'Mona Lisa' of diamonds: రూ.130 కోట్లకు అమ్ముడైన గోల్కొండ అరుదైన పింక్ డైమండ్
ఈ వార్తాకథనం ఏంటి
ప్రపంచ వజ్రాల మార్కెట్‌లో భారతదేశానికి చెందిన చారిత్రక గోల్కొండ వజ్రం మరోసారి ప్రత్యేక ఆకర్షణగా నిలిచింది. దాదాపు ఏడు దశాబ్దాలుగా ఒకే కుటుంబం వద్ద భద్రంగా ఉన్న 24 క్యారెట్ల 'బల్గారి పింక్' వజ్రం అంతర్జాతీయ వేలంలో భారీ ధరకు అమ్ముడైంది. స్విట్జర్లాండ్‌లోని జెనీవాలో ప్రముఖ వేలం సంస్థ క్రిస్టీస్ నిర్వహించిన 'మాగ్నిఫిసెంట్ జువెల్స్' వేలంలో ఈ వజ్రం 12,086,000 స్విస్ ఫ్రాంక్‌లు పలికింది. అమెరికా డాలర్లలో ఈ మొత్తం 14,809,761 డాలర్లకు సమానం. భారతీయ కరెన్సీలో దీని విలువ సుమారు రూ.130 కోట్లు. వేలానికి ముందు ఈ వజ్రం 10 మిలియన్ల నుంచి 15 మిలియన్ల స్విస్ ఫ్రాంక్‌ల మధ్య ధర పలకవచ్చని నిపుణులు అంచనా వేశారు.
వివరాలు
గోల్కొండ నుంచి రోమ్ నగరానికి..
వారి అంచనాలకు అనుగుణంగానే భారీ ధరకు అమ్ముడైంది. అరుదైన రంగు, నాణ్యతతో పాటు భారతదేశ చరిత్రతో ముడిపడిన నేపథ్యం ఈ వజ్రానికి మరింత ప్రత్యేకతను తీసుకొచ్చాయి.
'బల్గారి పింక్' వజ్రం ప్రయాణం భారతదేశంలోని గోల్కొండ ప్రాంతం నుంచి ప్రారంభమైంది.
1950వ దశకంలో విక్రేత కుటుంబానికి చెందిన పూర్వీకులు ఈ అరుదైన వజ్రాన్ని గోల్కొండ ప్రాంతంలో కొనుగోలు చేశారు.
అనంతరం ఇటలీ రాజధాని రోమ్‌కు తీసుకెళ్లారు. అక్కడ ప్రపంచ ప్రఖ్యాత ఆభరణాల సంస్థ బల్గారి ఈ వజ్రాన్ని ఉంగరంలో అమర్చేలా ప్రత్యేకంగా రూపొందించింది.
అప్పటి నుంచి దాదాపు 70 ఏళ్లకు పైగా ఈ రత్నం అదే కుటుంబం వద్దే ఉంది.
వివరాలు
'పింక్ డైమండ్స్‌లో మోనాలిసా'
బయట ప్రపంచానికి పెద్దగా కనిపించని ఈ అరుదైన వజ్రాన్ని తొలిసారిగా క్రిస్టీస్ వేలం వేదికపైకి తీసుకొచ్చారు. దీంతో అంతర్జాతీయ వజ్రాల మార్కెట్‌లో దీనిపై ఆసక్తి నెలకొంది.
రత్నాల నాణ్యతను పరిశీలించే నిపుణుల వర్గీకరణ ప్రకారం 'బల్గారి పింక్'కు అత్యున్నతమైన 'ఫ్యాన్సీ ఇంటెన్స్ పింక్' రంగు గ్రేడ్ లభించింది.
అంతేకాకుండా ఇది అత్యంత అరుదైన 'టైప్-2ఏ' వజ్రాల విభాగానికి చెందినది.
ప్రపంచవ్యాప్తంగా రత్నాల నాణ్యత కలిగిన వజ్రాల్లో ఈ తరహావి రెండు శాతం కంటే తక్కువగా ఉంటాయని క్రిస్టీస్ వెల్లడించింది.
ఈ వజ్రానికి 'వీవీఎస్2' క్లారిటీ రేటింగ్ కూడా ఉంది. అంటే అత్యంత శక్తివంతమైన భూతద్దంతో పరిశీలించినప్పటికీ ఇందులోని అంతర్గత లోపాలను గుర్తించడం చాలా కష్టం.
వివరాలు
సహజంగా ఏర్పడే పింక్ వజ్రాల్లో ఉండే 'నైట్రోజన్ వేకెన్సీ కేంద్రాలు'
ఇంతటి స్వచ్ఛత కలిగిన వజ్రం కావడంతో దీని విలువ మరింత పెరిగింది.
సహజంగా ఏర్పడే పింక్ వజ్రాల్లో ఉండే 'నైట్రోజన్ వేకెన్సీ కేంద్రాలు' వాటికి ఆకర్షణీయమైన గులాబీ రంగును అందిస్తాయని నిపుణులు వివరిస్తున్నారు.
ఈ వజ్రాన్ని విశాలమైన ముఖభాగాలు కలిగిన 'ఎమరాల్డ్ కట్' ఆకృతిలో తీర్చిదిద్దారు. దీంతో దాని రంగు, మెరుపు స్పష్టంగా కనిపిస్తాయి.
అరుదైన రంగు, అత్యుత్తమ నాణ్యత, ప్రత్యేకమైన ఆకృతి, చారిత్రక నేపథ్యం.. ఇలా అనేక విశేషాలు కలిసిరావడంతో ఈ వజ్రం ప్రపంచవ్యాప్తంగా గుర్తింపు పొందింది.
అందుకే క్రిస్టీస్ గ్లోబల్ హెడ్ ఆఫ్ జ్యువెలరీ మాక్స్ ఫాసెట్ దీనిని 'పింక్ డైమండ్స్‌లో మోనాలిసా'గా అభివర్ణించారు.