India Economic Growth: చైనా కంటే భారత్‌ వృద్ధి వేగం ఎక్కువ.. 2027లో 7.2 శాతం జీడీపీ వృద్ధి!
ఈ వార్తాకథనం ఏంటి
భారత ఆర్థిక వ్యవస్థ రాబోయే రోజుల్లోనూ దూకుడును కొనసాగించనుందని అంతర్జాతీయ దిగ్గజ ఇన్వెస్ట్‌మెంట్ బ్యాంక్ గోల్డ్‌మన్‌ శాక్స్‌ వెల్లడించింది. 2027 నాటికి భారత్‌ 7.2 శాతం జీడీపీ వృద్ధి రేటును నమోదు చేయవచ్చని అంచనా వేసింది. తద్వారా పొరుగున ఉన్న చైనా కంటే వేగంగా అభివృద్ధి చెందుతుందని తన తాజా రీసెర్చ్‌ నివేదికలో పేర్కొంది. ప్రధాన వర్ధమాన ఆర్థిక వ్యవస్థల్లో భారతదేశం అగ్రస్థానంలో నిలవనుందని తెలిపింది.
వివరాలు
2027లో ప్రపంచ వృద్ధి 2.8 శాతం
గోల్డ్‌మన్‌ శాక్స్‌ రీసెర్చ్‌ నివేదిక ప్రకారం.. 2027లో అంతర్జాతీయ ఆర్థిక వ్యవస్థ 2.8 శాతం మేర వృద్ధి చెందే అవకాశం ఉంది. 2026లో అంచనా వేసిన 2.7 శాతంతో పోలిస్తే ఇది స్వల్పంగా ఎక్కువ. ప్రపంచవ్యాప్తంగా కఠిన ఆర్థిక పరిస్థితులు ఉన్నప్పటికీ.. ఇంధన ధరలు తగ్గడం, ఆర్టిఫిషియల్‌ ఇంటెలిజెన్స్‌ (ఏఐ) రంగంలో భారీ పెట్టుబడులు రావడం ఆర్థిక వృద్ధికి ఊతమిస్తాయని నివేదిక వివరించింది. గోల్డ్‌మన్‌ శాక్స్‌ ప్రధాన ఆర్థికవేత్త, రీసెర్చ్‌ విభాగం అధిపతి జాన్‌ హట్జియస్‌ ఈ పరిణామాలపై స్పందించారు. ఇంధన వ్యయాలు, సాంకేతిక రంగంలో పెట్టుబడులు, ప్రభుత్వాల ద్రవ్య విధానాలు ప్రపంచ ఆర్థిక వృద్ధికి ప్రధాన చోదకాలుగా మారుతున్నాయని తెలిపారు.
వివరాలు
చైనా కంటే భారత్‌ వృద్ధి వేగం ఎక్కువ
2027లో ప్రపంచ ఆర్థిక వ్యవస్థ స్థిరమైన, సాధారణ స్థాయి జీడీపీ వృద్ధిని నమోదు చేయవచ్చని పేర్కొన్నారు.
భారత్‌ 2027లో 7.2 శాతం వృద్ధిని సాధిస్తుందని గోల్డ్‌మన్‌ శాక్స్‌ అంచనా వేసింది. మార్కెట్‌ సాధారణ అంచనా అయిన 6.8 శాతం కంటే ఇది అధికం కావడం గమనార్హం.
2026 సంవత్సరానికి భారత్‌ వృద్ధి రేటును 7.9 శాతంగా అంచనా వేసింది. మరోవైపు చైనా ఆర్థిక వ్యవస్థ 2027లో 4.5 శాతం వృద్ధికే పరిమితం కావచ్చని నివేదిక పేర్కొంది.
ఆ దేశంలో రియల్‌ ఎస్టేట్‌ రంగ సమస్యలు, దేశీయ వినియోగం మందగించినప్పటికీ.. ఎగుమతులు కొంతమేర అండగా నిలుస్తాయని విశ్లేషించింది.
వివరాలు
ఏఐ పెట్టుబడులతో ప్రపంచ ఆర్థిక వ్యవస్థకు ఊతం
అమెరికా, జపాన్‌, బ్రిటన్‌ వంటి అభివృద్ధి చెందిన దేశాలు మార్కెట్‌ అంచనాల కంటే మెరుగైన వృద్ధిని నమోదు చేస్తాయని గోల్డ్‌మన్‌ శాక్స్‌ పేర్కొంది.
ఏఐ ఉత్పత్తుల ఎగుమతులకు అంతర్జాతీయంగా బలమైన డిమాండ్‌ ఉండటంతో దక్షిణ కొరియా, తైవాన్‌ దేశాలు ఎక్కువగా లబ్ధి పొందుతాయని అంచనా వేసింది.
ప్రపంచవ్యాప్తంగా ఏఐ రంగంలో పెట్టుబడులు 2026లోని 1.1 ట్రిలియన్‌ డాలర్ల నుంచి 2027 నాటికి 1.8 ట్రిలియన్‌ డాలర్లకు చేరుకోవచ్చని నివేదిక తెలిపింది.
ముఖ్యంగా అమెరికాలో హార్డ్‌వేర్‌ రంగంలోనే 500 బిలియన్‌ డాలర్లకు పైగా అదనపు వ్యయం జరగవచ్చని అంచనా వేసింది. ఇది ప్రపంచ జీడీపీ వృద్ధికి 0.4 శాతం మేర దోహదం చేస్తుందని నిపుణులు విశ్లేషించారు.
వివరాలు
తగ్గనున్న చమురు, ఎల్‌ఎన్‌జీ ధరలు
మరోవైపు అంతర్జాతీయ మార్కెట్‌లో చమురు ధరలు తగ్గడం ఆర్థిక కార్యకలాపాలకు కలిసిరానుంది.
2027 చివరి నాటికి బ్రెంట్‌ క్రూడ్‌ ఆయిల్‌ ధర బ్యారెల్‌కు 78 డాలర్లకు దిగిరావచ్చని గోల్డ్‌మన్‌ శాక్స్‌ కమోడిటీ నిపుణులు అంచనా వేశారు.
ద్రవీకృత సహజ వాయువు (ఎల్‌ఎన్‌జీ) ధరలు కూడా క్రమంగా తగ్గుతాయని పేర్కొన్నారు.
అయితే ఐరోపా దేశాలు మాత్రం పెరిగిన ఇంధన ఖర్చుల ప్రభావాన్ని మరికొంత కాలం ఎదుర్కోవాల్సి ఉంటుందని నివేదిక స్పష్టం చేసింది.