Starlink: స్టార్‌లింక్‌కు భారత్‌లో స్పెక్ట్రమ్ పన్ను
ఈ వార్తాకథనం ఏంటి
శాటిలైట్‌ ఇంటర్నెట్‌ సేవలందించేందుకు ప్రపంచంలోని ప్రముఖ వ్యాపారవేత్త ఎలాన్‌ మస్క్‌ స్పేస్‌-X (SpaceX) సంస్థతో భారతదేశపు అగ్రశ్రేణి టెలికాం కంపెనీలు ఒప్పందం కుదుర్చుకున్న విషయం తెలిసిందే.
ఈ నేపథ్యంలో త్వరలో భారత్‌లో స్టార్‌లింక్‌ (Starlink) సేవలు ప్రారంభమయ్యే అవకాశాలు కనిపిస్తున్నాయి.
అయితే, కేంద్ర ప్రభుత్వం ఈ సేవలకు అనుమతులు ఇచ్చే విషయంలో కొన్ని కఠినమైన షరతులను విధించినట్లు ఇటీవల వార్తలు వెలువడ్డాయి.
ఇప్పుడు ఈ ప్రాజెక్ట్‌ 'పన్ను' సంబంధిత సవాళ్లను కూడా ఎదుర్కొంటోందని తెలుస్తోంది.
వివరాలు
3% స్పెక్ట్రమ్ వినియోగ రుసుము
భారతదేశంలో స్టార్‌లింక్‌ సేవలకు సంబంధించి స్పెక్ట్రమ్ పన్ను విధించే అవకాశముందని సమాచారం.
విశ్వసనీయ వర్గాలను ఉటంకిస్తూ ఓ ప్రముఖ ఆంగ్ల వార్తా మాధ్యమం ఈ అంశాన్ని వెల్లడించింది.
ఈ పన్ను విధించబడితే, శాటిలైట్‌ కమ్యూనికేషన్‌ సేవల వ్యయం పెరిగే అవకాశం ఉంది.
గతంలో, దేశీయ టెలికాం సంస్థలు రిలయన్స్‌ జియో, ఎయిర్‌టెల్‌, వోడాఫోన్‌-ఐడియా మొదలైన కంపెనీలకు స్పెక్ట్రమ్ పన్నును తొలగించిన విషయం తెలిసిందే.
దేశంలో స్టార్‌లింక్‌ సేవల ద్వారా కంపెనీకి లభించే సర్దుబాటు చేసిన స్థూల ఆదాయంపై (AGR) దాదాపు 3% స్పెక్ట్రమ్ వినియోగ రుసుమును విధించే అంశాన్ని కేంద్ర ప్రభుత్వం పరిశీలిస్తున్నట్లు ఈ కథనాలు తెలియజేస్తున్నాయి.
వివరాలు
స్పెక్ట్రమ్ వినియోగానికి అదనపు రుసుములు
''వేలానికి బదులుగా,శాటిలైట్‌ ఆపరేటర్లకు నేరుగా స్పెక్ట్రమ్‌ను కేటాయిస్తున్నందున ఈవినియోగ ఛార్జీలు వర్తించనున్నాయి.అంటే,టెలికాం కంపెనీలు చెల్లించే 8%లైసెన్సు ఫీజు మాత్రమే కాకుండా, శాటిలైట్‌ కమ్యూనికేషన్‌ ఆపరేటర్లు స్పెక్ట్రమ్ వినియోగానికి అదనపు రుసుములు చెల్లించాల్సి ఉంటుంది.ఈరుసుము AGR పై 3%కంటే ఎక్కువగా ఉండొచ్చు.దీనికి సంబంధించిన తుది రేట్లపై ఇంకా చర్చలు కొనసాగుతున్నాయి''అని విశ్వసనీయ వర్గాలు తెలిపాయి.
ప్రస్తుతం ఈ వినియోగ రుసుములు,శాటిలైట్‌ స్పెక్ట్రమ్ కేటాయింపు కాలవ్యవధి వంటి అంశాలు టెలికాం నియంత్రణ సంస్థ ట్రాయ్‌(TRAI)వద్ద చర్చల దశలో ఉన్నాయి.
ఈచర్చల అనంతరం,స్పెక్ట్రమ్ కేటాయింపుకు సంబంధించి ట్రాయ్‌ తన ప్రతిపాదనలను టెలికాం శాఖకు అందించనుంది.
అక్కడినుంచి పరిశీలించిన తర్వాత ఈ ప్రతిపాదనలు డిజిటల్‌ కమ్యూనికేషన్స్‌ కమిషన్‌(DCCకి పంపబడతాయి.
డీసీసీ అనుమతుల అనంతరం చివరగా కేబినెట్‌ ఆమోదించాల్సి ఉంటుంది.