Health Policy- Premiums-Hike: ప్రీమియం పెంచనున్న బీమా కంపెనీలు?
బీమా సంస్థలు తమ ప్రీమియంలను పెంచేశాయి. ఇన్సూరెన్స్ రెగ్యులేటరీ సంస్థ ఇటీవలే పలు మార్పులు చేస్తూ కొత్త నిబంధనలను తీసుకొచ్చింది. ఈ నిబంధనలు ఫలితంగా ఆరోగ్య భీమా పాలసీలు మరింత భారంగా మారే అవకాశాలు కనిపిస్తున్నాయి . రోజురోజుకు హాస్పిటల్ ఖర్చులు పెరిగిపోతుండటంతో వాటిని తట్టుకునేందుకు హెల్త్ ఇన్సూరెన్స్ అనేది ఇప్పుడు తప్పనిసరి అయిపోయింది. కాబట్టి ప్రతి ఒక్కరు ఏదో ఒక ఆరోగ్య బీమా పాలసీని తీసుకుంటున్నారు. అయితే భారతీయ భీమా నియంత్రణ అభివృద్ధి ప్రాధికార సంస్థ (ఐఆర్ డిఏఐ) ఈ ఏడాది ఏప్రిల్ ఒకటి నుంచి కొత్త నిబంధనలను అమలులోకి తీసుకొచ్చింది. దీంతో ఇండియా లోనే ఇన్సూరెన్స్ కంపెనీలు ఆరోగ్య బీమా పాలసీల ప్రీమియంలను పెంచుకునే యోచనలో ఉన్నట్లు తెలుస్తోంది.
65 ఏళ్ల వయోపరిమితిని ఎత్తేసిన ఐఆర్డీఐ
ఇదివరకు హెల్త్ ఇన్సూరెన్స్ తీసుకునేందుకు గరిష్ట వయోపరిమితి 65 ఏళ్ళు ఉండగా దాన్ని ఐ ఆర్ డి ఐ తొలగించి వయోపరిమితిని ఎత్తివేసింది. ఇక ముందస్తు వ్యాధుల విషయంలో వేచి ఉండే సమయాన్ని నాలుగేళ్ల నుంచి మూడు ఏళ్లకు కుదించింది. ఈ నిర్ణయంతో ఇండియాలోని ఇన్సూరెన్స్ కంపెనీలకు అధికంగా క్లెయిమ్స్ వచ్చే అవకాశం ఉంటుంది. ఈ కారణంగానే ఆ ప్రీమియంలను సర్దుబాటు చేసేందుకు భీమా కంపెనీలన్నీ సిద్ధమవుతున్నాయి. పాలసీలను బట్టి కొత్త ప్రీమియం రేట్లు జూలై లేదా ఆగస్టు నుంచి అమలు అవుతాయని సమాచారం. ఈ బీమా సంస్థలు గరిష్టంగా 10 శాతం నుంచి 15% వరకు ప్రీమియం పెంచే అవకాశాలు ఉన్నట్లు మార్కెట్ నిపుణులు అంచనా వేస్తున్నారు .
