Tata Electric Cars : టాటా EV ప్లాన్ అదిరింది.. 2026 చివరికల్లా 3 కొత్త ఎలక్ట్రిక్ కార్లు లాంచ్
ఈ వార్తాకథనం ఏంటి
భారత ఎలక్ట్రిక్ వాహనాల మార్కెట్లో టాటా మోటార్స్ ఇప్పటికీ అగ్రస్థానంలోనే దూసుకుపోతోంది. టియాగో ఈవీ, టిగోర్ ఈవీ, పంచ్ ఈవీ, నెక్సాన్ ఈవీ, కర్వ్ ఈవీ, హారియర్ ఈవీలా ఇప్పటికే ఆరు విభిన్న మోడళ్లతో అతిపెద్ద ఈవీ పోర్ట్ఫోలియోను కలిగి ఉన్న టాటా.. తన దూకుడును మాత్రం ఏమాత్రం తగ్గించడం లేదు. 2026 చివరి నాటికి మరో మూడు కొత్త ఎలక్ట్రిక్ కార్లను మార్కెట్లోకి తీసుకురావాలని కంపెనీ లక్ష్యంగా పెట్టుకుంది. ఏప్రిల్ నుంచి లెక్క పెడితే మొత్తం తొమ్మిది నెలల్లో మూడు కొత్త మోడళ్లు రావొచ్చని తెలుస్తోంది. అంటే దాదాపు ప్రతి మూడు నెలలకు ఒక కొత్త టాటా ఎలక్ట్రిక్ కారు లాంచ్ అయ్యే అవకాశముంది.
వివరాలు
టాటా సియెర్రా ఈవీ..
ఈ నేపథ్యంలో ఈ ఏడాది భారత మార్కెట్లోకి రానున్న ఆ మూడు కొత్త టాటా ఈవీ మోడళ్ల వివరాలు ఇవే. ఐకానిక్గా గుర్తింపు పొందిన 'సియెర్రా' బ్రాండ్ను టాటా ఇప్పుడు ఎలక్ట్రిక్ రూపంలో మళ్లీ తీసుకురానుంది. ఈ మోడల్ 2026-27 ఆర్థిక సంవత్సరం తొలి త్రైమాసికంలో, అంటే ఏప్రిల్ నుంచి జూన్ 2026 మధ్యలో విడుదలయ్యే అవకాశముందని సమాచారం. ఇప్పటికే ఈ వాహనం టెస్టింగ్ దశలో పలుమార్లు కనిపించింది. టాటా లైనప్లో ఈ మోడల్ కర్వ్ ఈవీ, హారియర్ ఈవీల మధ్య స్థానం దక్కించుకోనుంది.
వివరాలు
టెక్నాలజీ:
టాటా కొత్తగా అభివృద్ధి చేస్తున్న 'acti.ev+' ప్లాట్ఫారమ్పై ఈ ఎలక్ట్రిక్ ఎస్యూవీ రూపొందుతోంది. ఇది సింగిల్ మోటార్, డ్యూయల్ మోటార్ వేరియంట్లలో అందుబాటులోకి వచ్చే అవకాశముంది. బ్యాటరీ, రేంజ్: ఇందులో 55 కేడబ్ల్యూహెచ్, 65 కేడబ్ల్యూహెచ్ బ్యాటరీ ప్యాక్లు ఇవ్వొచ్చని అంచనా. పెద్ద బ్యాటరీ ప్యాక్తో ఒక్కసారి పూర్తి ఛార్జ్ చేస్తే 500 కిలోమీటర్లకు పైగా రేంజ్ అందించే అవకాశం ఉంది. అలాగే వెహికల్-టు-వెహికల్ (V2V), వెహికల్-టు-లోడ్ (V2L) ఛార్జింగ్ ఫీచర్లు కూడా ఉండనున్నాయని తెలుస్తోంది.
వివరాలు
2026 టాటా టియాగో ఈవీ ఫేస్లిఫ్ట్
టాటా నుంచి అందుబాటు ధరలో లభిస్తున్న ఎలక్ట్రిక్ కార్లలో టియాగో ఈవీకి ప్రత్యేక స్థానం ఉంది. ఇప్పుడు ఇదే మోడల్ ఫేస్లిఫ్ట్ వెర్షన్లో కొత్త మార్పులతో రానుంది. 2026 మూడో త్రైమాసికంలో, అంటే దీపావళి సీజన్కు ముందుగానే ఇది మార్కెట్లోకి వచ్చే అవకాశం ఉందని సమాచారం. మార్పులు: కొత్త హెడ్ల్యాంప్ సెటప్, రీడిజైన్ చేసిన బంపర్లు, కొత్త అలాయ్ వీల్స్తో ఈ కారు ఎక్స్టీరియర్ మరింత ఆకర్షణీయంగా మారనుంది. అయితే ఇంటీరియర్లో పెద్ద మార్పులు ఉండకపోవచ్చని అంచనా.
వివరాలు
బ్యాటరీ:
ప్రస్తుతం ఉన్న 19.2 కేడబ్ల్యూహెచ్, 24 కేడబ్ల్యూహెచ్ బ్యాటరీ ప్యాక్లకంటే పెద్ద ఆప్షన్లను టాటా ఈ మోడల్లో అందించే అవకాశం ఉందని సమాచారం. దీని వల్ల ప్రస్తుతం లభిస్తున్న 223 నుంచి 293 కిలోమీటర్ల రేంజ్ మరింత పెరగవచ్చని భావిస్తున్నారు. టాటా అవిన్య ఈవీ టాటా మోటార్స్ నుంచి రాబోతున్న అత్యంత ప్రతిష్టాత్మకమైన ప్రీమియం ఎలక్ట్రిక్ మోడల్గా 'అవిన్య'ను భావిస్తున్నారు. ఈ కారుపై ఇప్పటికే భారీ అంచనాలు నెలకొన్నాయి. స్పోర్ట్బ్యాక్ బాడీ స్టైల్లో రానున్న ఈ మోడల్ 2026 చివరి నాటికి మార్కెట్లోకి వచ్చే అవకాశం ఉంది. ప్లాట్ఫారమ్: ఈ వాహనం జాగ్వార్ ల్యాండ్ రోవర్ 'ఎలక్ట్రిఫైడ్ మోడ్యులర్ ఆర్కిటెక్చర్', టాటా జెన్ 3 ఈవీ ఆర్కిటెక్చర్ ఆధారంగా అభివృద్ధి అవుతోంది.
వివరాలు
రేంజ్, పవర్:
ఒక్కసారి పూర్తి ఛార్జ్ చేస్తే 600 కిలోమీటర్లకు పైగా రేంజ్ ఇచ్చే సామర్థ్యం ఈ కారుకు ఉండొచ్చని అంచనా. అలాగే ఇందులో ఆల్ వీల్ డ్రైవ్ సిస్టమ్ కూడా ఉండనుందని సమాచారం. పోటీ, ధర: భారత మార్కెట్లో ఈ కారు హ్యుందాయ్ ఐయానిక్ 5, కియా ఈవీ6 వంటి ప్రీమియం ఎలక్ట్రిక్ కార్లకు గట్టి పోటీ ఇవ్వొచ్చని భావిస్తున్నారు. దీని ప్రారంభ ఎక్స్-షోరూమ్ ధర సుమారు రూ.35 లక్షల వరకు ఉండే అవకాశం ఉంది.