార్యకలాపాలను విస్తరించాలని కంపెనీ భావిస్తోంది. భవిష్యత్ ఉత్పత్తి పెరుగుదలకు తాడా యూనిట్ కీలకంగా మారనుంది.
వివరాలు
ఎలక్ట్రిక్ బైక్లపై ప్రత్యేక దృష్టి
ఎలక్ట్రిక్ మొబిలిటీ రంగంలో కూడా రాయల్ ఎన్ఫీల్డ్ వేగంగా అడుగులు వేస్తోంది. కంపెనీకి చెందిన Flying Flea బ్రాండ్ ద్వారా ప్రీమియం ఎలక్ట్రిక్ బైక్లను తీసుకురానుంది. సాధారణ కమ్యూటర్ వినియోగదారుల కంటే నగరాల్లో ప్రీమియం సెగ్మెంట్ కస్టమర్లను టార్గెట్ చేస్తోంది. ఇప్పటికే Flying Flea C6 మోడల్ను ప్రదర్శించగా, త్వరలో స్క్రాంబ్లర్ స్టైల్ ఎలక్ట్రిక్ బైక్ కూడా విడుదలయ్యే అవకాశం ఉంది. ప్రస్తుతం రాయల్ ఎన్ఫీల్డ్ 350cc, 450cc, 650cc సెగ్మెంట్లలో పలు మోడళ్లను అందిస్తోంది. దీంతో ప్రీమియం బైక్ మార్కెట్లో విభిన్న వర్గాల కస్టమర్లను ఆకర్షిస్తోంది.